സര്‍ക്കാര്‍ നയങ്ങള്‍ മന്ത്രിമാര്‍ വാര്‍ത്താ സമ്മേളനം നടത്തി ജനങ്ങളെ അറിയിക്കുന്നതിന് മുമ്പ് മുഖ്യമന്ത്രിയുടെ ഓഫീസുമായി കൂടിയാലോചിക്കണമെന്ന് സി പി എം മന്ത്രിമാര്‍ക്ക് നിര്‍ദ്ദേശം നല്‍കിയേക്കും. ആരോഗ്യ മന്ത്രി വീണാ ജോര്‍ജിന് പത്രസമ്മേളനത്തിലെ പിഴവ് ശ്രദ്ധയില്‍ പെട്ടതിനെ തുടര്‍ന്നാണ് പാര്‍ട്ടി ഇടപെട്ടത്.

മന്ത്രിമാര്‍ പത്രസമ്മേളനം നടത്തുന്ന രീതിയോട് മുഖ്യമന്ത്രിക്ക് താത്പര്യമില്ല. എല്ലാം മുഖ്യമന്ത്രിയിലൂടെ നീങ്ങിയാല്‍ മതിയെന്നാണ് പിണറായി ആഗ്രഹിക്കുന്നത്. മന്ത്രിമാര്‍ സര്‍ക്കാര്‍ നയം പ്രഖ്യാപിക്കുന്ന പതിവ് പിണറായി മന്ത്രിസഭയില്‍ പതിവില്ല. മന്ത്രിമാര്‍ക്ക് എടുത്തു പറയത്തക്ക പ്രാധാന്യം മുഖ്യമന്ത്രി നല്‍കാറുമില്ല. മുഖ്യമന്ത്രിയുടെ അനിഷ്ടം മനസിലാക്കി പല മന്ത്രിമാരും ഇപ്പോള്‍ പത്ര സമ്മേളനങ്ങള്‍ നടത്താറില്ല.

മന്ത്രി വീണാ ജോര്‍ജാണ് ഒടുവില്‍ അബദ്ധത്തില്‍ പെട്ടത്. കോവിഡുമായി ബന്ധപ്പെട്ട് മുന്‍മന്ത്രി കെ.കെ. ഷൈലജക്ക് നല്‍കിയ പരോക്ഷ മറുപടിയാണ് വീണാ ജോര്‍ജിനെ ബുദ്ധിമുട്ടിലാക്കിയത്. സംഗതി വിവാദമായതോടെ മന്ത്രിയുടെ അഭിപ്രായ പ്രകടനങ്ങളോട് മുഖ്യമന്ത്രി പിണറായി വിജയന് അതൃപ്തി തോന്നി. അദ്ദേഹത്തിന്റെ ഓഫീസ് അക്കാര്യം മന്ത്രിയെ അറിയിച്ചതായാണ് വിവരം.

'ഓണം എത്താറായി, ആള്‍ക്കൂട്ടം ഉണ്ടാകാതിരിക്കാന്‍ പരമാവധി ശ്രമിക്കണം, ആഘോഷങ്ങളില്‍നിന്ന് അകന്നു നില്‍ക്കണം. ചടങ്ങുകള്‍ ഒഴിവാക്കണം, ബന്ധുവീടുകള്‍ സന്ദര്‍ശിക്കുന്നത് ഒഴിവാക്കണം. ഓണമായാലും ബക്രീദായാലും ആള്‍ക്കൂട്ടം രോഗവ്യാപനം വര്‍ധിപ്പിക്കും എന്നാണ് മന്ത്രി പത്തനംതിട്ടയില്‍ വിശദീകരിച്ചത്. ഇതില്‍ പ്രത്യക്ഷത്തില്‍ യാതൊരു തെറ്റുമില്ല. മുന്‍മന്ത്രി കെ.കെ. ഷൈലജ പലവട്ടം ഇത്തരം കാര്യങ്ങള്‍ പറഞ്ഞിട്ടുണ്ട്.



എന്നാല്‍ മന്ത്രിക്ക് സംഭവിച്ച അബദ്ധം ഇതൊന്നുമായിരുന്നില്ല. മന്ത്രിയുടെ മതവുമായി ചിലര്‍ ഇതിനെ കൂട്ടിവായിച്ചു. സര്‍ക്കാരാകട്ടെ ലോക് ഡൗണില്‍ ഇളവ് നല്‍കി എല്ലാം തുറന്നു കൊടുക്കാനുള്ള പദ്ധതി ആസൂത്രണം ചെയ്യുകയാണ്. അതിനിടയിലാണ് മന്ത്രി ഇപ്രകാരം പ്രതികരിച്ചത്. ഒരു പക്ഷേ സര്‍ക്കാരിന്റെ പ്ലാന്‍ മന്ത്രിക്ക് അറിയില്ലായിരിക്കാം. പൂര്‍ണമായ ശ്രദ്ധയില്ലെങ്കില്‍ കോവിഡ് കത്തി പടരും. അതാണ് മന്ത്രി ഉദ്ദേശിച്ചത്. എന്നാല്‍ ദുഷ്ടലാക്കുള്ളവര്‍ ഇതിനെ മറ്റൊരു തരത്തില്‍ വ്യാഖ്യാനിച്ചു.

