കേരളത്തിന് ഒന്നാകെ നാശനഷ്ടങ്ങൾ വരുത്തിയും ജീവനുകളെ അപഹരിച്ചും കനത്തമഴ ഉറഞ്ഞു തുള്ളുകയാണ്... ഇടുക്കിയിലാണ് കൂടുതലും അപകടകരമായ അവസ്ഥ ഉള്ളത്. നിർത്താതെ പെയ്യുന്ന മഴക്കൊപ്പം ഇപ്പോൾ മറ്റൊരു വാർത്ത കൂടി ഇടുക്കിയിൽ നിന്ന് പുറത്ത് വരികയാണ്... ഇടുക്കി ഡാം എപ്പോൾ വേണമെങ്കിലും തുറക്കാമെന്ന അവസ്ഥയിലാണ് ഉള്ളത്...

ഇപ്പോൾ ഓറഞ്ച് അലേർട്ടാണ് പ്രഖ്യാപിച്ചിരിക്കുന്നത് എങ്കിലും കുറച്ച് അടി കൂടി ഉയർന്നാൽ റെഡ് അലേർട്ട് പ്രഖ്യാപിക്കും എന്ന സ്ഥിതിയാണുള്ളത് ... റെഡ് അലർട്ട് പ്രഖ്യാപിച്ചു കഴിഞ്ഞാൽ ഉടനെ തന്നെ ഡാം തുറക്കുമെന്നാണ് നിഗമനം ... വളരെ കരുതലോടെ ഇരിക്കേണ്ട മുന്നറിയിപ്പാണ് ഇപ്പോൾ പുറത്തുവന്നുകൊണ്ടിരിക്കുന്നത്.

മഴ വീണ്ടും ശക്തിപ്രാപിച്ചതോടെയാണ് ഇടുക്കി ഡാമില്‍ രാവിലെ ഏഴുമണിമുതല്‍ ഓറഞ്ച് അലേര്‍ട്ട് പ്രഖ്യാപിച്ചത് .ഇടുക്കി ഡാമിന്റെ ജലനിരപ്പ് 2396.86 അടിയായി . ഇന്നലെ രാത്രി ഡാമിന്റെ വൃഷ്ടിപ്രദേശങ്ങളിലുള്‍പ്പെടെ ശക്തമായ മഴ പെയ്തിറങ്ങി . ഇതോടെയാണ് ജലനിരപ്പുയര്‍ന്നത്.ഒരടി കൂടി വെള്ളം ഉയര്‍ന്നാല്‍ അതീവ ജാഗ്രതാ മുന്നറിയിപ്പായ റെഡ് അലേര്‍ട്ട് പ്രഖ്യാപിക്കും.

ജില്ലാ കളക്ടറുടെ അനുമതിയോടെ ഷട്ടര്‍ ഉയര്‍ത്തി വെള്ളം തുറന്നുവിടണമെന്നും . ജനങ്ങള്‍ ജാഗ്രത പാലിക്കണമെന്നും അധികൃതര്‍ അറിയിച്ചു.ഡാമിന്റെ പരമാവധി സംഭരണശേഷി 2403 അടിയാണ്. 2018ലെ മഹാപ്രളയത്തിലാണ് ഇടുക്കി അണക്കെട്ട് അവസാനമായി തുറന്നത്.

അതേ സമയം കാസർഗോഡ് ജില്ലയില്‍  മഴക്ക്​ നേരിയ കുറവ്​. ജില്ലയില്‍ പലയിടത്തും മഴ പെയ്​തെങ്കിലും ശക്തി കുറവായിരുന്നു. കഴിഞ്ഞദിവസം ശക്തമായി പെയ്​ത വെള്ളരിക്കുണ്ടിലും മഴ കുറഞ്ഞു. മറ്റു അനിഷ്​ട സംഭവങ്ങള്‍ ഒന്നും റിപ്പോര്‍ട്ട് ചെയ്തിട്ടില്ല.

സംസ്ഥാനത്തെ ഡാമുകളുടെ അവസ്ഥ വിലയിരുത്താന്‍ മുഖ്യമന്ത്രി അടിയന്തര യോഗം വിളിച്ചിട്ടുണ്ടെന്ന് റവന്യൂ മന്ത്രി കെ രാജു പറഞ്ഞു . 10 മണിക്കാണ് യോഗം. ഇടുക്കി ഡാം ഇപ്പോൾ തുറക്കേണ്ടത് ഇല്ലെന്നും ഡാമുകൾ തുറക്കേണ്ടി വന്നാൽ പകലേ തുറക്കൂ എന്നും മന്ത്രി ഉറപ്പ് നൽകിയിട്ടുണ്ട് . കക്കി ഡാം 11 മണിക്ക് തുറക്കുമെങ്കിലും ആശങ്കപ്പെടേണ്ട സാഹചര്യം ഇല്ലെന്നും അദ്ദേഹം കൂട്ടിച്ചേര്‍ത്തു. സമൂഹ മാധ്യമങ്ങൾ വഴി തെറ്റായ വാർത്ത പ്രചരിപ്പിച്ചാൽ നടപടി സ്വീകരിക്കുമെന്നും മന്ത്രി വ്യക്തമാക്കി.

പത്തനംതിട്ടയില്‍ മഴ ശക്തമായതോടെ കക്കി ഡാം ഇന്ന് രാവിലെ 11ന് തുറക്കും. നാലു ഷട്ടറുകളില്‍ രണ്ടു ഷട്ടറുകളാണ് തുറക്കുന്നത് . കുട്ടനാട്, ചെങ്ങന്നൂര്‍, മാവേലിക്കര, കാര്‍ത്തികപ്പള്ളി താലൂക്കുകളിലെ നദികളില്‍ വൈകീട്ടോടെ ജലനിരപ്പ് ഗണ്യമായി വര്‍ധിക്കാന്‍ സാധ്യതയുണ്ട .അതുകൊണ്ട് ജാഗ്രത പാലിക്കണമെന്ന് ജില്ലാ കലക്റ്റര്‍ അറിയിച്ചു.

ജില്ലയിലെ പ്രധാന അണക്കെട്ടായ കക്കി ഡാം തുറക്കുന്നതോടെ പമ്പാ നദിയിലെ ജല നിരപ്പ് പത്ത് മുതല്‍ പതിനഞ്ച് സെന്റീമീറ്റര്‍ വരെ ഉയര്‍ന്നേക്കുവാനും സാധ്യതയുണ്ട് . വനപ്രദേശങ്ങളില്‍ ശക്തമായി മഴ തുടരുന്നതിനാല്‍ വെള്ളപ്പൊക്ക സാധ്യത നിലനില്‍ക്കുന്നു. നദിക്കരയില്‍ താമസിക്കുന്നവര്‍ സുരക്ഷിത കേന്ദ്രങ്ങളിലേക്ക് മാറണമെന്ന് അധികൃതര്‍ പറഞ്ഞു .