ഇന്ത്യയെ ശരിക്കും ഞെട്ടിപ്പിച്ച സംഭവമായിരുന്നു പുല്‍വാമയിലെ ഭീകരാക്രമണം. ജമ്മുകാശ്മീരിലെ പുല്‍വാമയില്‍ 40 സി.ആര്‍.പി.എഫ് ജവാന്‍മാര്‍ വീരമൃത്യു വരിച്ച ഭീകരാക്രമണത്തിന്റെ ഗൂഢാലോചനയിലും ആസൂത്രണത്തിലും മുഖ്യപങ്കാളിയായിരുന്ന ജയ്‌ഷെ ഭീകരന്‍ മുഹമ്മദ് ഇസ്മയില്‍ അല്‍വി സുരക്ഷാ സേനയുമായുള്ള ഏറ്റുമുട്ടലില്‍ ഇന്നലെ രാവിലെ കൊല്ലപ്പെട്ടു. ജെയ്‌ഷെ മുഹമ്മദ് സ്ഥാപകന്‍ മൗലാന മസൂദ് അഷറിന്റെ അനന്തരവനാണ്. അബു സയ്ഫുള്ള, ഫൗജി ഭായ് തുടങ്ങിയ പേരുകളിലും അറിയപ്പെടുന്നു. പാകിസ്ഥാനിലെ ബഹാവല്‍പൂര്‍ കൊസാര്‍ കോളനി സ്വദേശിയാണ്.

പുല്‍വാമ ജില്ലയിലെ അവന്തിപൂരില്‍ ദച്ചിഗാം വനമേഖലയില്‍ രണ്ടുഭീകരര്‍ ഒളിച്ചിരിക്കുന്നതായി സേനയ്ക്ക് വിവരം ലഭിച്ചിരുന്നു. തിരിച്ചിലിനിടെ സേനയ്ക്കു നേരെ വെടിവച്ച ഭീകരര്‍ ഏറ്റുമുട്ടലില്‍ കൊല്ലപ്പെട്ടു. ഒപ്പമുണ്ടായിരുന്ന ഭീകരനെ തിരിച്ചറിഞ്ഞിട്ടില്ല. എ.കെ 47 തോക്കുകളും, എം.4 റൈഫിള്‍, ഗ്‌ളോക്ക് പിസ്റ്റള്‍ തുടങ്ങിയവയും പിടിച്ചെടുത്തു.

2017ല്‍ ജമ്മുകാശ്മീരില്‍ നുഴഞ്ഞു കയറിയ അല്‍വി പുല്‍വാമ, അനന്ത്‌നാഗ് ജില്ലകളില്‍ ഭീകരപ്രവര്‍ത്തനത്തിന് നേതൃത്വം നല്‍കുകയായിരുന്നു. പുല്‍വാമ സ്‌ഫോടനവുമായി ബന്ധപ്പെട്ട് എന്‍.ഐ.എ രജിസ്റ്റര്‍ ചെയ്ത കേസിലെ മുഖ്യപ്രതിയാണ്. 14 കേസുകളില്‍ പ്രതിയാണെന്ന് ജമ്മുകാശ്മീര്‍ പൊലീസ് പറഞ്ഞു.2019 ഫെബ്രുവരി 14ന് പുല്‍വാമയില്‍ ശ്രീനഗര്‍ജമ്മു ദേശീയ പാതയില്‍ സി.ആര്‍.പി.എഫ് വാഹനവ്യൂഹത്തിന് നേരെ സ്‌ഫോടക വസ്തുക്കള്‍ നിറച്ച വാഹനം ഓടിച്ചുകയറ്റിയ ചാവേര്‍ ഭീകരന്‍ ആദില്‍ അഹമ്മദ് ദാറിന് പരിശീലനം നല്‍കിയത് അല്‍വിയാണ്.

സ്‌ഫോടന വിദഗ്ദ്ധന്‍കൂടിയാണ്. അഫ്ഗാനില്‍ താലിബാനില്‍ നിന്ന് പരിശീലനം നേടി അവിടെ അഭ്യന്തര യുദ്ധങ്ങളില്‍ പങ്കെടുത്തു. വാഹനങ്ങളില്‍ സ്‌ഫോടനം നടത്താനുള്ള ബോംബ് (ഐ.ഇ.ഡി) നിര്‍മ്മിക്കുന്നതില്‍ വിദഗ്ദ്ധന്‍.

