വിശക്കുന്നവരെ ചേർത്ത് നിർത്തി അന്നമൂട്ടുന്നതാണ് ഉദാത്തമായ ഭരണ നൈപുണ്യമെന്ന് ജോൺ ബ്രിട്ടാസ്. ജനകീയ ഹോട്ടലും ഭക്ഷ്യകിറ്റുമൊക്കെ കേരളം സാർവത്രിക നയമാക്കിയപ്പോൾ ഇവിടെ നെറ്റിചുളിച്ചവരുണ്ട്. അവരുടെയൊക്കെ കണ്ണ് തുറപ്പിക്കുന്നതാണ് ഇന്നലെ പുറത്തു വന്ന പട്ടിണി സൂചികയെന്നും അദ്ദേഹം തന്റെ ഫേസ്ബുക്ക് പോസ്റ്റിലൂടെ വ്യക്തമാക്കി.

കുറിപ്പിന്റെ പൂർണ്ണ രൂപം ഇങ്ങനെ; വിശക്കുന്നവരെ ചേർത്ത് നിർത്തി അന്നമൂട്ടുന്നതാണ് ഉദാത്തമായ ഭരണ നൈപുണ്യം. മഹാമാരികാലത്ത് ജനകീയ ഹോട്ടലും ഭക്ഷ്യകിറ്റുമൊക്കെ കേരളം സാർവത്രിക നയമാക്കിയപ്പോൾ ഇവിടെ നെറ്റിചുളിച്ചവരുണ്ട്. അവരുടെയൊക്കെ കണ്ണ് തുറപ്പിക്കുന്നതാണ് ഇന്നലെ പുറത്തു വന്ന പട്ടിണി സൂചിക.

2021ലെ പുതിയ പട്ടികയില്‍ 116 രാജ്യങ്ങളില്‍ ഇന്ത്യ 101-ാം സ്ഥാനത്താണുള്ളത്. കഴിഞ്ഞ വര്‍ഷത്തെ 94-ാം സ്ഥാനത്തു നിന്നാണ് ഇന്ത്യ 7 സ്ഥാനങ്ങള്‍ പിന്നോട്ട് പോയത്. ദരിദ്രരാജ്യങ്ങൾ പലതും പട്ടികയില്‍ സ്ഥാനം മെച്ചപ്പെടുത്തുമ്പോള്‍ ഇന്ത്യ കൂടുതല്‍ മോശം അവസ്ഥയിലേക്ക് പോയതില്‍ കേന്ദ്ര സര്‍ക്കാരിന്റെ പങ്ക് ചെറുതല്ല.

ഇന്ത്യയിലെ പട്ടിണി കുത്തനെ വര്‍ദ്ധിച്ചു എന്ന് ഐറിഷ് ഏജന്‍സിയായ കണ്‍സേണ്‍ വേള്‍ഡൈ്വഡും ജര്‍മ്മന്‍ സംഘടനയായ വെല്‍റ്റ് ഹംഗള്‍ ഹൈല്‍ഫും ചേര്‍ന്ന് പട്ടിക തയ്യാറാക്കി പറയുമ്പോൾ പതിവുപോലെ സ്റ്റാറ്റിസ്റ്റിക്സിനെ തള്ളുക മാത്രമാണ് കേന്ദ്രസർക്കാർ ചെയ്യുന്നത്.

വസ്തുതകള്‍ വിശകലനം ചെയ്തിട്ടില്ല, മതിയായ പഠനം പ്രസാധകര്‍ നടത്തിയില്ല എന്നൊക്കെ പറയുമ്പോൾ നമ്മൾ എത്തി നിൽക്കുന്നത് വിശപ്പ് ഗുരുതരമായ 31 രാജ്യങ്ങളുടെ പട്ടികയിലാണ് എന്ന് ഓർക്കുക. ഇന്ത്യയില്‍ വര്‍ധിച്ചുവരുന്ന പട്ടിണിയുടെ അളവ് ഭയപ്പെടുത്തുന്നതാണ്. 2030 വിശപ്പ് രഹിത ലോകം എന്ന ഇന്നത്തെ ഭക്ഷ്യദിന മുദ്രാവാക്യത്തോട് നീതി പുലർത്താനാകുമോ ?