ബോളിവുഡ് നടി ശില്‍പ ഷെട്ടിയെ സംബന്ധിച്ച് വളരെ നിര്‍ണായകമായ നാളുകളാണ് കടന്ന് പോകുന്നത്. നീലച്ചിത്രക്കേസില്‍ രാജ് കുന്ദ്രയുടെ ഭാര്യയും നടിയുമായ ശില്‍പ ഷെട്ടിക്ക് ക്ലീന്‍ ചിറ്റ് നല്‍കിയിട്ടില്ലെന്നു പോലീസ് അറിയിച്ചു. ശില്‍പയെ വീണ്ടും ചോദ്യം ചെയ്‌തേക്കും. ഇരുവരുടെയും ബാങ്ക് അക്കൗണ്ടുകളും കുന്ദ്രയുടെ സാമ്പത്തിക ഇടപാടുകളും പരിശോധിക്കാന്‍ പൊലീസ് ചുമതലപ്പെടുത്തിയ ഓഡിറ്റര്‍മാര്‍ അന്വേഷണം തുടങ്ങി.

സാമ്പത്തിക ഇടപാടു സംബന്ധിച്ച പരിശോധന പൂര്‍ത്തിയാക്കാതെ നടിക്ക് ക്ലീന്‍ ചിറ്റ് നല്‍കാനാവില്ലെന്നാണ് പൊലീസ് നിലപാട്. ജുഡീഷ്യല്‍ കസ്റ്റഡിയില്‍ കഴിയുന്ന കുന്ദ്രയുടെ ജാമ്യാപേക്ഷ മജിസ്‌ട്രേട്ട് കോടതി തള്ളി.

അശ്ലീല വീഡിയോ നിര്‍മാണക്കേസില്‍ അടുത്തിടെയാണ് ശില്‍പ ഷെട്ടിയുടെ രാജ് കുന്ദ്ര അറസ്റ്റിലായത്. മുംബൈ െ്രെകംബ്രാഞ്ച് ആണ് രാജ് കുന്ദ്രയെ അറസ്റ്റ് ചെയ്തത്. രാജ് കുന്ദ്ര അശ്ലീല വീഡിയോ നിര്‍മാണ റാക്കറ്റിന്റെ തലവനാണ് എന്നാണ് പൊലീസ് പറയുന്നത്. കേസില്‍ തെളിവെടുക്കാന്‍ രാജ് കുന്ദ്രയുമായി വീട്ടില്‍ എത്തിയപ്പോള്‍ ശില്‍പ ഷെട്ടി പൊട്ടിത്തെറിച്ചതായി എന്‍ഡിടിവി റിപ്പോര്‍ട് ചെയ്യുന്നു.

അതേസമയം ഭര്‍ത്താവിനെ ക്രൈംബ്രാഞ്ചിനൊപ്പം വീട്ടില്‍ കണ്ടപ്പോള്‍ വളരെ രൂക്ഷമായിട്ടാണ് ശില്‍പ ഷെട്ടി പ്രതികരിച്ചത്. കുടുംബത്തിന്റെ മാനം നശിപ്പിച്ചു. സിനിമാ വ്യവസായത്തില്‍ എല്ലാം നഷ്ടപ്പെട്ടു. ഒരുപാട് പ്രൊജക്റ്റുകള്‍ ഉപേക്ഷിക്കേണ്ടി വന്നുവെന്നും ശില്‍പ ഷെട്ടി പറഞ്ഞു. രാജ് കുന്ദ്രയാണ് കേസില്‍ ഒന്നാം പ്രതി. നമുക്ക് എല്ലാം ഉണ്ടായിരുന്നിട്ടും, ഇങ്ങനത്തെ പണി ചെയ്യേണ്ട ആവശ്യമെന്തായിരുന്നുവെന്നാണ് ശില്‍പാ ഷെട്ടി ചോദിച്ചത്.



