ചുമ്മാതല്ല രക്ഷപ്പെടാത്തത്... പാലക്കാട് ജയിക്കുമായിരുന്ന ഇ ശ്രീധരന് അവസാന നിമിഷം തോറ്റപ്പോള് പൊട്ടിച്ചിരിച്ചത് ചില ബിജെപി നേതാക്കളാണോയെന്ന് സംശയം; ഇ ശ്രീധരനെ തോല്പിക്കാന് ബിജെപിയില് ഒരു വിഭാഗം ശ്രമിച്ചെന്ന് ദേശീയ നേതൃത്വത്തിന് പരാതി
കേരളത്തില് ഏതാണ്ട് വിജയമുറപ്പിച്ചയാളാണ് മെട്രോമാന് ഇ ശ്രീധരന്. അവസാന നിമിഷമാണ് ഷാഫി പറമ്പില് ജയിച്ച് കയറിയത്. അതിനിടെ പ്രധാനമന്ത്രി നരേന്ദ്ര മോദിയുള്പ്പെടെ മുന്കൈയെടുത്തു മത്സരിപ്പിച്ച ഇ ശ്രീധരനെ തോല്പിക്കാനും ബിജെപിയില് ഒരു വിഭാഗം ശ്രമിച്ചെന്നു ദേശീയ നേതൃത്വത്തിനു പരാതി ലഭിച്ചു.
2016 ലെ നിയമസഭാ തിരഞ്ഞെടുപ്പില് 40,074 വോട്ടോടെ ബിജെപി ചരിത്രത്തിലാദ്യമായി രണ്ടാമതെത്തിയ മണ്ഡലത്തില് പുതുതായി 7322 വോട്ടുകള് കൂടി ബിജെപി ചേര്ത്തിരുന്നു.
ഈ 47,500 വോട്ടുകള്ക്കപ്പുറം ഇ. ശ്രീധരന്റെ ജനപിന്തുണയില് ലഭിക്കേണ്ട വോട്ടുകള് കൂടി പരിഗണിക്കുമ്പോള് 60,000 വോട്ടുകള് ലഭിക്കേണ്ട മണ്ഡലത്തില് 50,052 വോട്ടുകളായത് എതിര് സ്ഥാനാര്ഥിയുമായി ബിജെപി സംസ്ഥാന നേതൃത്വത്തിലെ ഉന്നത നേതാവ് നടത്തിയ ഡീല് ആണെന്നാണ് രഹസ്യ പരാതിയില് ആരോപിക്കുന്നത്.
സംസ്ഥാന ബിജെപി നേതാക്കളെ വെട്ടിലാക്കുന്ന ആരോപണമാണ് നിരന്തരം വരുന്നത്. കള്ളപ്പണം തുടച്ചുനീക്കാന് നോട്ടുനിരോധനം ഉള്പ്പെടെ നടപ്പാക്കി കേന്ദ്രത്തില് അധികാരത്തിലുള്ള ബിജെപിയുടെ കേരളഘടകം കുഴല്പണക്കേസിലും തിരഞ്ഞെടുപ്പിനു കള്ളപ്പണമെത്തിച്ചുവെന്നതിലും പ്രതിസ്ഥാനത്തായതോടെ നേതൃത്വത്തില് ഭിന്നത രൂക്ഷം.
വിഴുപ്പലക്കല് പരസ്യമായി തൃശൂരിലേതു പോലെ സംഘര്ഷത്തിലേക്കു കടക്കുമ്പോഴും പാര്ട്ടിയെ പ്രതിരോധിക്കാന് സംസ്ഥാന പ്രസിഡന്റ് കെ.സുരേന്ദ്രനല്ലാതെ കാര്യമായി ആരും രംഗത്തില്ല. കുമ്മനം രാജശേഖരന്, പി.കെ.കൃഷ്ണദാസ്, എംടി.രമേശ്, ശോഭ സുരേന്ദ്രന്, എ.എന്. രാധാകൃഷ്ണന് ഉള്പ്പെടെ മുതിര്ന്ന നേതാക്കളെല്ലാം മൗനത്തിലാണ്. പാര്ട്ടിയെ നാണംകെടുത്തിയ ഈ പ്രതിസന്ധിയിലേക്കു നയിച്ചതു നേതൃത്വത്തിലെ ഒരു വിഭാഗത്തിന്റെ മാത്രം ദുരൂഹനീക്കങ്ങളുടെ ഫലമാണെന്നു മറുവിഭാഗം പറയുന്നു.
