ഇന്ന് നബിദിനം... ഇസ്ലാംമത വിശ്വാസികള്‍ ഇന്ന് നബിദിനം ആഘോഷിക്കുന്നു. കോവിഡ് നിയന്ത്രണങ്ങള്‍ അനുസരിച്ചാണ് ആഘോഷങ്ങള്‍ സംഘടിപ്പിച്ചിരിക്കുന്നത്. ജനങ്ങളെ പങ്കെടുപ്പിച്ചു കൊണ്ടുള്ള ഘോഷയാത്രകള്‍ക്ക് അനുമതിയില്ല.

പള്ളികളിലും ദര്‍ഗകളിലും കൊവിഡ് പ്രോട്ടൊകോള്‍ പാലിക്കുകയും സാമൂഹിക അകലം പാലിക്കുന്നതിന് ആവശ്യമായ മുന്‍കരുതലുകള്‍ സ്വീകരിക്കുകയും വേണമെന്നാണ് നിര്‍ദ്ദേശം. പള്ളികള്‍ ഒഴികെ, പൊതുസ്ഥലങ്ങളില്‍ കൂട്ട പ്രാര്‍ഥനകള്‍ സംഘടിപ്പിക്കാനാകില്ല.

മനുഷ്യത്വം ഉയര്‍ത്തിപ്പിടിക്കുന്ന, സാഹോദര്യവും സമാധാനവും പുലരുന്ന സമൂഹത്തിനു മാത്രമേ പുരോഗതിയുടെ പാതയിലൂടെ സഞ്ചരിക്കാന്‍ സാധിക്കുകയുള്ളു. അതിനുതകും വിധം മുഹമ്മദ് നബി പകര്‍ന്ന മാനവികതയുടേയും സമത്വത്തിന്റേയും മഹദ് സന്ദേശങ്ങള്‍ ഉള്‍ക്കൊള്ളാനും പങ്കു വയ്ക്കാനും നമുക്ക് സാധിക്കണം. ദുരന്ത സാഹചര്യങ്ങളില്‍ സഹജീവികള്‍ക്ക് കൈത്താങ്ങാനും കഷ്ടപ്പെടുന്നവരുടെ കണ്ണീരൊപ്പാനും നമുക്ക് ഒത്തൊരുമിച്ച് മുന്നോട്ടു പോകാം. ഏവര്‍ക്കും ഹൃദയപൂര്‍വ്വം നബിദിന ആശംസകള്‍ നേരുന്നുവെന്ന് മുഖ്യമന്ത്രി.

ഗവര്‍ണര്‍ ശ്രീ ആരിഫ് മുഹമ്മദ് ഖാന്‍ ലോകമെമ്പാടുള്ള കേരളീയര്‍ക്ക് നബിദിനാശംസ നേര്‍ന്നു. എല്ലാ വിഭാഗം ജനങ്ങളുടെയും സന്തോഷത്തിനും ക്ഷേമത്തിനും വേണ്ടി ഒരുമയോടെ യത്നിക്കാന്‍ മുഹമ്മദ് നബി നല്‍കിയ സാഹോദര്യത്തിന്റെയും കരുണയുടെയും സന്ദേശം നമുക്ക് എന്നും പ്രചോദനമാകട്ടെ- - ഗവര്‍ണര്‍ ആശംസ ട്വീറ്റില്‍ പറഞ്ഞു.