18 കോടി ചികിത്സാ ചെലവിന് വേണമെന്ന് കേട്ട് ആദ്യം ഞെട്ടിയത് കുടുംബം, പിന്നെ നാട്ടുകാര്‍. അതിന്‌ശേഷം കേരളവും. എന്നാല്‍ മലയാളികളുടെ സഹായത്തിന് മുമ്പില്‍ 18 കോടി ഒന്നുമല്ലെന്ന് തെളിക്കുന്നതായി സംഭവം മാറി.

ഒരു കുഞ്ഞിന്റെ ജീവന്‍ നിലനിറുത്താന്‍, ലോകത്തെ ഏറ്റവും വിലകൂടിയ മരുന്നാണെങ്കിലും നാട് ഒരുമിച്ചുനിന്നാല്‍ എത്തിക്കാന്‍ കഴിയുമെന്ന് മലയാളികള്‍ തെളിയിച്ചിരിക്കുകയാണ്. സ്‌പൈനല്‍ മസ്‌കുലര്‍ അട്രോഫി എന്ന അപൂര്‍വ മാരകരോഗം ബാധിച്ച പഴയങ്ങാടി മാട്ടൂല്‍ സെന്‍ട്രലിലെ പി.കെ.റഫീഖ് മറിയുമ്മ ദമ്പതികളുടെ മകന്‍ ഒന്നരവയസുള്ള മുഹമ്മദിന് മരുന്നിന് ആവശ്യമായ 18 കോടി രൂപ നാലു ദിവസങ്ങള്‍ക്കുള്ളിലാണ് കുടുംബത്തിന്റെ അക്കൗണ്ടില്‍ എത്തിയത്. ലോകത്തിന്റെ പല ഭാഗത്തുനിന്നായിരുന്നു പ്രതികരണം.

ഇനി അക്കൗണ്ടിലേക്ക് പണം അയയ്‌ക്കേണ്ടതില്ലെന്ന് ചികിത്സാസഹായ കമ്മിറ്റി അറിയിച്ചു. നാട് ഒന്നായി കൈ കോര്‍ത്തതിന്റെ ഫലമാണിത്. പലരും നേരിട്ട് എത്തിയാണ് പണം നല്‍കിയത്. മുഹമ്മദിന്റെ രോഗത്തെക്കുറിച്ച് പ്രമുഖ മാധ്യമങ്ങള്‍ റിപ്പോര്‍ട്ട് ചെയ്തിരുന്നു. കൊച്ചുകുട്ടികള്‍ മുതല്‍ ലോകത്തെ വിവിധ പ്രദേശത്തെ സാധാരണക്കാരും സമ്പന്നരും വരെ സഹായവുമായി എത്തി.

കല്യാശ്ശേരി മണ്ഡലം എം.എല്‍.എ എം. വിജിന്‍ മുഖ്യ രക്ഷാധികാരിയായും കെ.വി. മുഹമ്മദലി രക്ഷാധികാരിയായും മാട്ടൂല്‍ പഞ്ചായത്ത് പ്രസിഡന്റ് ഫാരിഷ ആബിദ് ചെയര്‍മാനായും ടി.പി. അബ്ബാസ് ഹാജി കണ്‍വീനറായുമുള്ള കമ്മിറ്റിയാണ് മുഹമ്മദ് സഹായ ഫണ്ടിനായി പ്രവര്‍ത്തിച്ചത്.

ഗള്‍ഫില്‍ എ.സി ടെക്‌നീഷ്യനായ പിതാവ് റഫീഖിന്റെയും മറിയുമ്മയുടെയും മൂത്തമകള്‍ അഫ്രയും സ്‌പൈനല്‍ മസ്‌കുലര്‍ അട്രോഫി ബാധിച്ച കുട്ടിയാണ്. രണ്ടുവയസിനകം ലോകത്തിലെ ഏറ്റവും വില കൂടിയ മരുന്നായ സോള്‍ജെന്‍സ്മ 44 മില്ലി നല്‍കിയാലേ ഇത് ഭേദമാകൂ. മരുന്ന് എത്തിച്ചാല്‍ ഇളയ കുട്ടിയായ മുഹമ്മദിനെ രക്ഷിക്കാമെന്ന് കോഴിക്കോട് മിംസിലെ ഡോക്ടര്‍മാരാണ് നിര്‍ദ്ദേശിച്ചത്.

