ഇത്രയും പ്രതീക്ഷിച്ചില്ല... കാശ്മീര് സന്ദര്ശനത്തിന്റെ അവസാന ദിവസം അമിത്ഷാ സൈന്യത്തോടൊപ്പം; പുല്വാമയില് സിആര്പിഎഫ് ജവാന്മാര്ക്കൊപ്പം അത്താഴം കഴിച്ച് രാത്രി ചെലവഴിച്ചു; ബുള്ളറ്റ് പ്രൂഫ് ഗ്ലാസ് കവചം എടുത്തുമാറ്റി കശ്മീര് ജനതയോട് നേരിട്ട് സംസാരിച്ചു
മൂന്നു ദിവസത്തെ കാശ്മീര് സന്ദര്ശനത്തിനെത്തിയ കേന്ദ്ര ആഭ്യന്തര മന്ത്രി അമിത്ഷാ എല്ലാവരേയും അമ്പരപ്പിച്ചു. സുരക്ഷയ്ക്കായി വേദിയില് സ്ഥാപിച്ച ബുള്ളറ്റ് പ്രൂഫ് ഗ്ലാസ് കവചം എടുത്തുമാറ്റി കശ്മീര് ജനതയോട് സംസാരിച്ച അമിത്ഷാ രാത്രിയിലാണ് സൈന്യത്തോടൊപ്പം കഴിഞ്ഞത്.
സന്ദര്ശനത്തിന്റെ അവസാന ദിവസമാണ് അമിത് ഷാ സി.ആര്.പി.എഫ് ജവാന്മാര്ക്കൊപ്പം ചെലവഴിച്ചത്. പുല്വാമയിലെ ലാത്പോരയില് സി.ആര്.പി.എഫ് ജവാന്മാര്ക്കൊപ്പമായിരുന്നു അമിത് ഷായുടെ അത്താഴം. ഇന്നലെ രാത്രി ലാത്പോരയില് സി.ആര്.പി.എഫ് ക്യാമ്പിലാണ് അമിത് ഷാ കഴിഞ്ഞത്.
തീവ്രവാദത്തിനെതിരെ ശക്തമായ നിലപാട് സ്വീകരിക്കുമെന്നാണ് കഴിഞ്ഞ രണ്ടുദിവസം നീണ്ട സന്ദര്ശനത്തില് അമിത് ഷാ വ്യക്തമാക്കിയത്. കഴിഞ്ഞ ദിവസം അമിത് ഷായുടെ സന്ദര്ശനത്തിനിടെ ഷോപ്പിയാനിലെ ബബാപൊരയില് തീവ്രവാദി ആക്രമണം നടന്നിരുന്നു. ഒരു ജവാന് പരിക്കേല്ക്കുകയും ഒരു പ്രദേശവാസി കൊല്ലപ്പെടുകയും ചെയ്തിരുന്നു..
സുരക്ഷയ്ക്കായി വേദിയില് സ്ഥാപിച്ച ബുള്ളറ്റ് പ്രൂഫ് ഗ്ലാസ് കവചം എടുത്തുമാറ്റി കശ്മീര് ജനതയോട് സംസാരിച്ച് അമിത് ഷാ ഞെട്ടിപ്പിക്കുകും ചെയ്തു. മൂന്ന് ദിവസത്തെ ജമ്മു കശ്മീര് സന്ദര്ശനത്തിനിടെ തിങ്കളാഴ്ച ശ്രീനഗറിലെ ഷേര് ഐ കശ്മീര് ഇന്റര്നാഷണല് കണ്വെന്ഷന് സെന്ററിലെത്തിയപ്പോഴാണ് അമിത് ഷാ സുരക്ഷാകവചം ഒഴിവാക്കി ജനങ്ങളെ അഭിസംബോധന ചെയ്തത്.
ജമ്മുകശ്മീരിലെ ജനങ്ങളോട് നേരിട്ട് സംസാരിക്കാന് ആഗ്രഹിക്കുന്നുവെന്ന് ബുള്ളറ്റ് പ്രൂഫ് കവചം എടുത്തുമാറ്റിയതിന് പിന്നാലെ അമിത് ഷാ പറഞ്ഞു. 2019 ഓഗസ്റ്റില് 370ാം വകുപ്പ് റദ്ദാക്കിയതിന് ശേഷമുള്ള അമിത് ഷായുടെ ആദ്യ കശ്മീര് സന്ദര്ശനമായിരുന്നു ഇത്.
