അടച്ചിട്ട വീട് കുത്തിത്തുറന്ന് പണവും മൊബൈൽ ഫോണുകളും മോഷ്ടിച്ച തമിഴ് നാടോടി സംഘത്തിലെ സ്ത്രീയെ പോലീസ് അറസ്റ്റ് ചെയ്തു. കോയമ്പത്തൂർ റെയിൽവേ സ്റ്റേഷനു സമീപം താമസിക്കുന്ന ശിവകാമിയാണ് (28) അറസ്റ്റിലായത്.

നഗര സൗന്ദര്യവൽക്കരണ ജോലിയിൽ ഏർപ്പെട്ട തൊഴിലാളികൾ താമസിക്കുന്ന വാടക വീട്ടിൽ നിന്ന് 2 ഫോണുകളും 8,000 രൂപയുമാണ് ഇവർ മോഷ്ടിച്ചത്.

തൊഴിലാളികൾ രാവിലെ ജോലിക്ക് പോയ സമയത്തായിരുന്നു സംഭവം. വീടിന്റെ മുൻവശത്തെ പൂട്ട് പൊളിച്ച് അകത്ത് കടന്നായിരുന്നു കിടപ്പു മുറികളിൽ നിന്ന് തൊഴിലാളികളുടെ ഫോണുകളും പണവും കവർന്നത്.

മറ്റൊരു വീട്ടിലെ മോഷണ ശ്രമത്തിനിടെ പിടിയിലായ ഇവരുടെ പക്കൽ നിന്ന് സ്മാർട്ട് ഫോണുകൾ ലഭിച്ചതോടെയാണ് തൊഴിലാളികൾ പോലും മോഷണ വിവരം അറിയുന്നത്.

തുടർന്ന് കൗൺസിലർ കെ. ജെയ്സലിന്റെ നേതൃത്വത്തിൽ സ്ത്രീയെ പൊലീസിൽ ഏൽപിച്ചു.