ലക്ഷദ്വീപില്‍ നിന്നു വരുന്ന വാര്‍ത്തകള്‍ അതീവ ഗൗരവമുള്ളതാണെന്ന് മുഖ്യമന്ത്രി പിണറായി വിജയന്‍. അത്തരം നീക്കങ്ങള്‍ ഒരു തരത്തിലും അംഗീകരിക്കാന്‍ കഴിയാത്തതാണെന്നും അദ്ദേഹം വാര്‍ത്താസമ്മേളനത്തില്‍ മാധ്യമപ്രവര്‍ത്തകരുടെ ചോദ്യത്തിന് മറുപടിയായി പറഞ്ഞു. ലക്ഷദ്വീപില്‍ നടത്തുന്ന പ്രതിലോമകരമായ നീക്കങ്ങളില്‍നിന്നും ബന്ധപ്പെട്ടവര്‍ പിന്‍വാങ്ങണം എന്ന് തന്നെയാണ് ശക്തമായ അഭിപ്രായമെന്നും മുഖ്യമന്ത്രി വ്യക്തമാക്കി.

'ലക്ഷദ്വീപില്‍ നിന്നു വരുന്ന വാര്‍ത്തകള്‍ അതീവ ഗൗരവമുള്ളതാണ്. അവിടത്തെ ദ്വീപ് നിവാസികളുടെ സംസ്‌കാരത്തിനും ജീവിതത്തിനും വെല്ലുവിളി ഉയര്‍ത്തുന്ന സാഹചര്യമാണ് ഉയര്‍ന്നു വരുന്നത്. അത്തരം നീക്കങ്ങള്‍ ഒരു തരത്തിലും അംഗീകരിക്കാന്‍ കഴിയാത്തതാണ്,' മുഖ്യമന്ത്രി പറഞ്ഞു.
'നമുക്കറിയാം ലക്ഷദ്വീപും കേരളവുമായി ദീര്‍ഘകാലത്തെ ബന്ധമാണ്. ഒരു ഘട്ടത്തില്‍ സംസ്ഥാനത്തിന്റെ ഭാഗമായിട്ടായിരുന്നു അവര്‍ പ്രവര്‍ത്തിച്ചത്. നമ്മുടെ തുറമുഖങ്ങളുമായി അവര്‍ക്ക് ബന്ധമുണ്ട്. നമ്മുടെ നാട്ടിലാണ് അവരുടെ ചികിത്സാ ആവശ്യത്തിന് സാധാരണ വരാറുള്ളത്. കോഴിക്കോട്, എറണാകുളം, തിരുവനന്തപുരം ഇവിടം എല്ലാം എടുത്താല്‍ ലക്ഷദ്വീപില്‍നിന്നുള്ള ധാരാളം വിദ്യാര്‍ത്ഥികളെ കാണാനാവും. അങ്ങനെ എല്ലാ തരത്തിലും നമ്മുടെ നാടുമായി ഇഴുകിച്ചേര്‍ന്ന് പ്രവര്‍ത്തിക്കുന്ന ഒരു വിഭാഗമാണ്.'
'പരസ്പര സഹകരണത്തിലൂടെയാണ് ദ്വീപ് നിവാസികളും നമ്മളും മുന്നോട്ട് പോവുന്നത്. അവിടെ വിദ്യാഭ്യാസം, തൊഴില്‍, ചികിത്സ, വ്യാപാരം ഇത്തരം കാര്യങ്ങളിലൊക്കെ നമുക്ക് വളരെ ദൃഢമായ ബന്ധമാണുള്ളത്. ഇത് തകര്‍ക്കാന്‍ ഒരു ഗൂഢ ശ്രമം ആരംഭിച്ചതായാണ് വാര്‍ത്തകളില്‍ കാണുന്നത്. സങ്കുചിത താല്‍പര്യങ്ങള്‍ക്ക് വഴങ്ങിക്കൊണ്ടാണ് അത്തരം നിലപാട്. അത് തീര്‍ത്തും അപലപനീയമാണ്,' മുഖ്യമന്ത്രി പറഞ്ഞു.
'ഇത്തരത്തിലുള്ള പ്രതിലോമകരമായ നീക്കങ്ങളില്‍നിന്നും തീരുമാനങ്ങളില്‍നിന്നും ബന്ധപ്പെട്ടവര്‍ പിന്‍വാങ്ങണം എന്ന് തന്നെയാണ് ശക്തമായ അഭിപ്രായം,' മുഖ്യമന്ത്രി വ്യക്തമാക്കി.