പുലിവാലായല്ലോ... മോന്സന് മാവുങ്കല് നല്കിയ മൊഴികള് ക്രൈംബ്രാഞ്ചിന്റെ പ്രത്യേക അന്വേഷണ സംഘത്തിനു തലവേദനയാകുന്നു; പണം പൊലീസിന്റെ പരിപാടികള്ക്ക് നല്കിയെന്ന് മോന്സന്; കോടികളുടെ ചാരിറ്റി പരിപാടികളുടെ വിശദാംശങ്ങള് അന്വേഷണ സംഘത്തിന് നല്കി
വ്യാജ പുരാവസ്തു സാമ്പത്തിക തട്ടിപ്പു കേസിലെ പ്രതി മോന്സന് മാവുങ്കല് ഇതുവരെ മറ്റുള്ളവര്ക്ക് തലവേദനയായെങ്കില് ഇപ്പോള് അന്വേഷണ സംഘത്തിന് തന്നെ തലവേദനയാകുകയാണ്. കേരള പൊലീസുമായുള്ള അടുത്ത ബന്ധത്തെപ്പറ്റി മോന്സന് മാവുങ്കല് നല്കിയ മൊഴികള് ക്രൈംബ്രാഞ്ചിന്റെ പ്രത്യേക അന്വേഷണ സംഘത്തിനു തലവേദനയാകുന്നത്.
തട്ടിപ്പിലൂടെ നേടിയതായി സംശയിക്കുന്ന പണം മോന്സന് എന്തു ചെയ്തെന്ന ചോദ്യത്തിനാണു ലക്ഷങ്ങള് മുടക്കി താന് സ്പോണ്സര് ചെയ്ത കേരള പൊലീസിന്റെ വിവിധ പരിപാടികളുടെ പട്ടിക മോന്സന് നിരത്തിയത്. പൊലീസ് ഉദ്യോഗസ്ഥരുടെയും മതനേതാക്കളുടെയും ശുപാര്ശ അനുസരിച്ചു താന് ചെയ്ത കോടികളുടെ ചാരിറ്റി പരിപാടികളുടെ വിശദാംശങ്ങളും മോന്സന് അന്വേഷണ സംഘത്തിനു നല്കി.
ഈ മൊഴികളുടെ വസ്തുത അന്വേഷിക്കണമെങ്കില് പൊലീസിലെ ഉന്നത ഉദ്യോഗസ്ഥരുടെയും കേരളത്തിലെ ഉന്നതരായ മതനേതാക്കളുടെയും മൊഴികള് ക്രൈംബ്രാഞ്ച് രേഖപ്പെടുത്തി കുറ്റപത്രത്തിനൊപ്പം കോടതിയില് സമര്പ്പിക്കേണ്ടിവരും. മോന്സന്റെ മൊഴികള് നിഷേധിക്കാന് കഴിയാത്ത വിധത്തില്, താന് വന്തുക മുടക്കി സ്പോണ്സര് ചെയ്തതായി അവകാശപ്പെടുന്ന ഔദ്യോഗിക പരിപാടികളുടെയും മതപരമായ ചടങ്ങുകളുടെയും വിഡിയോകളും തുക കൈമാറിയതിന്റെ രേഖകളും മോന്സന് സൂക്ഷിച്ചിട്ടുണ്ട്.
കേസിലെ പ്രോസിക്യൂഷന് നടപടികള് തുടങ്ങിയാല് ഈ രേഖകള് പ്രതിഭാഗം കോടതി മുന്പാകെ സമര്പ്പിക്കുമെന്ന വെല്ലുവിളിയും അന്വേഷണ സംഘം നേരിടുന്നുണ്ട്. സ്വന്തം മേലുദ്യോഗസ്ഥരുടെ മൊഴിയെടുക്കേണ്ടി വരുന്ന ധര്മസങ്കടത്തിലാണു പ്രത്യേക അന്വേഷണ സംഘം. മതനേതാക്കളുടെ മൊഴിയെടുക്കുന്നതും ഇപ്പോഴത്തെ സാഹചര്യത്തില് വലിയ രാഷ്ട്രീയ വിവാദങ്ങള്ക്കു വഴിയൊരുക്കും.
തട്ടിപ്പിന്റെ വിദേശ ബന്ധങ്ങള് പുറത്തുവന്നാല് ഇക്കാര്യം ചൂണ്ടിക്കാട്ടി കേസന്വേഷണം കേന്ദ്ര ഏജന്സികള്ക്കു കൈമാറി തലവേദന ഒഴിവാക്കാന് കഴിയും. ഇതിനുള്ള തെളിവുകളാണു ക്രൈംബ്രാഞ്ച് സംഘം ഇപ്പോള് ശേഖരിക്കാന് ശ്രമിക്കുന്നത്.
അതേസമയം അകന്ന ബന്ധുവും സുഹൃത്തുമായ തുറവൂര് സ്വദേശിയെ കബളിപ്പിച്ച് മോന്സന് മാവുങ്കല് ഒന്നരലക്ഷം രൂപ തട്ടിയതായി പരാതി. തുറവൂര് വളമംഗലം കോട്ടപ്പള്ളി ബിജുമോനാണ് കുത്തിയതോട് സിഐക്കു പരാതി നല്കിയത്. പൊലീസ് കേസെടുത്തു. ബാങ്കില്നിന്നു വന്തുക പിന്വലിക്കണമെങ്കില് ആര്ബിഐക്ക് ടാക്സ് ഇനത്തില് നല്കാന് 10 ലക്ഷം രൂപ ആവശ്യമുണ്ടെന്ന് 2017 ഡിസംബര് 29നു മോന്സന് മാവുങ്കല് പറഞ്ഞു.
അതിനായി 2 ലക്ഷം വേണമെന്നും 20 ദിവസത്തിനകം തിരികെ നല്കാമെന്നും പറഞ്ഞ് ബിജുമോന്റെ സഹോദരന് വഴി സമീപിക്കുകയായിരുന്നു. ബിജുമോന് ഭാര്യയുടെ ആഭരണം പണയപ്പെടുത്തിയാണു പണം നല്കിയത് എന്നാണ് പരാതിയില് പറയുന്നത്.
തലസ്ഥാനത്തും പുരാവസ്തു മ്യൂസിയം തുടങ്ങാന് പദ്ധതി ഉണ്ടായിരുന്നതായി മോന്സന് മാവുങ്കല്. ടിവി സംസ്കാര ചാനല് സ്വന്തമാക്കാന് ആഗ്രഹിച്ചത് ഇതിനു വേണ്ടിയായിരുന്നെന്നു ക്രൈംബ്രാഞ്ചിനു മൊഴി നല്കി. ചാനലിന്റെ ചെയര്മാന് ആകാന് 10 ലക്ഷം രൂപ നല്കിയതായി പറയുന്നു. എന്നാല് മോന്സന് ചെയര്മാനായില്ല. മറ്റു ചില സാമ്പത്തിക ഇടപാടുകളും നടന്നിട്ടുണ്ട്. അതിന്റെ രേഖകള് കൈവശമുണ്ട്. എന്തായാലും ഓരോ ദിവസവും പുതിയ കാര്യങ്ങളാണ് മോന്സണ് പുറത്ത് വിടുന്നത്.
"
https://www.facebook.com/Malayalivartha