ജമ്മുകാശ്മീരില്‍ പ്രദേശവാസികളെ ഭീകരാക്രമണത്തിനായി റിക്രൂട്ട് ചെയ്ത് പരിശീലനം നല്‍കി. ജമ്മുകാശ്മീരില്‍ യുവാക്കളെ ഉപയോഗിച്ച് സേനയെ കല്ലെറിയുന്നത് ഇയാളുടെ ബുദ്ധിയാണ്. 2020 മാര്‍ച്ചില്‍ ബദ്ഗാമില്‍ സുരക്ഷാസേന വളഞ്ഞെങ്കിലും രക്ഷപ്പെട്ടു. പുല്‍വാമയില്‍ മറ്റൊരു ഭീകരനായ സമീര്‍ അഹമ്മദുമായി ചേര്‍ന്നാണ് പ്രവര്‍ത്തിച്ചിരുന്നത്. ദക്ഷിണ കാശ്മീരിലെ ജയ്‌ഷെ കമാന്‍ഡറായി സ്വയം അവരോധിച്ചു.

2019 ഫെബ്രുവരി 14ന് ജമ്മുകാശ്മീരിലെ പുല്‍വാമയില്‍ സി.ആര്‍.പി.എഫ് വാഹനവ്യൂഹത്തില്‍ അദില്‍ അഹമ്മദ് ദാര്‍ എന്ന ചാവേര്‍ ഭീകരന്‍ സ്‌ഫോടക വസ്തുക്കള്‍ നിറച്ച വാഹനം ഇടിച്ചു കയറ്റി40 ജവാന്മാര്‍ വീരമൃത്യു വരിച്ചു. ഭീകരന്‍ ദാറും കൊല്ലപ്പെട്ടു. (അന്ന് അയാള്‍ക്കൊപ്പം താമസിച്ചിരുന്ന ഭീകരനാണ് ഇസ്മല്‍ അല്‍വി)ജയ്‌ഷെ മുഹമ്മദ് ആക്രമണത്തിന്റെ ഉത്തരവാദിത്വം ഏറ്റു.

പാക് ഭീകരന്‍ ഖ്വാറി യാസിര്‍ ആയിരുന്നു പുല്‍വാമ ആക്രമണത്തിന്റെ ബുദ്ധി കേന്ദ്രം. ഖ്വാറി യാസിയെ കഴിഞ്ഞ വര്‍ഷം ജനുവരി 25ന് സൈന്യം വധിച്ചു. 2019 ഫെബ്രുവരി 26 ന് ഇന്ത്യ പുല്‍വാമ ആക്രമണത്തിന് പകരം വീട്ടി. പാകിസ്ഥാനിലെ ബലാകോട്ടിലെ ഭീകരകേന്ദ്രം ഇന്ത്യന്‍ പോര്‍വിമാനങ്ങള്‍ ആക്രമിച്ചു തരിപ്പണമാക്കി. അടുത്ത ദിവസം തിരിച്ചടിക്കാന്‍ ശ്രമിച്ച പാക് പോര്‍വിമാനങ്ങളെ ഇന്ത്യന്‍ വ്യോമ സേന തുരത്തി. പാകിസ്ഥാന്റെ എഫ് 16 പോര്‍ വിമാനം ഇന്ത്യ വെടിവച്ചിട്ടു. ഇന്ത്യയുടെ മിഗ് 21 വിമാനം പാക് മിസൈല്‍ ഏറ്റ് വീണു. പൈലറ്റ് വിംഗ് കമാന്‍ഡര്‍ അഭിനന്ദന്‍ വര്‍ദ്ധമാന്‍ പാക് തടങ്കലിലായി. രണ്ട് ദിവസത്തിന് ശേഷം മോചിപ്പിച്ചു. വീരചക്രം നല്‍കി രാജ്യം ആദരിച്ചു.