മനുഷ്യര്‍ മുങ്ങിച്ചാകുന്നതിനിടെ ഇങ്ങനെ ദുന്തങ്ങളും ഉണ്ടാകാറുണ്ട്. ഇടുക്കി ഡാം ചൊവ്വാഴ്ച തുറക്കുമെന്ന അറിയിപ്പ് എത്തിയതോടെ ഓര്‍മകളില്‍ നിറയുന്നത് 2018 ലെ മഹാപ്രളയമാണ്. അന്ന് മഴ കനത്ത് നദികളിലെ പ്രളയ സാഹചര്യത്തിനിടെയായിരുന്നു ഡാം തുറന്നത്. ചെറുതോണിപ്പുഴയില്‍ അഞ്ച് അടിയോളമാണ് അന്ന് വെള്ളം ഉയര്‍ന്നത്.

2018ല്‍ ഡാം തുറക്കുന്നതിന് മുന്നോടിയായി മാധ്യമങ്ങല്‍ ആഘോഷിക്കുകയായിരുന്നു. അതില്‍ മനോരമ ചാനലും പത്രവും ഒരുപടി കൂടി മുന്നില്‍ കടന്ന് ഡാം തുറന്നാല്‍ ഏതൊക്കെ വഴിയിലൂടെ വെള്ളം പോകുമെന്ന റൂട്ട് മാപ്പ് വരച്ചു. മനോരമയുടെ കരവിരുതില്‍ എല്ലാവരും കയ്യടിച്ച് ആ റൂട്ടിലുള്ളവര്‍ മാറിനിന്നു. എന്നാല്‍ വെള്ളത്തിനുണ്ടോ മനോരമയുടെ റൂട്ട് മാപ്പ് അറിയുന്നു. അത് തോന്നുന്ന വഴിയിലൂടെ പോയി. അതോടെ റൂട്ട് മാപ്പ് സ്വാഹ. കഷ്ടപ്പെട്ട ജനങ്ങള്‍ ട്രോളി കൊന്നു.

ഇപ്പോള്‍ ഇടുക്കി ഡാം തുറക്കുമെന്നായപ്പോള്‍ ആദ്യം മനസില്‍ ഓടിയെത്തിയത് മനോരമയുടെ റൂട്ട് മാപ്പാണ്. ഇത്തവണ കുറച്ചും കൂടി സാങ്കേതികവിദ്യയോടെ ഇന്‍ഫോ ഗ്രാഫിക്‌സായി റൂട്ട് മാപ്പ് വരച്ചിരിക്കുകയാണ് മനോരമ. ഇതോടെ പഴയ ട്രോള്‍ വീണ്ടുമെത്തി.

26 വര്‍ഷത്തിനു ശേഷമായിരുന്നു 2018 ഓഗസ്റ്റില്‍ ചെറുതോണി ഡാം തുറന്നത്. പെരിയാര്‍ തീരത്തും തടയമ്പാട് ചപ്പാത്തിലും വെള്ളം കയറി വ്യാപക നാശനഷ്ടമാണ് അന്നുണ്ടായത്. തൊട്ടുപിന്നാലെ 2018 ഒക്ടോബര്‍ ആറിന് അതിതീവ്ര മഴയെന്ന കാലാവസ്ഥാ മുന്നറിയിപ്പിനെ തുടര്‍ന്ന് ഡാമിന്റെ ഒരു ഷട്ടര്‍ മാത്രം തുറന്നു. ചെറുതോണിപ്പുഴയില്‍ അന്ന് വെള്ളം ഉയര്‍ന്നത് ഒരടിയോളം മാത്രം.

ഇന്ത്യയിലെ ഏറ്റവും ഉയരം കൂടിയ ആര്‍ച്ച് ഡാമാണ് ഇടുക്കി. വെള്ളത്തിന്റെ മര്‍ദ്ദം ഇരു ഭാഗങ്ങളിലേക്കും ലഘൂകരിക്കുന്ന രീതിയിലാണ് നിര്‍മാണം. കമാന ആകൃതിയില്‍, ചുവട്ടില്‍നിന്ന് ഉള്ളിലേക്കാണ് വളവ്. കുറവന്‍, കുറത്തി മലകളെ ബന്ധിപ്പിക്കുന്നു. ഇടുക്കി തടാകത്തെ തടഞ്ഞുനിര്‍ത്തുന്നത് മൂന്ന് അണക്കെട്ടുകളാണ്. ഇടുക്കി ആര്‍ച്ച് ഡാം, ചെറുതോണി ഡാം, കുളമാവ് ഡാം. ഇതില്‍ വെള്ളം പുറത്തേക്കുവിടാന്‍ ക്രമീകരണമുള്ളത് ചെറുതോണി അണക്കെട്ടില്‍ മാത്രമാണ്.

അണക്കെട്ടു തുറന്നാല്‍ വെള്ളം എങ്ങനെ ഒഴുകും?