മന്ത്രിയുടെ പ്രസ്താവന പിടിഐയും റിപ്പോര്‍ട്ട് ചെയ്തിരുന്നു. കൊവിഡ് വ്യാപനത്തിന്റെ പശ്ചാത്തലത്തില്‍ കേന്ദ്ര ആരോഗ്യസംഘത്തിന്റെ പരിശോധനയ്ക്കിടയില്‍ മന്ത്രി നല്‍കിയ മുന്നറിയിപ്പ് വലിയ വാര്‍ത്തയായി തീര്‍ന്നു. സര്‍ക്കാര്‍ നിയന്ത്രണങ്ങളില്‍ ഇളവ് ആലോചിക്കുന്നതിനിടയിലാണ് മന്ത്രിയുടെ വിശദീകരണം വന്നത്. കേന്ദ്രമാകട്ടെ ഓണത്തില്‍ പോലും ഇളവ് നല്‍കരുതെന്ന അഭിപ്രായക്കാരാണ്. രാജ്യത്ത് കോവിഡ് ഉയര്‍ന്നു നില്‍ക്കുന്ന സംസ്ഥാനം എന്ന നിലയില്‍ കേരളത്തിന്റെ സ്ഥിതി അതീവ ഗൗരവമാണെന്നാണ് കേന്ദ്ര സര്‍ക്കാരിന്റെ അഭിപ്രായം.

മന്ത്രിയുടെ പ്രസ്താവന അനാവശ്യമാണെന്നായിരുന്നു മുഖ്യമന്ത്രിയുടെ ഓഫീസില്‍ നിന്ന് വിമര്‍ശനം വന്നത്. ഇത് മുഖ്യമന്ത്രിയില്‍ നിന്നു തന്നെ ഉണ്ടായതെന്നാണ് കരുതുന്നത്. തുടര്‍ന്നായിരുന്നു പിടിഐയ്‌ക്കെതിരേ മന്ത്രി രംഗത്തെത്തിയത്. പിടിഐക്ക് പിഴവുപറ്റിയെന്നും തിരുത്തുമെന്ന് പ്രതീക്ഷിക്കുന്നുവെന്നും മന്ത്രി ട്വീറ്റ് ചെയ്തു.താന്‍ പത്തനംതിട്ടയില്‍ പറഞ്ഞത് ഇതാണ് എന്ന് വീഡിയോ ലിങ്ക് ട്വിറ്റില്‍ ചേര്‍ക്കുകയും ചെയ്തു. അത് 'മനോരമ' ടിവി ചാനലില്‍ വന്ന വാര്‍ത്തയായിരുന്നു. ഇത് പുതിയ വിവാദമായി. ഒരു സ്വകാര്യ ചാനലിന് മന്ത്രി ആധികാരികതയും ഔദ്യോഗികതയും നല്കിയെന്നാണ് മുഖ്യമന്ത്രിയുടെ ഓഫീസിന്റെ വിമര്‍ശനമെന്ന് അറിയുന്നു. ഈ സാഹചര്യത്തിലാണ് സി പി എം ഇടപെടുന്നത്. വീണാ ജോര്‍ജിനെ മാത്രം ബലിയാടാക്കാതെ എല്ലാവര്‍ക്കും മുന്നറിയിപ്പ് നല്‍കാനാണ് പാര്‍ട്ടിയുടെ ശ്രമം.

ഓണം, ബക്രീദ് പരാമര്‍ശങ്ങളും പരിപാടികളിലും ബന്ധുവീടുകളിലും പോകരുതെന്നുമുള്ള നിര്‍ദേശങ്ങളും സര്‍ക്കാരിന്റെ പദ്ധതികള്‍ക്ക് വിരുദ്ധമായി എന്നാണ് വിലയിരുത്തല്‍. മുമ്പ് ആരോഗ്യമന്ത്രിയായിരുന്ന ഷൈലജയെ ഇത്തരത്തില്‍ മുഖ്യമന്ത്രിയും പാര്‍ട്ടിയും തിരുത്തിയിട്ടുണ്ട്. ഇതേ വിധിയാണ് വീണാ ജോര്‍ജിനും സംഭവിച്ചിരിക്കുന്നത്. എന്നാല്‍ വീണാ ജോര്‍ജ് ഇത്തരം അബദ്ധങ്ങള്‍ സംഭവിക്കാതിരിക്കാന്‍ സദാ ജാഗ്രതയിലായിരുന്നു. എന്നാല്‍ ചാനലുകാരുടെ ഇളക്കലില്‍ മന്ത്രി വീണെന്നാണ് കേരളം കരുതുന്നത്.