മംഗലപുരത്ത് വ്യാപാരിയെ ആക്രമിച്ച് സ്വര്‍ണ്ണം കവര്‍ന്ന കേസിലെ മുഖ്യ ആസൂത്രകനും കൂട്ടാളികളും പിടിയില്‍. പള്ളിപ്പുറത്ത് ടെക്‌നോ സിറ്റിക്ക് സമീപം ദേശീയപാതയില്‍ കഴിഞ്ഞ ഏപ്രില്‍ 9 ന് രാത്രിയാണ് സ്വര്‍ണ്ണവ്യാപാരിയുടെ കാര്‍ തടഞ്ഞ് വെട്ടി പരുക്കേല്‍പ്പിച്ച് സ്വര്‍ണ്ണം കവര്‍ച്ച ചെയ്തത്. ചെന്നൈയില്‍ താമസമാക്കിയ ബാലരാമപുരം സ്വദേശി സന്തോഷും കൂട്ടാളികളുമാണ് പിടിയിലായത്. സന്തോഷിനെ പിടികൂടിയതോടെ കവര്‍ച്ചാ സംഘത്തിലെ പിടികിട്ടാനുള്ള മറ്റുള്ളവരെ കുറിച്ചുള്ള വിവരങ്ങള്‍ അന്വേഷണ സംഘത്തിന് ലഭിച്ചിട്ടുണ്ട്.

കേസില്‍ 15 പേരെ ഇതുവരെ അറസ്റ്റ് ചെയ്തിരുന്നു. കേസിലെ മുഖ്യ ആസൂത്രകനായ ചെന്നൈയില്‍ താമസിക്കുന്ന ബാലരാമപുരം സ്വദേശി സന്തോഷ് ക്ലമന്റിനെ കഴിഞ്ഞ ദിവസമാണ് അറസ്റ്റ് ചെയ്തത്.
കന്യാകുമാരി പളുകല്‍ സ്വദേശി സതീഷ്‌കുമാര്‍ പാലക്കാട് ആലത്തൂര്‍ സ്വദേശി അജീഷ്,തുടങ്ങിയവരേയും അന്വേഷണ സംഘം അറസ്റ്റ് ചെയ്തു. സ്വര്‍ണ്ണവ്യാപാരിയായ സമ്ബത്തിന്റെ നെയ്യാറ്റിന്‍കരയിലെ ജുവലറി ജീവനക്കാരനായ അജീഷ് മറ്റ് ജുവലറികളിലേക്ക് സമ്ബത്ത് സ്വര്‍ണ്ണം കൊണ്ടു പോകുന്നതിനൊപ്പം , പണവും കൊണ്ട് പോകാറുണ്ടെന്ന വിവരം സുഹൃത്തും ലോറിഡ്രൈവറുമായ സതീഷ്‌കുമാറിനോട് പറയുകയായിരുന്നു.
സതീഷാണ് ചെന്നൈയില്‍ താമസമാക്കിയ റിയല്‍ എസ്‌റ്റേറ്റ്കാരനായ സന്തോഷിനോട് വിവരം പറഞ്ഞ്. തുടര്‍ന്ന് സന്തോഷ് ക്ലമനന്റ് കവര്‍ച്ചക്കുള്ള പദ്ധതി തയ്യാറാക്കി. കഴക്കൂട്ടത്തെ കൊട്ടേഷന്‍ സംഘത്തെ കൊണ്ട് കവര്‍ച്ച നടപ്പാക്കി.
കാറുകളിലും ബൈക്കുകളിലുമായി എത്തിയ സംഘം സമ്ബത്തിന്റെ വാഹനം തടഞ്ഞ് വെട്ടിപരിക്കേല്‍പ്പിച്ച് കാര്‍ ഉള്‍പ്പെടെ തട്ടിയെടുക്കാനായിരുന്നു പദ്ധതി ഇട്ടതെങ്കിലും , വാഹനം സ്റ്റാര്‍ട്ട് ആകാത്തതിനാല്‍ സ്വര്‍ണ്ണം അടങ്ങിയ ബാഗ് തട്ടിയെടുത്ത് ,സമ്ബത്തിനെ വെട്ടി പരുക്കേല്‍പ്പിച്ച് വാഹനത്തിന്റെ ഡ്രൈവറെയും ,സമ്ബത്തിന്റെ ബന്ധുവിനേയും മര്‍ദ്ദിച്ച് വാഹനങ്ങളില്‍ കയറ്റികൊണ്ട് പോയി പോത്തന്‍കോടിന് സമീപം ഉപേക്ഷിക്കുകയായിരുന്നു. ഇതോടെ ഈ കേസില്‍ മൊത്തം പതിനെട്ടു പേര്‍ അറസ്റ്റിലായി. കവര്‍ച്ചയുമായി ബന്ധപ്പെട്ട് നാല്‍പ്പത് പവനോളം സ്വര്‍ണ്ണവും, ആറ് കാറുകളും രണ്ട് ഇരുചക്ര വാഹനവും പൊലീസ് കസ്റ്റഡിയില്‍ എടുത്തിട്ടുണ്ട്.