കേരളം കോവിഡിന്റെ പിടിയില്‍ നിന്നും ഇപ്പോഴും മുക്തമായിട്ടില്ല. അതിനിടയ്ക്ക് കേരളത്തെ ഉലച്ച് പെരും മഴ. എത്രയും വേഗം ഈ മഴയൊന്ന് നില്‍ക്കണേ എന്നാണ് എല്ലാവരുടേയും പ്രാര്‍ത്ഥന. ചുരുങ്ങിയ സമയത്തിനുള്ളില്‍ തുലാവര്‍ഷത്തിന്റെ തീവ്രത കൂടുന്നത് അപൂര്‍വ്വ പ്രതിഭാസമാണ് .അറബികടലിലും ബംഗാള്‍ ഉള്‍ക്കടലിലും നിലവിലുള്ള ന്യൂനമര്‍ദ്ദത്തിന്റെ സ്വാധീനത്തിലാണ് തീവ്രമഴ ലഭിക്കുന്നത്.അറബിക്കടലിലെ ന്യൂനമര്‍ദ്ദം ശക്തിപ്പെട്ട് കേരള തീരത്തോട് അടുത്തതാണ് മഴയുടെ ശക്തി കൂട്ടിയത്.

മിന്നല്‍ വേഗത്തില്‍ ഇന്നലെ ഉച്ചയോടെ വീടുകളെ വീഴുങ്ങിയ ഉരുള്‍പൊട്ടലിലും മലവെള്ളപ്പാച്ചിലിലും കോട്ടയം, ഇടുക്കി ജില്ലകളില്‍ മരണം കവര്‍ന്നത് അഞ്ചു ജീവനുകളാണ്. കുട്ടികളും സ്ത്രീകളും അടക്കം 15പേര്‍ മണ്ണിനടിയിലാണ്. നിരവധി വീടുകള്‍ തകര്‍ന്നു. കൂട്ടിക്കലില്‍ ഒരു കുടുംബത്തില്‍ നിന്ന് ആറുപേരാണ് ദുരന്തത്തിന് ഇരയായത്. രക്ഷാ പ്രവര്‍ത്തനത്തിന് കരസേന ഇറങ്ങിയെങ്കിലും രാത്രിയോടെ തെരച്ചില്‍ നിറുത്തിവച്ചു. വ്യോമസേന എതു നിമിഷവും എത്താന്‍ സജ്ജം.

മുണ്ടക്കയം കൂട്ടിക്കല്‍ പ്‌ളാപ്പള്ളി കാവാലി, വട്ടാളക്കുന്നേല്‍ (ഒട്ടലാങ്കല്‍) ക്ലാരമ്മ ജോസഫ് (73), മരുമകള്‍ സിനി (37), കൊച്ചുമകള്‍ സോന (11) എന്നിവരുടെ മൃതദേഹങ്ങളാണ് കണ്ടെത്തിയത്. മകന്‍ മാര്‍ട്ടിന്‍ (റോയി 48), മറ്റ് കൊച്ചുമക്കളായ സ്‌നേഹ (13), സാന്ദ്ര (9), ആറ്റുചാലില്‍ ജോമിയുടെ ഭാര്യ സോണി, തൊട്ടിപ്പറമ്പില്‍ മോഹനന്റെ ഭാര്യ സരസമ്മ (60), മുണ്ടകശേരിയില്‍ വേണുവിന്റെ ഭാര്യ റോഷ്‌നി, ജോമിയുടെ മകന്‍ അപ്പു (14) എന്നിവരെയാണ് കൂട്ടിക്കലില്‍ കാണാതായത്.

കൊക്കയാര്‍ പൂവഞ്ചിയ്ക്ക് സമീപം മാക്കോച്ചിയിലുണ്ടായ ഉരുള്‍പൊട്ടലില്‍ ആന്‍സി (45), ചിറയില്‍ ഷാജി (50), പുതുപ്പറമ്പില്‍ ഷാഹുലിന്റെ മകന്‍ സച്ചു ഷാഹുല്‍ (3), കല്ലുപുരയ്ക്കല്‍ ഫൈസലിന്റെ മക്കളായ അപ്പു, മാളു,ഫൈസലിന്റെ സഹോദരി ഫൗസിയ, മക്കളായ അഹിയാന്‍ അഫ്‌സാന എന്നിവരെയാണ് കാണാതായത്.

