കനത്ത മഴ തുടരുന്ന സാഹര്യത്തില്‍ കേരളം വീണ്ടും ഒരു പ്രളയ ഭീതിയിലേക്ക് നീങ്ങുകയാണ്. പ്രധാനമായും കോട്ടയം,പത്തനംതിട്ട, ഇടുക്കി തൃശൂര്‍ എന്നീ ജില്ലകളിലെല്ലാം കനത്ത നാശനഷ്ടങ്ങളാണ് റിപ്പോര്‍ട്ട് ചെയ്തിരിക്കുന്നത്. കോട്ടയത്ത് രക്ഷാപ്രവര്‍ത്തനത്തില്‍ കരുത്തേകാന്‍ വ്യോമസേനയുടേയും, കരസേനയുടേയും യൂണിറ്റുകള്‍ സജ്ജമാണ്. ആര്‍മി രക്ഷാ പ്രവര്‍ത്തനത്തിനായി തയ്യാറായി കഴിഞ്ഞുവെന്നാണ് വിവരം.സൈന്യത്തെ കോട്ടയം ജില്ലയുടെ വിവിധ പ്രദേശങ്ങളിലായി വിന്യസിച്ചു കഴിഞ്ഞുവെന്നാണ് അറിയാന്‍ സാധിക്കുന്നത്. മേജര്‍ അബിന്‍ പോളിന്‍റെ നേതൃത്വത്തിലുള്ള കരസേനയാണ് കോട്ടയത്ത് വിന്യസിച്ചിരിക്കുന്നത്.

കൂടാതെ വ്യോമസേനയും രക്ഷാ പ്രവര്‍ത്തനത്തിനായി തയ്യാറായി കഴിഞ്ഞു. സാരംഗ് എം17 ഹെലിക്കോപ്റ്ററുകള്‍ ഇതിനായി ഉപയോഗിക്കും. സൂളൂര്‍ എയര്‍ ബേസില്‍ നിന്ന് കൂടുതല്‍ ഹെലിക്കോപ്റ്ററുകള്‍ എത്തിച്ചേരുമെന്നാണ് അറിയാന്‍ കഴിയുന്നു. സംസ്ഥാനത്തെ സാഹചര്യം വിലയിരുത്താന്‍ സതേണ്‍ എയര്‍ കമാന്റിന്റെ എല്ലാ ബേസുകളിലും ജാഗ്രത നിര്‍ദ്ദേശം നല്‍കിയിട്ടുണ്ട്. തിരുവനന്തപുരം പാങ്ങോട് മിലിട്ടറി ക്യാമ്പില്‍ നിന്നും സൈനിക സഹായത്തിനായി പുറപ്പെട്ടിട്ടുണ്ട്. വായുസേന ഉദ്യോഗസ്ഥരുമായി സംസ്ഥാന സ‌ര്‍ക്കാര്‍ ച‌ര്‍ച്ച നടത്തി സഹായം വേണ്ട പ്രദേശങ്ങളെക്കുറിച്ച്‌ വൈകാതെ തീരുമാനമെടുക്കും.

അതേസമയം കോട്ടയത്ത് കുട്ടിക്കല്‍ പ്ലാപ്പള്ളി ഭാഗത്ത് ഉരുള്‍പൊട്ടലിനെ തുടര്‍ന്ന് മൂന്ന് വീട് ഒലിച്ചു പോയി കാണാതായ 13 പേരില്‍ 6 പേരുടെ മൃതദേഹം കണ്ടെത്തിയിരിക്കുകയാണ്. ഇനി ഈ സ്ഥലം പൂര്‍ണമായി ഒറ്റപ്പെട്ട അവസ്ഥയിലാണ്. ആദ്യം നാട്ടുകാരുടെ നേതൃത്വത്തിലായിരിന്നു രക്ഷാപ്രവാര്‍ത്തനം പൂരോഗമിച്ചിരുന്നത്. ഇവിടുത്തെ പഞ്ചായത്ത് ഓഫീസിലടക്കം വെള്ളം കേറിയെന്നാണ് വിവരം. പുലര്‍ച്ചെ മുതല്‍ പെയ്യുന്ന ശക്തമായ മഴയെത്തുടര്‍ന്നാണ് ഉരുള്‍പൊട്ടലുണ്ടായത്. പൂഞ്ഞാര്‍ തെക്കേക്കരയിലും മുണ്ടക്കയത്തുമൊക്കെ ഉരുള്‍പൊട്ടല്‍ ഉണ്ടായെങ്കിലും അത് തീവ്രത കുറഞ്ഞവ ആയിരുന്നു.

എന്നാല്‍, കുട്ടിക്കലില്‍ ഉണ്ടായത് ശക്തമായ ഉരുള്‍പൊട്ടലാണ്. വിവിധയിടങ്ങളില്‍ ഉരുള്‍പൊട്ടലുണ്ടായി മീനച്ചിലാറ്റിലേക്കും മണിമലയാറ്റിലേക്കും വെള്ളം ഇരച്ചെത്തിയാണ് ജില്ലയില്‍ വെള്ളപ്പൊക്കമുണ്ടായത്. കുട്ടിക്കല്‍ കവലയില്‍ ഒരാള്‍ പൊക്കത്തില്‍ വെള്ളം കയറിയിട്ടുണ്ട്. വെള്ളപ്പൊക്കത്തില്‍ വീടുകളില്‍ വെള്ളം കയറുകയും വാഹനങ്ങളും, കോഴി ഫാമുകളും അടക്കമുള്ളവ ഒഴികിപ്പോവുകയും ചെയ്തു. ഇതിനകം നൂറോളം ദുരിതാശ്വാസ ക്യാമ്പുകളാണ് ജില്ലയില്‍ തുറന്നിരിക്കുന്നത്. വിവിധ ജില്ലകളില്‍ മഴക്കെടുത്തി തുടരുകയാണ്. കോട്ടയം ജില്ലയിലാണ് ഏറെ കെടുതികള്‍ റിപ്പോര്‍ട്ട് ചെയ്യുന്നത്.