മനുഷ്യ മനസാക്ഷിയെ ഞെട്ടിക്കുന്ന സംഭവമാണ് ഇന്നലെയുണ്ടായത്. അറക്കുളം മൂന്നുങ്കവയല്‍ പാലത്തില്‍നിന്ന് ഓടിക്കൊണ്ടിരുന്ന കാര്‍ കുത്തൊഴുക്കില്‍പെട്ട് ഒലിച്ചുപോയി. കണ്ടു നിന്നവര്‍ക്ക് ഒന്നും ചെയ്യാനായില്ല. കാര്‍ ആദ്യം മുന്നങ്കവയലിന് സമീപമുള്ള സുരക്ഷാഭിത്തിയില്‍ ഇടിച്ചുനില്‍ക്കുകയും പിന്നീട് മലവെള്ളത്തിന്റെ ശക്തിയില്‍ സുരക്ഷാഭിത്തി തകര്‍ത്ത് കാറും യാത്രികരും ഒലിച്ചുപോകുകയായിരുന്നു.

കാര്‍ അഞ്ഞൂറു മീറ്ററോളം താഴ്ചയിലേക്ക് മറിഞ്ഞു. അഗ്‌നിശമനസേനയും പൊലീസും നാട്ടുകാരും ചേര്‍ന്ന് പിന്നീടു നടത്തിയ തിരച്ചിലിലാണ് ഇരുവരുടേയും മൃതദേഹം കണ്ടെടുത്തത്. കാറിലുണ്ടായിരുന്ന രണ്ടു പേര്‍ മരിച്ചു.

ഇരുവരേയും തിരിച്ചറിഞ്ഞു. കൂത്താട്ടുകുളം കിഴക്കൊമ്പ് അമ്പാടിയില്‍ നിഖില്‍ ഉണ്ണികൃഷ്ണന്‍(30), കൂത്താട്ടുകുളം ഒലിയപ്പുറം വറ്റിനാല്‍ പുത്തന്‍പുരയില്‍ നിമ കെ.വിജയന്‍(28) എന്നിവരാണ് മരിച്ചത്.

കൂത്താട്ടുകുളം ആയുര്‍വേദ ആശുപത്രി ജീവനക്കാരായിരുന്നു ഇരുവരും. ശനിയാഴ്ച ഉച്ചയോടെയാണ് അപകടം. വാഗമണ്‍ ഭാഗത്തുനിന്ന് കാഞ്ഞാര്‍ ഭാഗത്തേക്ക് വരുമ്പോള്‍ മലവെള്ളപ്പാച്ചില്‍ പെടുകയായിരുന്നു.

കാലം തെറ്റിയുള്ള അതിതീവ്രമഴ മധ്യകേരളത്തെ കെടുതിയില്‍ മുക്കിയിരിക്കുകയാണ്. കോട്ടയം, ഇടുക്കി ജില്ലകളിലായി 5 പേര്‍ മരിച്ചു. 16 പേരെ കാണാതായി. കോട്ടയം ജില്ലയുടെ കിഴക്കന്‍ മേഖലയിലും ഇതിനോടു ചേര്‍ന്നു കിടക്കുന്ന ഇടുക്കി ജില്ലയുടെ ഭാഗങ്ങളിലുമാണു കെടുതി രൂക്ഷം. കോട്ടയം മുണ്ടക്കയം കൂട്ടിക്കലില്‍ മണ്ണിടിച്ചിലിലും ഉരുള്‍പൊട്ടലിലും ഒരു കുടുംബത്തിലെ 3 പേര്‍ മരിച്ചു. ഇതേ കുടുംബത്തിലെ 3 പേരടക്കം 7 പേരെ കാണാതായി.

കൂട്ടിക്കലില്‍ ഉരുള്‍പൊട്ടലില്‍പെട്ടത് കുടുംബത്തിലെ ആറുപേരാണ്. മാര്‍ട്ടിന്റെ ഭാര്യ സിനി, മകള്‍ സോന, അമ്മ ക്ലാരമ്മ ജോസഫ് എന്നിവരുടെ മൃതദേഹം കണ്ടെത്തി. മാര്‍ട്ടിന്‍, മൂത്ത മകള്‍ സ്‌നേഹ, ഇളയ മകള്‍ സാന്ദ്ര എന്നിവര്‍ക്കായി തിരച്ചില്‍ തുടരുന്നു.