ഇടുക്കി കാഞ്ഞാറില്‍ കാര്‍ മലവെള്ളപ്പാച്ചിലില്‍ അകപ്പെട്ടാണ് സ്വകാര്യ ആശുപത്രി ജീവനക്കാരായ കൂത്താട്ടുകുളം കിഴകൊമ്പ് അമ്പാടിയില്‍ നിഖില്‍ ഉണ്ണികൃഷ്ണന്‍ (29),മംഗത്തുതാഴം വട്ടിനാല്‍ പുത്തന്‍പുരയില്‍ വിജയന്റെ മകളും നിഥിന്‍ സുരേന്ദ്രന്റെ ഭാര്യയുമായ നിമ കെ. വിജയന്‍ (31) എന്നിവര്‍ മരിച്ചത്. വഴിത്തല സ്വദേശിയുടെതാണ് കാര്‍. ഇന്നലെ ഉച്ചയോടെ കൂട്ടിക്കലിലായിരുന്നു ആദ്യ ഉരുള്‍പൊട്ടല്‍.

പ്‌ളാപ്പള്ളി ഭാഗത്തുണ്ടായ ഉരുള്‍ മാര്‍ട്ടിന്റെ വീട്ടിലേയ്ക്ക് പതിച്ചു. മാര്‍ട്ടിനും കുടുംബവും ഈ സമയം വീട്ടിനുള്ളിലായിരുന്നു. രക്ഷപ്പെടാന്‍ അവസരം ലഭിക്കും മുന്നേ കുത്തിയൊലിച്ചെത്തിയ ഉരുള്‍ പ്രദേശത്ത് മറ്റ് വീടുകളും കടകളും തകര്‍ത്ത് പുല്ലകയാറിലേയ്ക്ക് പതിച്ചു. വൈകിട്ടോടെയാണ് കൊക്കയാര്‍ പഞ്ചായത്തിലെ വീടുകള്‍ ഉരുളെടുത്തത്. ഇടുക്കിയില്‍ മൂന്നിടത്ത് ഉരുള്‍പൊട്ടി. അമ്പതിലേറെ വീടുകള്‍ തകര്‍ന്നിട്ടുണ്ട്. നൂറുകണക്കിന് ഏക്കര്‍ കൃഷി ഭൂമിയും നശിച്ചു. കാഞ്ഞാര്‍ കൂവപ്പള്ളി, തൊടുപുഴ പുളിയന്‍മല സംസ്ഥാന പാതയിലെ തുമ്പിച്ചി, കോട്ടയം കുമളി റോഡില്‍ കുട്ടിക്കാനത്തിനടുത്ത് പുല്ലുപാറ എന്നിവിടങ്ങളിലാണ് ഉരുള്‍പൊട്ടിയത്.

മഴ എന്നത്തോടെ ശമിക്കുമെന്നതിന് കാലാവസ്ഥാ കേന്ദ്രം നല്‍കുന്ന വിവരം ഇന്നോ നാളെയോ കരകയറുമെന്നാണ്. ചൊവ്വാഴ്ചയ്ക്ക് ശേഷം മഴയുടെ തീവ്രത കുറയും. തുലാവര്‍ഷം തുടങ്ങിയ ഒക്ടോബര്‍ ഒന്ന് മുതല്‍ ഇന്നലെ വരെ 102 ശതമാനം അധിക മഴയാണ് ലഭിച്ചത്.

164.1മില്ലി മീറ്റര്‍ മഴ പ്രതീക്ഷിച്ചപ്പോള്‍ കിട്ടിയത് 331.4 മില്ലി മീറ്ററാണ്. കാലാവസ്ഥ കേന്ദ്രത്തിന്റെ മാനദണ്ഡമനുസരിച്ച് ഒക്ടോബര്‍ ഒന്നു മുതല്‍ പെയ്യുന്ന മഴയെല്ലാം തുലാവര്‍ഷമാണ്. എന്നാല്‍ പ്രകൃതി നിയമനുസരിച്ചും കാറ്റിന്റെ ഗതി നോക്കിയാലും തുലാവര്‍ഷം ആരംഭിച്ചിട്ടില്ലെന്നും കാലവര്‍ഷം പിന്‍വാങ്ങി തുടങ്ങിതേയുള്ളൂവെന്നാണ് കാലാവസ്ഥ നിരീക്ഷകര്‍ പറയുന്നത്. തുലാ വര്‍ഷത്തില്‍ കൂടുതല്‍ ന്യൂനമര്‍ദ്ദങ്ങള്‍ക്ക് സാധ്യതയുണ്ടെന്നും പറയുന്നു.