തനി നിറം പുറത്ത്... അമേരിക്ക അഫ്ഗാനിസ്ഥാനില് നിന്നും പിന്മാറിയതോടെ താലിബാന് അഴിഞ്ഞാടുന്നു; സ്വന്തമായി വ്യോമസേനയുള്ള ഭീകരസംഘടനയായി താലിബാന് മാറി; ലോകത്തെ ഞെട്ടിച്ച് ഭീകരരുടെ കൊലപാതക ഘോഷയാത്ര
അമേരിക്കയുടെ അവസാന പട്ടാളക്കാരനും പിന്വാങ്ങിയതോടെ താലിബാന് ഭികരര് അഫ്ഗാനിസ്ഥാനില് വിജയം ആഘോഷിക്കുകയാണ്. ലോകം ഭയന്നത് ഒടുവില് സംഭവിച്ചു. അഫ്ഗാനില് അമേരിക്കയുടെ വീഴ്ചകളുടെ ഫലമായി സ്വന്തമായി വ്യോമസേനയുള്ള ഭീകരസംഘടനയായി താലിബാന് മാറിയിരിക്കുകയാണ്.
അമേരിക്ക അഫ്ഗാനില് നിന്നും പിന്മാറി മണിക്കൂറുകള്ക്കകം ഒരു യുഎസ് ബ്ലാക്ക് ഹോക്ക് ഹെലികോപ്റ്റര് ഭീകരര് പറത്തുന്ന വീഡിയോ പുറത്ത് വന്നു. ഹെലികോപ്ടറില് തൂങ്ങിക്കിടക്കുന്ന ശരീരവുമുണ്ടായിരുന്നു. തങ്ങളുടെ ക്രൂരതയ്ക്ക് ഒരു കുറവും വന്നിട്ടില്ലെന്ന സന്ദേശമാണ് ഇതിലൂടെ താലിബാന് നല്കിയിരിക്കുന്നത്. കാണ്ഡഹാര് പ്രവിശ്യയില് നിന്നുള്ളതാണ് ഈ വീഡിയോ. നിരവധി മാദ്ധ്യമപ്രവര്ത്തകര് ഈ വീഡിയോ ട്വിറ്ററില് പങ്കിട്ടു.
ഹെലികോപ്റ്ററില് ബന്ധിച്ചിരിക്കുന്ന കയറില് ഒരാളുടെ ശരീരം കെട്ടിത്തൂക്കിയതായി കാണാം. എന്നാല് ഇയാള്ക്ക് ജീവനുണ്ടോ എന്ന കാര്യത്തില് വ്യക്തതയില്ല. എന്നാല് താലിബാന് ഭീകരര് തങ്ങള് കൊലപ്പെടുത്തിയ ഒരാളുടെ ശരീരം കെട്ടിയിട്ടതായാണ് അവിടെ നിന്നും പുറത്ത് വരുന്ന റിപ്പോര്ട്ടുകള് സൂചിപ്പിക്കുന്നത്.
താലിബാനുമായി ബന്ധമുണ്ടെന്ന് അവകാശപ്പെടുന്ന ഒരു ട്വിറ്റര് അക്കൗണ്ടില് ഇസ്ലാമിക് എമിറേറ്റിന്റെ വ്യോമസേനയുടെ ഹെലികോപ്റ്ററുകള് കാണ്ഡഹാര് നഗരത്തിന് മുകളിലൂടെ പറന്ന് നഗരത്തില് പട്രോളിംഗ് നടത്തുന്നു എന്നാണ് ഈ വീഡിയോയെ വിശേഷിപ്പിച്ചിരിക്കുന്നത്.
