വിധി തോല്‍പ്പിച്ചു..... മസ്തിഷ്‌കമരണം സ്ഥിരീകരിച്ച മണ്ണന്തല സ്വദേശി ജെറിയുടെ വൃക്ക സ്വീകരിച്ച നെടുങ്കാട് പള്ളിത്താനം സ്വദേശി ശസ്ത്രക്രിയയ്ക്കു ശേഷമുണ്ടായ ഹൃദയസ്തംഭനം മൂലം മരിച്ചു.

ജെറി വര്‍ഗീസിന്റെ വൃക്കയുമായി ജീവിക്കാതെ ആദര്‍ശ് മടങ്ങി. നെടുങ്കാട് പള്ളിത്താനം സ്വദേശി ആദര്‍ശ് ജി.നായരാണ്(31) ശസ്ത്രക്രിയയ്ക്കു പിന്നാലെ മരിച്ചത്. ശനിയാഴ്ച രാത്രി പത്തിനായിരുന്നു മെഡിക്കല്‍ കോളേജില്‍ ആദര്‍ശിന്റെ ശസ്ത്രക്രിയ നടന്നത്.

ഞായറാഴ്ച രാവിലെ ഐ.സി.യു.വിലേക്കു മാറ്റി. 10.30ഓടെ ഹൃദയസ്തംഭനം ഉണ്ടാവുകയായിരുന്നു. നാലു വര്‍ഷത്തോളമായി വൃക്കരോഗം മൂലം ബുദ്ധിമുട്ടുകയായിരുന്ന ആദര്‍ശ്, ജീവിതത്തിലേക്കു മടങ്ങിവരുമെന്ന പ്രതീക്ഷയിലായിരുന്നു കുടുംബം.

ശസ്ത്രക്രിയ വിജയകരമാണെന്ന് ഡോക്ടര്‍മാര്‍ വീട്ടുകാരെ അറിയിച്ചിരുന്നു. ശസ്ത്രക്രിയയ്ക്കു ശേഷം ആദര്‍ശ് ഡോക്ടര്‍മാരോടു സംസാരിക്കുകയും ചെയ്തിരുന്നു. എന്നാല്‍, അപ്രതീക്ഷിതമായുണ്ടായ ഹൃദയസ്തംഭനം ജീവന്‍ കവര്‍ന്നെടുക്കുകയായിരുന്നു. ഗള്‍ഫില്‍ ജോലിചെയ്യുന്നതിനിടയിലാണ് ആദര്‍ശിന് വൃക്കരോഗം സ്ഥിരീകരിക്കുന്നത്. ഒരുപാടു പ്രതീക്ഷകളുമായി ആരംഭിച്ച പ്രവാസജീവിതം ഇതോടെ അവസാനിച്ചു.

ഒന്നര വര്‍ഷം മാത്രമാണ് ഗള്‍ഫില്‍ ജോലിചെയ്യാനായത്. തിരികെ നാട്ടിലെത്തിയ ശേഷം മരുന്നുകളുടെ ലോകത്തായിരുന്നു ആദര്‍ശ്. ഇതിനിടെ ഡയാലിസിസും ആരംഭിച്ചു. സര്‍ക്കാരിന്റെ അവയവദാന പദ്ധതിയായ മൃതസഞ്ജീവനിയില്‍ പേരുചേര്‍ത്തിരുന്നു. ആദര്‍ശടക്കം മൂന്നുപേര്‍ക്ക് ജെറിയുടെ വൃക്ക ചേരുമോയെന്നു പരിശോധിച്ചിരുന്നെങ്കിലും ആദര്‍ശിനായിരുന്നു ചേര്‍ന്നത്.

കൂട്ടുകാരുടെയും ബന്ധുക്കളുടെയും സഹായത്തോടെയായിരുന്നു ചികിത്സ മുടങ്ങാതെ നടന്നത്. അച്ഛന്‍ ഗോപിനാഥന്‍ നായരുടെയും അമ്മ ഉഷയുടെയും ഏക മകനായിരുന്നു ആദര്‍ശ്.

ജൂലായ് 27ന് മണ്ണന്തലയിലുണ്ടായ സ്‌കൂട്ടര്‍ അപകടത്തെ തുടര്‍ന്ന് ചികിത്സയിലിരിക്കുമ്പോഴാണ് 31കാരനായ ജെറിക്ക് മസ്തിഷ്‌കരമരണം സ്ഥിരീകരിച്ചത്. തുടര്‍ന്ന് വൃക്കകളും കരളും നേത്രപടലങ്ങളും അഞ്ചുപേര്‍ക്കായി നല്‍കി.