തിരുവനന്തപുരം ബാലരാമപുരത്ത് പെട്രോള് ഒഴിച്ച് ആത്മഹത്യാ ശ്രമം.... ഗുരുതര പൊള്ളലേറ്റ് മെഡിക്കല് കോളേജ് ആശുപത്രിയില് ചികിത്സയിലായിരുന്ന യുവാവ് മരിച്ചു, യുവാവിന്റെ മരണത്തില് ബാലരാമപുരം പൊലീസ് അന്വേഷണം ഊര്ജ്ജിതമാക്കി
തിരുവനന്തപുരം ബാലരാമപുരത്ത് പെട്രോള് ഒഴിച്ച് ആത്മഹത്യാ ശ്രമത്തിനിടെ ഗുരുതര പൊള്ളലേറ്റ് മെഡിക്കല് കോളേജ് ആശുപത്രിയില് ചികിത്സയിലായിരുന്ന യുവാവ് മരിച്ചു.
തീയ്യന്നൂര്ക്കോണം അനി നിവാസില് വാടകയ്ക്ക് താമസിക്കുന്ന മുരളി ലീല ദമ്പതികളുടെ മകന് രാജേഷ് കുമാറാണ് (32) മരിച്ചത്. 85 ശതമാനം പൊള്ളലേറ്റതിനാല് സ്ഥിതി ഗുരുതരമായിരുന്നു. റസല്പുരം ബെവ്കോ ഗോഡൗണിലെ സി.ഐ.ടി.യു ചുമട്ട് തൊഴിലാളിയാണ്.
സഹപ്രവര്ത്തകയായ ബെവ്കോയിലെ വനിതാ തൊഴിലാളിയുമായി സാമ്പത്തിക ഇടപാടുകള് നടന്നതിനെ തുടര്ന്ന് യുവതിയുടെ വീട്ടിലെത്തി കഴിഞ്ഞ 27ന് രാജേഷ് കുമാര് പൊട്രോള് ഒഴിച്ച് ആത്മഹത്യക്ക് ശ്രമിക്കുകയായിരുന്നു. രണ്ടാഴ്ച് മുമ്പ് ഇതേ സാമ്പത്തിക പ്രശ്നത്തെച്ചൊല്ലി രാജേഷ് കുമാറും യുവതിയുടെ വീട്ടുകാരും തമ്മില് വഴക്ക് നടന്നിരുന്നു.
രാജേഷ് കുമാറിനെ മര്ദ്ദിച്ചതായി വീട്ടുകാര് പൊലീസിന് നല്കിയ മൊഴിയില് പറയുന്നു. ഇയാള് ഗുരുതരാവസ്ഥയില് ചികിത്സയിലായിരുന്നപ്പോഴും മജിസ്ട്രേറ്റ് മുമ്പാകെ മൊഴി നല്കിയിരുന്നു. ബെവ്കോയിലെ സി.ഐ.ടി.യു, ഐ.എന്.ടി.യു.സി തൊഴിലാളികളുടെ നേതൃത്വത്തില് വിലാപയാത്രയായാണ് മൃതദേഹം വീട്ടിലെത്തിച്ചത്.
വൈകിട്ട് അഞ്ചരയോടെ സംസ്കാരം നടന്നു. മാസങ്ങള്ക്ക് മുമ്പായിരുന്നു രാജേഷിന്റെ വിവാഹം. കൃഷ്ണപ്രിയയാണ് ഭാര്യ. സുജികുമാര് സഹോദരനാണ്.
ഗര്ഭിണിയായിരിക്കെ രാജേഷിന്റെ സഹോദരി ലക്ഷ്മി ഒന്പത് മാസം മുമ്പ് ചികിത്സാപ്പിഴവിനെ തുടര്ന്ന് മരണപ്പെട്ടിരുന്നു. യുവാവിന്റെ മരണത്തില് ബാലരാമപുരം പൊലീസ് അന്വേഷണം ഊര്ജ്ജിതമാക്കിയിട്ടുണ്ട്.
"
https://www.facebook.com/Malayalivartha