അഫ്ഗാനില് നിന്നും അമേരിക്കന് സേന മടങ്ങുമ്പോള് ഇതുപോലെ കുറഞ്ഞത് ഏഴ് ബ്ലാക്ക് ഹോക്ക് ഹെലികോപ്റ്ററുകള് ഭീകരരുടെ കൈവശം ലഭിച്ചു എന്നാണ് സൂചന. എല്ലാ പ്രതിരോധ ഉപകരണങ്ങളും അഫ്ഗാനിസ്ഥാനില് ഉപേക്ഷിച്ചാണ് അമേരിക്ക മടങ്ങിയത്. എന്നാല് ഇവയില് ചിലതെല്ലാം പ്രവര്ത്തനരഹിതമാക്കിയിട്ടുണ്ടെന്ന് റിപ്പോര്ട്ടുകളിലുണ്ടായിരുന്നു. യുഎസ് സൈനികര് അവസാന വിമാനം കയറുന്നതിനുമുമ്പ് ഉപേക്ഷിച്ച 73 വിമാനങ്ങളും മറ്റ് ആയുധ സംവിധാനങ്ങളും, ഹൈടെക് പ്രതിരോധ ഉപകരണങ്ങളും പ്രവര്ത്തനരഹിതമാക്കിയിരുന്നു.
അതേസമയം ഇരുപതു വര്ഷം നീണ്ട അഫ്ഗാന് യുദ്ധം അവസാനിപ്പിച്ച് അമേരിക്കന് സേന ഇന്നലെ പൂര്ണമായി പിന്മാറിയതോടെ താലിബാന് പോരാളികള് കാബൂള് വിമാനത്താവളത്തില് വിജയം പ്രഖ്യാപിച്ചു.
അമേരിക്കന് സേനയുമായുള്ള അവസാനത്തെ വിമാനം ചൊവ്വാഴ്ച രാത്രി കാബൂള് വിമാനത്താവളം വിട്ടു. യു. എസ് വ്യോമസേനയുടെ 82ാം ഡിവിഷന്റെ കമാന്ഡര് മേജര് ജനറല് ക്രിസ് ഡോണാഹ്യൂ ആണ് അഫ്ഗാന് മണ്ണില് നിന്ന് അവസാനമായി ഗ്ലോബ് മാസ്റ്റര് വിമാനത്തില് കയറിയത്. അഫ്ഗാനിലെ അമേരിക്കന് അംബാസഡര് റോസ് വില്സണും ഇതേ വിമാനത്തില് മടങ്ങി.
അമേരിക്കയുടെ ഏറ്റവും നീണ്ട യുദ്ധത്തിനാണ് ഇന്നലെ ഔദ്യോഗികമായി വിരാമമായത്. 2400ലേറെ അമേരിക്കന് സൈനികര് ഈ യുദ്ധത്തില് അഫ്ഗാനിസ്ഥാനില് മരിച്ചു വീണു. അമേരിക്കന് വിമാനം പറന്നുയര്ന്നപ്പോള് താലിബാന് പോരാളികള് വെടിമുഴക്കിയാണ് അത് ആഘോഷിച്ചത്. തുടര്ന്ന് കാബൂള് വിമാനത്താവളത്തിന്റെ പൂര്ണ നിയന്ത്രണം താലിബാന് ഏറ്റെടുത്തു. അമേരിക്കന് യൂണിഫോം ധരിച്ച് അമേരിക്കന് ആയുധങ്ങളുമായാണ് താലിബാന് പോരാളികള് വിമാനത്താവളത്തിന്റെ ഓഫീസുകളും ഗ്രൗണ്ടും ഹാങ്ങറുകളും നിയന്ത്രിക്കുന്നത്.
അഫ്ഗാന് സമയം രാത്രി 9ന് അവസാന അമേരിക്കന് സൈനികനും കാബൂള് വിമാനത്താവളം വിടുകയും നമ്മുടെ രാജ്യം സ്വാതന്ത്ര്യം നേടുകയും ചെയ്തു എന്നാണ് താലിബാന് വക്താവ് സബിഹുള്ള മുജാഹിദ് ട്വിറ്ററില് കുറിച്ചത്.
https://www.facebook.com/Malayalivartha