മുണ്ടക്കയത്തിനു സമീപം ഇടുക്കി ജില്ലയിലെ കൊക്കയാര്‍ പഞ്ചായത്തില്‍ മാക്കോച്ചി, പൂവഞ്ചി എന്നിവിടങ്ങളിലായി ഉരുള്‍പൊട്ടലില്‍ 5 കുട്ടികളടക്കം 8 പേരെ കാണാതായി. ഇതില്‍ 7 പേരും ഒരു കുടുംബത്തില്‍പ്പെട്ടവരാണ്. 17 പേരെ നാട്ടുകാര്‍ രക്ഷിച്ചു. തൊടുപുഴയ്ക്കു സമീപം അറക്കുളത്തു കാര്‍ ഒഴുക്കില്‍പ്പെട്ടു രണ്ടു പേര്‍ മരിച്ചു. കെകെ റോഡില്‍ മുണ്ടക്കയത്തും കാഞ്ഞിരപ്പള്ളിയിലും വെള്ളം ഉയര്‍ന്നതോടെ ഗതാഗതം നിര്‍ത്തിവച്ചു. വാഗമണ്ണിലും മറ്റും വിനോദസഞ്ചാരികള്‍ കുടുങ്ങി.

തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി ജില്ലകളിലും പുഴകള്‍ കരകവിഞ്ഞു. റോഡുകളില്‍ വെള്ളം കയറി. കോട്ടയം ജില്ലയില്‍ രക്ഷാപ്രവര്‍ത്തനത്തിനു സര്‍ക്കാര്‍ കര, വ്യോമ, നാവിക സേനകളുടെ സഹായം തേടി. ദേശീയ ദുരന്തപ്രതികരണ സേനയുടെ (എന്‍ഡിആര്‍എഫ്) ഓരോ സംഘങ്ങളെ പത്തനംതിട്ട, ആലപ്പുഴ, ഇടുക്കി, എറണാകുളം, തൃശൂര്‍, മലപ്പുറം ജില്ലകളില്‍ വിന്യസിച്ചു.

പത്തനംതിട്ട, ആലപ്പുഴ, കോട്ടയം, ഇടുക്കി, മലപ്പുറം, കണ്ണൂര്‍, കാസര്‍കോട് ജില്ലകളില്‍ ശക്തമായ മഴയ്ക്കു സാധ്യതയുള്ളതിനാല്‍ ഇന്നു യെലോ അലര്‍ട്ട് പ്രഖ്യാപിച്ചിട്ടുണ്ട്. അറബിക്കടലിലെ ന്യൂനമര്‍ദം 24 മണിക്കൂറില്‍ ദുര്‍ബലമാകാനാണു സാധ്യതയെന്നും പ്രവചിക്കുന്നു. പത്തനംതിട്ട, ഇടുക്കി, തൃശൂര്‍, പാലക്കാട് ജില്ലകളിലെ ആറ് അണക്കെട്ടുകളില്‍ റെഡ് അലര്‍ട്ട് പ്രഖ്യാപിച്ചു.

മുണ്ടക്കയം കൂട്ടിക്കലില്‍ ഉരുളിന്റെ കലിയില്‍ തകര്‍ന്നത് ഒരു കുടുംബം അപ്പാടെ. കാവാലി ഒട്ടലാങ്കല്‍ (വട്ടാളക്കുന്നേല്‍) മാര്‍ട്ടിന്റെ (റോയി 47) കുടുംബത്തില്‍ മൂന്നു പേര്‍ മരിക്കുകയും മൂന്നു പേരെ കാണാതാകുകയും ചെയ്തു. കൊക്കയാര്‍ പൂവഞ്ചി, മാക്കോച്ചി ഭാഗത്തുണ്ടായ ഉരുള്‍പൊട്ടലിലും ഒരേ കുടുംബത്തിലെ 7 പേരെ കാണാതായി.