ഇടുക്കി അണക്കെട്ടില്‍ കണക്കുകൂട്ടലുകള്‍ തെറ്റിച്ച് ഇന്നു തന്നെ റെഡ് അലര്‍ട്ട് പ്രഖ്യാപിക്കാന്‍ അടിയന്തിര തീരുമാനം. ഇന്നലെ ഓറഞ്ച് അലര്‍ട്ട് പ്രഖ്യാപിച്ചെങ്കിലും റെഡ് അലര്‍ട്ടിലേക്ക് ഒരാഴ്ചകൂടി കാത്തിരിക്കേണ്ടിവരുമെന്നായിരുന്നു വൈദ്യുതി ബോര്‍ഡിന്റെ കണക്കുകൂട്ടല്‍.


എന്നാല്‍ മഴക്കെടുതി വര്‍ധിച്ച് നീരൊഴുക്ക് അതിവേഗത്തിലായതോടെ ഇന്നു വൈകുന്നേരം ആറിന് ഒന്നാം റെഡ് അലര്‍ട്ട് പ്രഖ്യാപിക്കാനാണ് തീരുമാനം. നിലവിലെ നീരൊഴുക്കിന്റെ തോത് കണക്കാക്കിയാല്‍ നാളെ രാവിലെ ഇടുക്കി ഡാമില്‍ ജലനിരപ്പ് 2398 അടി കവിയും. ഇതോടെ അപ്പര്‍ റൂള്‍ ലെവല്‍ കടക്കുന്ന സാഹചര്യമെത്തും. ഇതോടെ ചെറുതോണി അണക്കെട്ടിന്റെ ഒന്നോ രണ്ടോ ഷട്ടറുകള്‍ ഒരടി വീതം തുറന്നു വയ്ക്കാനാണ് നിലവിലെ തീരുമാനം.




ഇടുക്കി അണക്കെട്ടില്‍ റെഡ് അലര്‍ട്ട് രണ്ടുദിവസത്തിനുശേഷം മാത്രമേ ഉണ്ടാവുകയുള്ളുവെന്നാണ് കെഎസ്ഇബി ഡാം സുരക്ഷ ചീഫ് എന്‍ജിനീയര്‍ ഇന്നലെ പ്രഖ്യാപിച്ചിരുന്നത്. എന്നാല്‍ ജലനിരപ്പ് അതിവേഗം ഉയരുന്ന സാഹചര്യത്തിലാണഅ റെഡ് അലര്‍ട്ട് ഇന്നു തന്നെ പ്രഖ്യാപിക്കുന്നത്.


2398.86 അടിയായാല്‍ ആ നിമിഷം ഡാം തുറക്കേണ്ടിവരും. ചെറുതോണി ഡാമിന്റെ ഷട്ടറുകള്‍ ഏതു നിമിഷവും തുറക്കാനുള്ള ഒരുക്കങ്ങളും പൂര്‍ത്തിയായിട്ടുണ്ട്. സര്‍ക്കാരിന്റെയും ഡിസാസ്റ്റര്‍ മാനേജ്മെന്റിന്റെയും തീരുമാനത്തിന്റെ അടിസ്ഥാനത്തിലാകും നടപടികള്‍. ഇതിനു മുന്നോടിയായി ചെറുതോണി പാലത്തിലെയും ചെറുതോണി പുഴയിലെയും തടസങ്ങള്‍ നീക്കം ചെയ്യും. പെരിയാര്‍ തീരത്തെ താമസക്കാരെ സുരക്ഷിത ഇടങ്ങളിലേക്ക് മാറ്റിപ്പാര്‍പ്പിച്ചശേഷമായിരിക്കും ഷട്ടറുകള്‍ ഘട്ടംഘട്ടമായി തുറക്കുക.

സംസ്ഥാനത്തെ ഏറ്റവും വലിയ ജലവൈദ്യുത പദ്ധതിയായ ഇടുക്കി ഡാമിലെ ജലനിരപ്പ് റെഡ് അലര്‍ട്ടിലേക്ക്അടുക്കുന്ന സാഹചര്യത്തില്‍ ഡാം അടിയന്തരമായി തുറന്ന് ജലനിരപ്പ് ക്രമീകരിക്കണമെന്ന് ഇടുക്കി എംപി ഡീന്‍ കുര്യാക്കോസ് ആവശ്യപ്പെട്ടു. മുന്നിലുള്ള കാലാവസ്ഥാ പ്രവചനം അനുസരിച്ച് രണ്ട് ദിവസത്തേക്ക് മഴയില്ല. എന്നാല്‍ അതിനു ശേഷം ശക്തമായ മഴയ്ക്ക് സാധ്യതയുണ്ട്. അതു മുന്നില്‍ കണ്ട് ഡാം തുറന്നു വിട്ട് ജലം ക്രമീകരക്കണമെന്ന് ഡീന്‍ കുര്യാക്കോസ് നിര്‍ദേശിച്ചിരിക്കുന്നത്.


