കോതമംഗലത്ത് യുവതിയെ വെടിവെച്ചുകൊന്ന് യുവാവ് സ്വയം വെടിവെച്ചുമരിച്ച സംഭവത്തില്‍ അന്വേഷണം പുരോഗമിക്കുന്നതിനിടെ രഖിലിനെ പറ്റിയുള്ള കൂടുതല്‍ വിവരങ്ങള്‍ പുറത്തായി. ജീവിതം തകര്‍ന്നെന്ന് രഖില്‍ തനിക്ക് മെസേജ് അയച്ചിരുന്നുവെന്ന് സഹോദരന്‍ രാഹുല്‍. മാനസ തള്ളിപ്പറഞ്ഞത് രാഖിലിനെ ഏറെ വിഷമത്തിലാക്കി. മറ്റൊരു പ്രണയം തകര്‍ന്ന ശേഷമാണ് രഖില്‍ മാനസയെ പരിചയപ്പെട്ടതെന്നും സഹോദരന്‍ പറഞ്ഞു.

പോലീസ് വിളിപ്പിച്ച ശേഷവും ബന്ധം വിടാന്‍ രഖില്‍ തയാറായിരുന്നിയെല്ലന്ന് രാഹുല്‍ പറഞ്ഞു. കുറേ ദിവസങ്ങളായി ആരോടും കൂടുതല്‍ സംസാരിക്കാറില്ലായിരുന്നുവെന്നും രാഹുല്‍ മാധ്യമങ്ങളോട് പറഞ്ഞു.

അതേസമയം കൊലപാതകത്തിന് തൊട്ടുമുമ്പുള്ള ദിവസങ്ങളില്‍ നാല് തവണ രഖില്‍ മാനസയുമായി സംസാരിച്ചിരുന്നുവെന്ന് സുഹൃത്ത് ആദിത്യന്‍ പറഞ്ഞു. രഖിലിന്റെ ബിസിനസ് പങ്കാളി കൂടിയാണ് ആദിത്യന്‍. ആദിത്യനുമൊത്ത് ഇന്റീരിയര്‍ ഡിസൈനിങ് ബിസിനസ് ആണ് നടത്തിയിരുന്നത്. അവളെ മറക്കാന്‍ കഴിയില്ലെന്ന് രഖില്‍ പറയുമായിരുന്നുവെന്നും ആദിത്യന്‍ വെളിപ്പെടുത്തി.

അതേസമയം വെടിവെപ്പ് നടന്ന മുറിക്കകത്ത് ചുമരില്‍ തറച്ചനിലയില്‍ ഒരു വെടിയുണ്ട ഫൊറന്‍സിക് സംഘം കണ്ടെത്തി. ഇതോടെ, മാനസയ്ക്കുനേരെ പ്രതി രഖില്‍ വെടിയുതിര്‍ത്തത് മൂന്നുതവണയെന്നു വ്യക്തമായി. രണ്ടുവെടിയുണ്ടകള്‍ മാനസയുടെ ശരീരത്തില്‍ പതിച്ചിരുന്നു. ഒന്ന് ഉന്നംതെറ്റി പതിച്ചതാകാമെന്നുകരുതുന്നു. ഇന്‍ക്വസ്റ്റ് നടപടികള്‍ക്കിടയില്‍ രഖിലിന്റെ പോക്കറ്റില്‍നിന്ന് അഞ്ചു വെടിയുണ്ടകള്‍കൂടി കണ്ടെടുത്തു.

13 ബുള്ളറ്റ് ലോഡ് ചെയ്യാവുന്ന തോക്കായിരുന്നു ഇത്. 7.62 എം.എം. പിസ്റ്റളാണ് ഇതിനുപയോഗിച്ചത്. ഒരു ബുള്ളറ്റ് സ്വയം ജീവനൊടുക്കാനും ഉപയോഗിച്ചു. തൊട്ടടുത്തുനിന്നാണ് രഖില്‍ നിറയൊഴിച്ചതെന്നും വ്യക്തമായി. തോക്കില്‍ ഏഴ് ഉണ്ടകള്‍ നിറച്ചിരുന്നു. മൂന്നെണ്ണം തോക്കില്‍ അവശേഷിച്ചിരുന്നു. വെള്ളിയാഴ്ച രാത്രിതന്നെ പോലീസ് തോക്ക് കസ്റ്റഡിയിലെടുത്തിരുന്നു. ഇത് വിദഗ്ധപരിശോധനയ്ക്ക് ബെംഗളൂരുവിലേക്ക് അയക്കും.

കൂടുതല്‍ അന്വേഷണത്തിന് റൂറല്‍ എസ്.പി. കെ. കാര്‍ത്തിക്കിന്റെ നേതൃത്വത്തില്‍ പ്രത്യേക അന്വേഷണസംഘം രൂപവത്കരിച്ചു. കോതമംഗലം എസ്.ഐ. മാര്‍ട്ടിന്റെ നേതൃത്വത്തിലുള്ള സംഘം ശനിയാഴ്ച പുലര്‍ച്ചയോടെ കണ്ണൂരിലെത്തി. മേലൂരിലെ വീട്ടിലെത്തി ബന്ധുക്കളുടെ മൊഴിയെടുത്തു. സംഭവത്തിനു ദൃക്‌സാക്ഷികളായ സഹപാഠികളുടെ മൊഴി വീണ്ടും രേഖപ്പെടുത്തും. മാനസയുടെ മൊബൈല്‍ ഫോണ്‍ പരിശോധിച്ചുവരുകയാണ്.

കണ്ണൂരിലെത്തിയ സംഘം കളക്ടറേറ്റില്‍നിന്ന് തോക്കിന്റെ ലൈസന്‍സ് സംബന്ധിച്ച വിവരങ്ങള്‍ ശേഖരിക്കും. മാനസയുമായുള്ള പ്രണയബന്ധം തകര്‍ന്നതിലുള്ള മനോവിഷമമാണ് രഖിലിനെ ക്രൂരകൃത്യത്തിന് പ്രേരിപ്പിച്ചതെന്നാണ് പോലീസിനു ലഭിച്ചിരിക്കുന്ന ആദ്യ മൊഴികള്‍.

കൊലപാതകത്തിനുമുന്പ് രഖില്‍ എട്ടുദിവസത്തോളം കേരളത്തിനുപുറത്ത് തങ്ങിയതായി വിവരമുണ്ട്. ഇതിനാല്‍ തോക്ക് തേടിയുള്ള അന്വേഷണം സംസ്ഥാനത്തിനുപുറത്തേക്കും വ്യാപിപ്പിക്കും. രാഖിലിന്റെ സമീപകാല യാത്രകളും ഫോണ്‍രേഖകളും സൈബര്‍ സെല്ലിന്റെ സഹായത്തോടെ പരിശോധിച്ചുവരുന്നു.

ഒരുമാസത്തോളമായി രാഖില്‍ നെല്ലിക്കുഴിയിലാണ് തങ്ങിയിരുന്നത്. കൊലപാതകവുമായി നേരിട്ടുബന്ധമുള്ള മറ്റാരുമില്ലെന്നാണ് ഇതുവരെ പോലീസിനു ലഭിക്കുന്ന വിവരം.