അതേസമയം അന്വേഷണങ്ങളോട് സഹകരിക്കാന്‍ രാജ് കുന്ദ്ര തയ്യാറാകുന്നില്ല എന്നും അന്വേഷണ ഉദ്യോഗസ്ഥര്‍ പറയുന്നു.കേസില്‍ ശില്‍പ ഷെട്ടിക്ക് ബന്ധമില്ലെന്നാണ് നേരത്തെ പോലീസ് പറഞ്ഞത്. ശില്‍പ ഷെട്ടിയുടെ ബന്ധം തെളിയിക്കുന്ന യാതൊന്നും ലഭിച്ചിട്ടില്ലെന്നും വ്യക്തമാക്കിയിരുന്നു. സാക്ഷികളാരും ശില്‍പ ഷെട്ടിയുടെ പേര് പറഞ്ഞിട്ടുമില്ല. കുന്ദ്രയ്‌ക്കെതിരെ മതിയായ തെളിവുകള്‍ ഉണ്ടെന്ന് പൊലീസ് അറിയിച്ചിരുന്നു.

അതേസമയം പുതിയ ചിത്രമായ ഹങ്കാമ 2വിനു ബുദ്ധിമുട്ട് ഉണ്ടാക്കരുതെന്ന് ആരാധകരോട് അഭ്യര്‍ഥിച്ച് നടി ശില്‍പ ഷെട്ടി. അശ്ലീല വിഡിയോ നിര്‍മാണവുമായി ബന്ധപ്പെട്ട് ശില്‍പ ഷെട്ടിയുടെ ഭര്‍ത്താവ് രാജ് കുന്ദ്രയെ അറസ്റ്റ് ചെയ്ത സംഭവത്തില്‍ നടിക്കു നേരെയും കടുത്ത പ്രതിഷേധം ഉടലെടുത്തിരുന്നു. ഈ സാഹചര്യത്തിലാണ് ഈ രോഷം സിനിമയ്ക്കു നേരെ പ്രകടിപ്പിക്കരുതെന്ന് ശില്‍പ ആവശ്യപ്പെടുന്നത്.

യോഗയുടെ പഠനങ്ങളിലും പരിശീലനങ്ങളിലുമാണ് ഞാന്‍ വിശ്വസിക്കുന്നത്, ജീവിതം നിലനില്‍ക്കുന്ന ഒരേയൊരിടം ഈ നിമിഷമാണ്. ഹംഗാമ 2ല്‍ ഒരു വലിയ സംഘത്തിന്റെ കഠിനാധ്വാനമുണ്ട്. ഒരു നല്ല ചിത്രം നിര്‍മിക്കാനായി എല്ലാവരും കഷ്ടപ്പെട്ടു. ആ സിനിമയ്ക്ക് ബുദ്ധിമുട്ടൊന്നും ഉണ്ടാവരുത്. നിങ്ങളുടെ മുഖത്ത് ഒരു പുഞ്ചിരി വരുത്തുവാന്‍ കുടുബങ്ങള്‍ക്കൊപ്പം ഹംഗാമ 2 കാണാനായി ഏവരോടും ഞാന്‍ അഭ്യര്‍ഥിക്കുന്നു. ഈ സിനിമയുടെ പിന്നില്‍ പ്രവര്‍ത്തിച്ചര്‍ക്കു വേണ്ടിയെങ്കിലും നിങ്ങള്‍ ഇത് കാണണം. നന്ദി എന്നാണ് ശില്‍പ ഷെട്ടി പറഞ്ഞത്.

മീസാന്‍, പരേഷ് റാവല്‍, ശില്‍പ ഷെട്ടി എന്നിവരെ പ്രധാന കഥാപാത്രങ്ങളാക്കി പ്രിയദര്‍ശന്‍ സംവിധാനം ചെയ്ത ചിത്രമാണ് ഹങ്കാമ 2. ജൂലൈ 23ന് ഹോട്ട്സ്റ്റാറിലൂടെ ചിത്രം റിലീസ് ചെയ്തു. ഈ സിനിമയുടെ ഭാവി സംബന്ധിച്ചും ആശങ്കയുണ്ട്.