ഇടുക്കിക്ക് അപായ സൂചന നല്‍കികൊണ്ട് വീണ്ടും ഷട്ടര്‍ തുറക്കുകയാണ്. ഇന്ന് 11 മണിയോടെ ഇടുക്കി ഡാം തുറക്കുകയാണ്.ഇത് സംബന്ധിച്ച മുന്നറിയിപ്പ് കഴിഞ്ഞ ദിവലം തന്നെ നല്‍കിയിരുന്നു. 2018 മഹാപ്രളയസമയത്താണ് ഇനിന് മുന്‍പ് ഇടുക്കി ഡാം തുറന്നത് . അന്ന് ഒരു അപായ സൈറണോ,ജാഗ്രതാ നിര്‍ദ്ദേശമോ നല്‍കാതെ നല്‍കാതെയാണ് ഡാം തുറന്നത്.ഇന്ന് എല്ലാ ജാഗ്രതാ നിര്‍ദ്ദേശങ്ങളോട് കൂടി ആദ്യത്തെ അലേര്‍ട്ടായ ബ്ലു, അടുത്ത അലേര്‍ട്ടായ ഓറഞ്ച് അലേര്‍ട്ട്,പിന്നെ റെഡ് എന്നീ അലേര്‍ട്ടുകളും ഇതിനോടകം നല്‍കി കഴിഞ്ഞു.

ഇടുക്കി ഡാം തുറക്കലിന്റെ ഭാഗമായി രാവിലെ 10.55 ന് സൈറണ്‍ മുഴക്കും. മന്ത്രിമാരുടെ സാന്നിധ്യത്തിലാകും ഇടുക്കി ഡാം ഷട്ടര്‍ തുറക്കുക. രാവിലെ 10.55 ന് മുന്നറിയിപ്പ് സൈറണ്‍ മുഴക്കി ജലസേചന മന്ത്രി റോഷി അഗസ്റ്റിന്‍, വൈദ്യുതി മന്ത്രി കെ കൃഷ്ണന്‍കുട്ടി, ജില്ല കളക്ടര്‍ ഷീബ ജോര്‍ജ്, വൈദ്യുതി ബോര്‍ഡ് ചീഫ് എന്‍ജിനീയര്‍ സുപ്രിയ എസ്. ഡെപ്യൂടി ചീഫ് എന്‍ജിനീയര്‍ പ്രസന്നകുമാര്‍, എക്‌സിക്യൂടീവ് ആര്‍ ശ്രീദേവി എന്നിവരുടെ സാന്നിധ്യത്തില്‍ ആദ്യം മൂന്നാമത്തെ ഷടെര്‍ തുറക്കും.ചെറുതോണിയിലെ ജലനിരപ്പ് വിലയിരുത്തി അഞ്ച് മിനിറ്റിന് ശേഷം രണ്ടാമത്തെ ഷടെറും വീണ്ടും അഞ്ച് മിനിറ്റ് ശേഷം നാലാമത്തെ ഷടെറും 35 സെ.മീ. ഉയര്‍ത്തും. കുറവന്‍ കുറത്തി മലകളെ ബന്ധിപ്പിച്ച്‌ പെരിയാറിന് കുറുകെ നിര്‍മിച്ചിരിക്കുന്ന ഇടുക്കി ജലസംഭരണിയുടെ ഭാഗമായി ആര്‍ച് ഡാം അടക്കം മൂന്ന് അണക്കെട്ടുകളാണുള്ളത്. കുളമാവ്, ചെറുതോണി എന്നിവയാണ് മറ്റ് രണ്ടെണ്ണം. ആര്‍ച് ഡാമിന് ഷടെറുകളില്ല. ജലനിരപ്പ് ക്രമീകരിക്കാന്‍ ചെറുതോണി ഡാമിന്റെ ഷടെറാണ് തുറക്കുക.

അതേസമയം, ജലനിരപ്പ് പൂര്‍ണ സംഭരണശേഷിയിലേക്ക് എത്തുന്നതിനെത്തുടര്‍ന്ന് ഇടുക്കി അണക്കെട്ട് തുറക്കാനൊരുങ്ങുന്നത് അഞ്ചാം തവണ. 1981 ഒക്‌ടോബര്‍ 29, 1992 ഒക്‌ടോബര്‍ 12, 2018 ആഗസ്റ്റ് ഒമ്ബത്, ഒക്‌ടോബര്‍ ആറ് എന്നീ തീയതികളിലാണ് മുമ്ബ് ഇടുക്കി അണക്കെട്ട് തുറന്നത്. അപൂര്‍വം ചില അവസരങ്ങളില്‍ അണക്കെട്ട് നിറഞ്ഞെങ്കിലും തുറക്കേണ്ട സാഹചര്യമുണ്ടായില്ല.

ജലനിരപ്പ് ഉയര്‍ന്ന പശ്ചാത്തലത്തില്‍ ഡാമുകള്‍ തുറക്കുന്നതോടെ വിവിധ ജില്ലകളിലാണ് ജാഗ്രതാ നിര്‍ദേശം നല്‍കിയിരിക്കുന്നത്.മുന്‍കരുതലിന്റെ ഭാഗമായി ഇടമലയാര്‍, പമ്ബ അണക്കെട്ടുകള്‍ തുറന്നു. ഇടമലയാര്‍ അണക്കെട്ടിന്റെ രണ്ട് ഷട്ടറുകള്‍ 50 സെന്റി മീറ്റര്‍ വരെയാണ് ഉയര്‍ത്തിയിരിക്കുന്നത്. പുഴയിലെ ജലനിരപ്പ് അനുസരിച്ചായിരിക്കും കൂടുതല്‍ വെള്ളം തുറന്ന് വിടുന്നതില്‍ അന്തിമ തീരുമാനം. ഷട്ടര്‍ 80 സെന്റി മീറ്റര്‍ വരെ ഉയര്‍ത്താനാണ് തീരുമാനം. ഇപ്പോള്‍ അധികമായി വെള്ളം തുറന്ന് വിടേണ്ട സാഹചര്യമില്ല എന്നാണ് അധികൃതര്‍ വ്യക്തമാക്കുന്നത്.

പമ്ബ അണക്കെട്ടിന്റെ ഷട്ടറുകള്‍ 30 സെന്റി മീറ്റര്‍ വരെയാണ് ഉയര്‍ത്തിയിരിക്കുന്നത്. 50 ക്യൂമെക്സ് വെള്ളം പമ്ബയിലെത്തുമെന്നാണ് നിഗമനം. പമ്ബയിലെ ജലനിരപ്പ് 10 സെന്റി മീറ്ററിന് മുകളില്‍ ഉയരാതെ നിലനിര്‍ത്തുകയാണ് ലക്ഷ്യം. പ്രളയ സാധ്യതകള്‍ നിലവിലില്ല. പമ്ബ തീരത്ത് താമസിക്കുന്നവര്‍ ജാഗ്രത പാലിക്കണം. വീടുകളില്‍ വെള്ളം കയറാതിരിക്കാനുള്ള മുന്‍കരുതല്‍ നടപടികളും സ്വീകരിച്ചതായാണ് വിവരം.