കോളേജുകള്‍ തുറക്കുമ്പോള്‍.... സംസ്ഥാനത്തെ ഉന്നതവിദ്യാഭ്യാസ സ്ഥാപനങ്ങള്‍ ഒക്ടോബര്‍ നാലിന് തുറക്കാന്‍ തീരുമാനിച്ചതോടെ ക്ലാസ് നടത്തല്‍ ഉള്‍പ്പെടെയുള്ളവ സംബന്ധിച്ച് സര്‍ക്കാര്‍ ആലോചനയില്‍...
കോളേജുകള്‍ തുറക്കുമ്പോള്‍.... സംസ്ഥാനത്തെ ഉന്നതവിദ്യാഭ്യാസ സ്ഥാപനങ്ങള്‍ ഒക്ടോബര്‍ നാലിന് തുറക്കാന്‍ തീരുമാനിച്ചതോടെ ക്ലാസ് നടത്തല്‍ ഉള്‍പ്പെടെയുള്ളവ സംബന്ധിച്ച് സര്‍ക്കാര്‍ ആലോചനകള്‍ തുടങ്ങി.
ബിരുദ, ബിരുദാനന്തര ബിരുദ വിഭാഗത്തിലെ അവസാനവര്‍ഷ ക്ലാസുകളാണ് തുടങ്ങാന്‍ ആലോചിക്കുന്നത്. അവസാനത്തെ രണ്ടു സെമസ്റ്ററുകളിലെ വിദ്യാര്‍ഥികള്‍ക്ക് കോളേജുകളില്‍ എത്താം.
കൂടുതല്‍ വിദ്യാര്‍ഥികളുള്ള ബാച്ചുകളെ രണ്ടാക്കി, ഷിഫ്റ്റ് അടിസ്ഥാനത്തില്‍ ക്ലാസുകള്‍ നടത്തും. വെള്ളിയാഴ്ച ചേരുന്ന പ്രിന്‍സിപ്പല്‍മാരുടെ യോഗത്തിനുശേഷമാകും അന്തിമതീരുമാനം എടുക്കുക.
അറുപതോളം വിദ്യാര്‍ഥികളുള്ള ബാച്ചുകളെ രണ്ടാക്കി ഒന്നിടവിട്ട ദിവസങ്ങളില്‍ ക്ലാസുകള്‍ നടത്തണോ അതോ എല്ലാദിവസവും രണ്ടുസമയങ്ങളിലായി നടത്തണോയെന്ന കാര്യം തീരുമാനിക്കേണ്ടതുണ്ട്. രണ്ടു സമയങ്ങളിലായാണ് ഷിഫ്റ്റുകളെങ്കില്‍ അതിനനുസരിച്ച് അധ്യാപകരെ നിയോഗിക്കുന്നതിലും തീരുമാനമെടുക്കേണ്ടതുണ്ട്.
ഒരു ഡോസ് വാക്‌സിനെങ്കിലും എടുത്ത വിദ്യാര്‍ഥികള്‍ക്കും അധ്യാപകര്‍ക്കും ജീവനക്കാര്‍ക്കുമാണ് കോളേജുകളില്‍ എത്താനാവുക. കോളേജുതലത്തില്‍ തന്നെ വാക്‌സിന്‍ ലഭ്യമാക്കുന്ന കാര്യം ഉന്നതവിദ്യാഭ്യാസ വകുപ്പിന്റെ പരിഗണനയിലാണ്.
കോളേജ് തുറന്നാലും ക്ലാസുകളില്‍ ഉള്‍പ്പെടെ സാമൂഹിക അകലം പാലിക്കുന്നത് നിര്‍ബന്ധമാക്കും. ഇതിനായി ബോധവത്കരണപരിപാടികള്‍ സംഘടിപ്പിക്കും. പോളിടെക്നിക്, എന്‍ജിനിയറിങ് കോളേജുകള്‍, മെഡിക്കല്‍ കോളേജുകള്‍ ഉള്‍പ്പെടെയുള്ള മെഡിക്കല്‍ വിദ്യാഭ്യാസ സ്ഥാപനങ്ങള്‍, ആര്‍ട്സ് ആന്‍ഡ് സയന്‍സ് കോളേജുകള്‍ എന്നിവിടങ്ങളിലെ അവസാനവര്‍ഷ വിദ്യാര്‍ഥികള്‍ക്കായി ഒക്ടോബര്‍ നാലുമുതല്‍ ക്ലാസുകള്‍ ആരംഭിക്കാനാണ് സര്‍ക്കാര്‍ തീരുമാനം.
"
https://www.facebook.com/Malayalivartha