2018ല്‍ സംഭവിച്ചതുപോലെ ഡാം തുറന്നു വിട്ട് ജനങ്ങളുടെ ജീവനും സ്വത്തിനും ഭീഷണിയുണ്ടാക്കുന്ന അവസ്ഥയുണ്ടാവാതിരിക്കാന്‍ 2385 ല്‍ ജലനിരപ്പ് നിജപ്പെടുത്തണമെന്നും മഴ പെയ്യാന്‍ കാത്തിരുന്ന് പ്രളയമുണ്ടാക്കരുതെന്നുമാണ് ഡീന്‍ കുര്യാക്കോസ് എംപി ആവശ്യപ്പെടുന്നത്.
മഴക്കെടുതി വിലയിരുത്താന്‍ മുഖ്യമന്ത്രിയുടെ നേതൃത്വത്തിലുള്ള അടിയന്തര യോഗം തിരുവനന്തപുരത്ത് ചേരുകയാണ്. ഈ യോഗത്തില്‍ ഇടുക്കി ഉള്‍പ്പെടെ ഡാമുകള്‍ തുറക്കുന്നതടക്കമുള്ള വിഷയങ്ങളില്‍ തീരുമാനമെടുക്കും. ഡാമുകള്‍ പകല്‍സമയം മാത്രമേ തുറക്കൂവെന്നും ആശങ്കയുടെ ആവശ്യമില്ലെന്നും റവന്യൂ മന്ത്രി കെ.രാജന്‍ വ്യക്തമാക്കി.

ഇടുക്കി അണക്കെട്ടില്‍ ഓറഞ്ച് അലര്‍ട്ട് പ്രഖ്യാപിച്ചതായി വൈദ്യുതി മന്ത്രി കെ.കൃഷ്ണന്‍കുട്ടി ഇന്നലെയാണ് അറിയിച്ചത്. ഇന്നലെ രാത്രി 9ന് ജലനിരപ്പ് 2396.26 അടിയിലെത്തി. റെഡ് അലര്‍ട്ട് പ്രഖ്യാപിച്ചാല്‍ എപ്പോള്‍ വേണമെങ്കിലും ഷട്ടറുകള്‍ തുറക്കാം എന്നതാണ് ചട്ടം.


വേണ്ടിവന്നാല്‍ എല്ലാ ഷട്ടറുകളും തുറക്കാനുള്ള ഒരുക്കങ്ങളും പൂര്‍ത്തിയായിട്ടുണ്ട്. മൂലമറ്റം വൈദ്യുതി നിലയത്തില്‍ വൈദ്യുതി ഉല്‍പാദനം പൂര്‍ണതോതിലാക്കി അഞ്ചു 5 ജനറേറ്ററുകള്‍ പ്രവര്‍ത്തിപ്പിക്കുന്നുണ്ടെങ്കിലും ഇടുക്കി ഡാമിലെ ജലനിരപ്പ് താഴാത്ത സാഹചര്യത്തിലാണ് ഷട്ടര്‍ ഉയര്‍ത്താനുള്ള നീക്കം പുരോഗമിക്കുന്നത്.


മുന്‍പ് 1981, 1992, 1918 വര്‍ഷങ്ങളില്‍ ഇടുക്കി പദ്ധതിയില്‍പ്പെട്ട ചെറുതോണിയുടെ ഷട്ടറുഖള്‍ തുറന്നിരുന്നു. 1981 ഒക്ടോബര്‍ 29 നും 1992 ഒക്ടോബര്‍ 12 നുമാണ് ഇടുക്കി അണക്കെട്ട് പൂര്‍ണമായും നിറഞ്ഞത്. ചെറുതോണി അണക്കെട്ടിന്റെ അഞ്ചു ഷട്ടറുകളും 1981 ല്‍ തുറന്നിരുന്നു. രാവിലെ ഒന്‍പതോടെ അണക്കെട്ടു തുറന്നു. രണ്ടു മണിക്കൂറിനു ശേഷം ഷട്ടര്‍ താഴ്ത്തി. വൈകിട്ട് നാലു മണിയോടെ വീണ്ടും തുറന്നു.

1981 ല്‍ ആകെ 15 ദിവസമാണ് അണക്കെട്ടിന്റെ ഷട്ടര്‍ തുറന്നിട്ടത്. 2018ല്‍ മഹാപ്രളയത്തിന് മുന്നോടിയായി ഓഗസ്റ്റ് ഒന്‍പതിനാണ് ചെറുതോണിയുടെ ഷട്ടറുകള്‍ തുറന്നത്. മഹാപ്രളയത്തില്‍ ജലനിരപ്പ് കുതിച്ചുയര്‍ന്നതോടെ രണ്ടാഴ്ചയോളം ചെറുതോണിയുടെ ഷട്ടറുകള്‍ തുറന്നുവെച്ചാണ് ജലനിരപ്പ് നിയന്ത്രിച്ചത്. കേരളത്തില്‍ വന്‍നാശമുണ്ടാക്കിയ പ്രളയത്തില്‍ നെടുമ്പാശേരി വിമാനത്താവളം ഉള്‍പ്പെടെ വെള്ളത്തില്‍ മൂടിയിരുന്നു.
ഇടുക്കി തടാകത്തെ തടഞ്ഞുനിര്‍ത്തുന്നത് ഇടുക്കി ആര്‍ച്ച് ഡാം, ചെറുതോണി ഡാം, കുളമാവ് ഡാം എന്നീ മൂന്ന് അണക്കെട്ടുകളാണ്. വെള്ളം പുറത്തേക്കുവിടാന്‍ അഞ്ച് ഷട്ടറുകളുടെ ക്രമീകരണമുള്ളത് ചെറുതോണി അണക്കെട്ടില്‍ മാത്രമാണ്. ഇന്ത്യയിലെ ഏറ്റവും ഉയരം കൂടിയ ആര്‍ച്ച് ഡാമാണ് കുറവന്‍, കുറത്തി മലകളെ ബന്ധിപ്പിക്കുന്ന ഇടുക്കി അണക്കെട്ട്. 2403 അടി വെള്ളമാണ് ഇടുക്കിയിലെ പരമാവധി സംഭരണശേഷി.