ഷട്ടര്‍ തുറന്നാല്‍ ചെറുതോണി പുഴയിലേക്കാണ് ആദ്യം വെള്ളം എത്തുക. സ്പില്‍വേയിലൂടെ വെള്ളം ചെറുതോണി പുഴയിലൂടെ ഒഴുകി വെള്ളക്കയത്ത് പെരിയാറില്‍ ചേരും. തൊടുപുഴപുളിയന്‍മല സംസ്ഥാനപാതയിലെ ചെറുതോണി ചപ്പാത്തു നിറഞ്ഞാല്‍ ഇടുക്കി–കട്ടപ്പന റൂട്ടില്‍ ഗതാഗതം തടസ്സപ്പെട്ടേക്കാം.

2018 ഓഗസ്റ്റില്‍ ഇടുക്കി ചെറുതോണി ഡാമിലെ അഞ്ചു ഷട്ടറുകളും തുറന്നപ്പോള്‍ ചെറുതോണിപ്പുഴയിലെ വെള്ളമൊഴുക്കു ശക്തമാകുന്നത് കാണാന്‍ തടിച്ചുകൂടിയവര്‍. ഒടുവില്‍ പൊലീസെത്തി കര്‍ശന സുരക്ഷയൊരുക്കിയാണ് കാണികളെ നിയന്ത്രിച്ചത്.

തടിയമ്പാട്, കരിമ്പന്‍ ചപ്പാത്തുകളിലൂടെയും ചേലച്ചുവട്, കീരിത്തോട്, പാമ്പ്‌ലാ വനമേഖലയിലൂടെയും നാട്ടിന്‍പുറങ്ങളിലൂടെയും ഒഴുകി എറണാകുളം ജില്ലാ അതിര്‍ത്തിയായ ലോവര്‍ പെരിയാര്‍ പാംബ്ല അണക്കെട്ടു വഴി നേര്യമംഗലം, ഭൂതത്താന്‍കെട്ട്, ഇടമലയാര്‍ വഴി മലയാറ്റൂര്‍, കാലടി ഭാഗങ്ങളിലെത്തും. ലോവര്‍പെരിയാര്‍ ഇപ്പോള്‍ തന്നെ തുറന്നിരിക്കുകയാണ്. ഭൂതത്താന്‍കെട്ടും ഇപ്പോള്‍തന്നെ നിയന്ത്രിതമായി തുറന്നിട്ടുണ്ട്.

എറണാകുളം ജില്ലയിലെ ആലുവ, ചെങ്ങമനാട് പഞ്ചായത്തിലെ തുരുത്ത്, കീഴ്മാട് പഞ്ചായത്തിലെ തോട്ടുമുഖം, മുളവുകാട് പഞ്ചായത്ത്, പനമ്പുകാട്, വല്ലാര്‍പാടം, മുളവുകാട്, പൊന്നാരിമംഗലം എന്നിവിടങ്ങളില്‍ വെള്ളമെത്തും. വന്‍തോതില്‍ ജലപ്രവാഹമുണ്ടായാല്‍ നെടുമ്പാശേരി വിമാനത്താവളത്തിലും വെള്ളം കയറാന്‍ സാധ്യതയുണ്ടെന്നും ഉദ്യോഗസ്ഥര്‍ വിലയിരുത്തുന്നു. തുടര്‍ന്ന് ആലുവാപ്പുഴയിലെത്തി അറബിക്കടലില്‍ച്ചേരും.

ചെറുതോണി ഡാമിന് അഞ്ചു ഷട്ടറുകളുണ്ട്. മധ്യഭാഗത്തെ ഷട്ടറാണ് ആദ്യം തുറക്കുന്നത്. പിന്നീട് വലത്തെ അറ്റത്തെയും ഇടത്തെ അറ്റത്തെയും ഏതെങ്കിലും ഒരു ഷട്ടര്‍ ഉയര്‍ത്തും; പിന്നാലെ മറ്റു രണ്ടു ഷട്ടറുകള്‍. സാധാരണയായി 10 മുതല്‍ 15 വരെ സെന്റിമീറ്ററാണ് ഓരോ ഷട്ടറും ഉയര്‍ത്തുക. മുഴുവന്‍ ഷട്ടറുകളും വൈദ്യുതിയില്‍ പ്രവര്‍ത്തിക്കുന്നവയാണ്.

ഇതിനു മുന്‍പു നാലു തവണ മാത്രമാണു ചെറുതോണി അണക്കെട്ടിന്റെ ഷട്ടറുകള്‍ തുറന്നത്. അതില്‍ മൂന്നും ഒക്ടോബറില്‍. 1981 ഒക്ടോബര്‍ 29, 1992 ഒക്ടോബര്‍ 12, 2018 ഓഗസ്റ്റ് ഒന്‍പത്, 2018 ഒക്ടോബര്‍ ആറിനുമാണ് മുന്‍പ് ചെറുതോണി അണക്കെട്ട് തുറന്നത്. അഞ്ചാമതായി ഇത്തവണ തുറക്കാന്‍ ഒരുങ്ങുന്നതും മറ്റൊരു ഒക്ടോബറിലാണ്. മനോരമയുടെ റൂട്ട് മാപ്പ് എന്താകുമെന്ന് ഇന്നറിയാം.