തിരുവനന്തപുരത്ത് റോഡില്‍ പൊട്ടികിടന്ന കേബിളില്‍ കുടുങ്ങി കാര്‍ നിയന്ത്രണം തെറ്റിയുണ്ടായ അപകടത്തില്‍ ഒരു മരണം. തിരുവനന്തപുരം പാനക്കോട് ഇന്നലെ രാത്രി ഏഴരയോടെയാണ് അപകടമുണ്ടായത്.ലക്ഷം വീട് കോളനിയില്‍ ലില്ലിയാണ് മരിച്ചത്.

കാറിലുണ്ടായിരുന്ന മറ്റു നാല് പേര്‍ക്കും പരുക്കേറ്റിട്ടുണ്ട്. മണിയന്‍ , ധര്‍മദാസ് ഉള്‍പ്പെടെ നാല് പേര്‍ക്കാണ് പരുക്കേറ്റത്. മണിയന്റെ നില ഗുരുതരമാണ്. ഇയാളെ തിരുവനന്തപുരം മെഡിക്കല്‍ കോളജില്‍ പ്രവേശിപ്പിച്ചു.ഈ പ്രദേശത്ത് മഴ ശക്തമായിരുന്നു

റോഡിനരികെ കേബിള്‍ കിടക്കുന്നത് ശ്രദ്ധയില്‍പെട്ട് ഇവര്‍ സഞ്ചരിച്ച കാര്‍ വെട്ടിച്ച് മാറ്റിയപ്പോഴാണ് കാര്‍ കേബിളില്‍ കുടുങ്ങി വലിയ അപകടത്തിന് കാരണമായത്. പൊട്ടികിടന്ന കേബിളില്‍ കുടുങ്ങി കാര്‍ നിയന്ത്രണം തെറ്റി റോഡരികിലെ പോസ്റ്റിലും നിര്‍ത്തിയിട്ട കാറിലും ഇടിക്കുകയായിരുന്നു.