കുഴല്പണക്കേസില് ബിജെപിയുടെ സംസ്ഥാന നേതാക്കളടക്കം പ്രതിസ്ഥാനത്തു വരുമോയെന്ന ആശങ്ക നില്ക്കുമ്പോഴാണ് എന്ഡിഎയിലെത്താന് സി.കെ.ജാനുവിനു പണം കൊടുക്കേണ്ടി വന്നുവെന്ന ആരോപണം. സൂചിപ്പിക്കുന്ന, ഇടനിലക്കാരിയും കെ.സുരേന്ദ്രനും തമ്മിലുള്ള ഫോണ് സംഭാഷണത്തിന്റേതെന്നു കരുതുന്ന ശബ്ദരേഖ പ്രചരിച്ചതു പാര്ട്ടിയെ കൂടുതല് നാണക്കേടിലാക്കി.
പാര്ട്ടിയുടെ തിരഞ്ഞെടുപ്പു ഫണ്ടായി കോടികള് കേന്ദ്രനേതൃത്വം എത്തിച്ചു നല്കിയിട്ടും അത് എല്ലാ മണ്ഡലത്തിലും കൃത്യമായി നല്കിയില്ലെന്നതാണ് മറ്റൊരു ആരോപണം. സുരേന്ദ്രന് പക്ഷത്തുള്ള നേതാക്കള് സ്ഥാനാര്ഥികളായ സ്ഥലത്തു മാത്രമാണു കൂടുതല് പണം നല്കിയതെന്നും മറ്റിടങ്ങളില് പണമെത്തിയില്ലെന്നും പല സ്ഥാനാര്ഥികളും ആരോപിക്കുന്നു.
ബിജെപി എ ക്ലാസ് എന്നു വിലയിരുത്തിയ മണ്ഡലങ്ങളില് പോലും ദുര്ബല സ്ഥാനാര്ഥികളെ നിര്ത്തിയതു നേരത്തേ വിവാദമായിരുന്നു. കോന്നിയിലെ സ്ഥാനാര്ഥിയാകാന് നിര്ബന്ധിച്ചെന്നും പക്ഷേ എ ക്ലാസ് മണ്ഡലത്തിലെ പണം നല്കില്ലെന്നും പറഞ്ഞു മുതിര്ന്ന നേതാവ് തന്നെ സമീപിച്ചുവെന്ന് പ്രാദേശിക നേതാവ് സാമൂഹിക മാധ്യമങ്ങളില് പ്രതികരിച്ചു.
ഇത്തരത്തില് എ ക്ലാസ് മണ്ഡലത്തില് പോലും അപ്രധാന സ്ഥാനാര്ഥികളെ നിര്ത്തി പണം ചില നേതാക്കള് കൈക്കലാക്കിയെന്നാണ് ആരോപണം. ഇതില് ദേശീയ നേതൃത്വത്തിലേക്കു വരെ ആരോപണമെത്തുന്നു.
കേന്ദ്രനേതാക്കള് ഇവിടെ തമ്പടിച്ചു പ്രവര്ത്തനം നടത്തിയിട്ടും ഈ ഇടപാടുകളും ആരോപണവുമൊന്നും അറിഞ്ഞില്ലേയെന്നാണ് നേതാക്കളുടെ ചോദ്യം. മണ്ഡലങ്ങളിലെ പ്രവര്ത്തനം ഏകോപിപ്പിച്ച ആര്എസ്എസിന്റെ ചുമതലപ്പെട്ടവരും ബിജെപി നേതാക്കളുടെ ഈ രഹസ്യകളിയില് ഇപ്പോള് വെട്ടിലായിരിക്കുകയാണ്.
"
https://www.facebook.com/Malayalivartha