അമേരിക്കയില്‍ മാത്രം ലഭ്യമായ മരുന്നിന് 18കോടിയാണ് വില. നാലാം വയസിലാണ് അഫ്രയുടെ(15) അസുഖം തിരിച്ചറിഞ്ഞത്. അതിനാല്‍ ഈ മരുന്ന് അഫ്രയ്ക്ക് ഫലപ്രദമല്ല. ചക്രക്കസേരയില്‍ അനങ്ങാന്‍ പോലും പ്രയാസപ്പെടുകയാണ് അഫ്ര. ഇളയ കുട്ടിയെയെങ്കിലും രക്ഷിക്കണമെന്ന കുടുംബത്തിന്റെ പ്രാര്‍ത്ഥനയോടാണ് നാട് അദ്ഭുതകരമായി പ്രതികരിച്ചത്. റഫീഖിന്റെ രണ്ടാമത്തെ മകളായ 10 വയസുകാരിക്ക് ഈ അസുഖമില്ല.

മലയാളി പൊളിയാണെന്ന് പുത്തന്‍ തലമുറ പറയുന്നത് വെറുതെയല്ല. ഒരാവശ്യം വന്നാല്‍ ആവശ്യക്കാരന് കൈയയച്ച് സഹായം ഒഴുകിയെത്തും. അപൂര്‍വമായ ജനിതക രോഗം ബാധിച്ച് ചികിത്സയ്ക്ക് പണം തേടിയിരുന്ന മാട്ടൂലില്‍ മുഹമ്മദ് എന്ന കുട്ടിയ്ക്ക് മരുന്നിന് ആവശ്യമായ 18 കോടി രൂപ മലയാളികള്‍ മുഴുവനും എത്തിച്ചു.

മുഴുവന്‍ പണവും ലഭിച്ചതായും കേരളത്തിലെ എല്ലാ ജനങ്ങള്‍ക്കും നന്ദി പറയുന്നതായും മുഹമ്മദിന്റെ കുടുംബം അറിയിച്ചു. മരുന്നിനുളള തുക മുഴുവനായും ലഭിച്ചെന്ന് മാട്ടൂല്‍ പഞ്ചായത്ത് പ്രസിഡന്റ് ഫാരിഷ ഔദ്യോഗികമായി അറിയിച്ചു.



സ്‌പൈനല്‍ മസ്‌കുലാര്‍ അട്രോഫി എന്ന ജനിതക രോഗമാണ് മുഹമ്മദിന് ബാധിച്ചത്. മുഹമ്മദിന്റെ സഹോദരി അഫ്രയ്ക്കും ഇതേ രോഗമായതിനാല്‍ ഇളയ കുട്ടിയെയെങ്കിലും രക്ഷിക്കാനുള്ള പരിശ്രമമാണ് കുടുംബം നടത്തിയത്. ചെറുപ്പത്തില്‍ മതിയായ ചികിത്സ ലഭിക്കാതെ ദുരിതമനുഭവിച്ചിട്ടുണ്ട് അഫ്ര. തന്റെ പോലെ അനുജന് വരരുതെന്ന് അഫ്ര അപേക്ഷിച്ചിരുന്നു.

വിദേശത്ത് നിന്നും രോഗത്തിനുളള മരുന്ന് എത്തിച്ച് ഒരു ഡോസ് കുത്തിവയ്പ്പ് എടുക്കുന്നതോടെ മുഹമ്മദിന് സാധാരണ ജീവിതത്തിലേക്ക് മെല്ലെ മടങ്ങിയെത്താന്‍ കഴിയുമെന്നാണ് പ്രതീക്ഷ. രണ്ട് വയസിന് മുന്‍പാണ് സോള്‍ജന്‍സ്മ എന്ന വിലയേറിയ മരുന്ന് കുത്തിവയ്‌ക്കേണ്ടത്. ഒന്നര വയസുകാരനായ മുഹമ്മദിന് ഇതോടെ രക്ഷപ്പെടാനാകുമെന്ന് പ്രതീക്ഷ വന്നിരിക്കുകയാണ്. വെറും ആറ് ദിവസം കൊണ്ടാണ് വേണ്ട പണം ലഭിച്ചിരിക്കുന്നത്. എല്ലാം ദൈവത്തിന്റെ കൃപ.