ഞാന് ഏറെ പരിഹസിക്കപ്പെട്ടു. അപലപിക്കപ്പെട്ടു. ഇന്നെനിക്ക് നിങ്ങളോട് തുറന്നു സംസാരിക്കണം. അതുകൊണ്ടാണ് ബുള്ളറ്റ് പ്രൂഫ് കവചമോ മറ്റു സുരക്ഷയോ ഇവിടെ ഇല്ലാത്തത്. പാകിസ്താനോട് സംസാരിക്കണമെന്നാണ് ഫാറൂഖ് സഹേബ് എന്നോട് നിര്ദേശിച്ചത്. എന്നാല് യുവാക്കളോടും താഴ്വരയിലെ ജനങ്ങളോടുമാണ് ഞാന് സംസാരിക്കുക എന്ന് അമിത് ഷാ പറഞ്ഞു.
മൂന്ന് ദിവസത്തെ കശ്മീര് സന്ദര്ശനം പൂര്ത്തിയാകുന്ന തിങ്കളാഴ്ച രാവിലെ ഗന്ദര്ബാലിലെ ഖീര് ഭവാനി ക്ഷേത്രവും അമിത് ഷാ സന്ദര്ശിച്ചിരുന്നു. ക്ഷേത്ര ദര്ശനത്തിനായി ജമ്മു കശ്മീര് ലെഫ്റ്റനന്റ് ഗവര്ണര് മനോജ് സിന്ഹയും കേന്ദ്രമന്ത്രിക്കൊപ്പമുണ്ടായിരുന്നു.
പ്രധാനമന്ത്രി മോദിയുടെ ഹൃദയത്തിലാണ് ജമ്മു കശ്മീരിന്റെ സ്ഥാനമെന്നും ജമ്മുവിന് ഇനി വിവേചനം അനുഭവിക്കേണ്ടി വരില്ലെന്നും കഴിഞ്ഞ ദിവസം അമിത് ഷാ വ്യക്തമാക്കിയിരുന്നു. വികസനത്തെ തടഞ്ഞുനിര്ത്താന് ആര്ക്കും സാധിക്കില്ല. ജമ്മു കശ്മീരില് അത് തുടങ്ങിക്കഴിഞ്ഞു. അടുത്ത രണ്ട് വര്ഷത്തിനുള്ളില് ജമ്മു നഗരത്തിലും ശ്രീനഗറിലും മെട്രോ സര്വീസ് ആരംഭിക്കുമെന്നും ജമ്മു കശ്മീരിലെ ഓരോ ജില്ലകളിലേക്കും ഹെലികോപ്റ്റര് സേവനങ്ങള് ഉറപ്പാക്കുമെന്നും അമിത് ഷാ പറഞ്ഞിരുന്നു.
അതതേസമയം പാകിസ്ഥാനുമായി ചര്ച്ചയ്ക്കുള്ള നിര്ദ്ദേശം അമിത് ഷാ തള്ളി. പാകിസ്ഥാനുമായി ഒരു ചര്ച്ചയ്ക്കുമില്ലെന്നും സംസാരിക്കാനുള്ളത് കശ്മീര് ജനതയോട് മാത്രമാണെന്നും അമിത് ഷാ വ്യക്തമാക്കി. ഭീകരാക്രമണം വര്ധിച്ചുവരുന്ന സാഹചര്യത്തില് പാകിസ്ഥാനുമായി കേന്ദ്രസര്ക്കാര് ചര്ച്ചക്ക് തയ്യാറാകണമെന്ന് ജമ്മുകശ്മീര് മുന് മുഖ്യമന്ത്രി ഫറൂക്ക് അബ്ദുള്ള ആവശ്യപ്പെട്ടിരുന്നു.
തീവ്രവാദത്തിനെതിരെ ശക്തമായ നിലപാട് സ്വീകരിക്കുമെന്നാണ് കഴിഞ്ഞ രണ്ടുദിവസം നീണ്ട സന്ദര്ശനത്തില് അമിത് ഷാ വ്യക്തമാക്കിയത്. അമിത്ഷായുടെ സന്ദര്ശന വേളയിലുണ്ടായ തീവ്രവാദി ആക്രമണത്തെ ഗൗരവത്തോടെയാണ് കേന്ദ്രസര്ക്കാര് കാണുന്നത്. പാകിസ്ഥാനെ പേരെടുത്ത വിമര്ശിച്ച സൈനിക മേധാവി ശക്തമായ തിരിച്ചടിക്കുമെന്ന മുന്നറിയിപ്പും നല്കി.
https://www.facebook.com/Malayalivartha
