കാര്യങ്ങള് മാറിമറിയുന്നു... 125 വര്ഷം പഴക്കമുള്ള മുല്ലപ്പെരിയാര് അണക്കെട്ട് ദുര്ബലമാണെന്നും പൊളിച്ചുപണിയണമെന്നും ആവശ്യപ്പെട്ട നടന് പൃഥ്വിരാജ് ഉള്പ്പെടെയുള്ളവരുടെ കോലം കത്തിച്ച് തമിഴ്നാട്; പൃഥ്വിരാജിനെ ഉപദേശിച്ച് മന്ത്രി; കേരളത്തിന്റെ ആശങ്ക ഉള്ക്കൊണ്ട് സ്റ്റാലിന്
മുല്ലപ്പെരിയാര് വിഷയം വളരെ ശ്രദ്ധിച്ചില്ലെങ്കില് വൈകാരികമായി മാറുമെന്നതാണ് കാലം തെളിയിച്ചത്. രണ്ട് സംസ്ഥാനങ്ങള് തമ്മിലുള്ള പ്രശ്നമായി മാറും. 125 വര്ഷം പഴക്കമുള്ള മുല്ലപ്പെരിയാര് അണക്കെട്ട് ദുര്ബലമാണെന്നും പൊളിച്ചുപണിയണമെന്നും ആവശ്യപ്പെട്ട നടന് പൃഥ്വിരാജ് ഉള്പ്പെടെയുള്ളവരുടെ പ്രസ്താവനക്കെതിരെ തമിഴ്നാട്ടില് വലിയ പ്രതിഷേധമാണുണ്ടായത്. തിങ്കളാഴ്ച തേനി ജില്ല കലക്ടറേറ്റിന് മുന്നില് അഖിലേന്ത്യ ഫോര്വേഡ് ബ്ലോക്ക് പ്രവര്ത്തകര് പൃഥ്വിരാജിന്റെ കോലം കത്തിച്ചു.
സുപ്രിംകോടതി വിധി നിലനില്ക്കെ തെറ്റിദ്ധാരണജനകമായ പ്രസ്താവനകളിറക്കിയ നടന് പൃഥ്വിരാജ്, അഡ്വ. റസ്സല് ജോയ് എന്നിവര്ക്കെതിരെ ദേശ സുരക്ഷാ നിയമ പ്രകാരം കേസെടുക്കണമെന്നും ഇതുമായി ബന്ധപ്പെട്ട് കലക്ടര്ക്കും എസ്.പിക്കും പരാതി നല്കിയെന്നും സംഘടന ജില്ല സെക്രട്ടറി എസ്.ആര് ചക്രവര്ത്തി പറഞ്ഞു.
പൃഥ്വിരാജിന്റെ പ്രസ്താവന തമിഴ്നാടിന്റെ താല്പര്യത്തിനെതിരാണെന്നും തമിഴ് സിനിമകളില് മലയാളി നടീനടന്മാരെ നിരോധിക്കാന് തമിഴ് സിനിമ പ്രൊഡ്യൂസഴേ്സ് അസോസിയേഷനോട് ആവശ്യപ്പെടുന്നതായും തമിഴക വാഴ്വുരിമൈ കക്ഷി നേതാവും എം.എല്.എയുമായ വേല്മുരുകന് പ്രസ്താവിച്ചു.
ഫേസ്ബുക്കിലൂടെയാണ് മുല്ലപെരിയാര് വിഷയത്തില് പൃഥ്വിരാജ് പ്രതികരിച്ചത്. 120 വര്ഷത്തോളം പഴക്കമുളള ഒരു ഡാം പ്രവര്ത്തിക്കുന്നതിന് എന്ത് ഒഴിവുകഴിവ് പറഞ്ഞാലും അത് സമ്മതിക്കാനാവില്ലെന്നും രാഷ്ട്രീയവും സാമ്പത്തികവുമായ കാര്യങ്ങള് മാറ്റിവെച്ച് ശരി എന്തോ അത് ചെയ്യാനുള്ള സമയമായെന്നും പൃഥ്വിരാജ് കുറിച്ചിരുന്നു. നമുക്ക് സിസ്റ്റത്തില് മാത്രമേ വിശ്വസിക്കാന് കഴിയൂവെന്നും സിസ്റ്റം ശരിയായ തീരുമാനം എടുക്കണമെന്ന് പ്രാര്ഥിക്കാമെന്നും പൃഥ്വിരാജ് വ്യക്തമാക്കിയിരുന്നു.
അതേസമയം പൃഥ്വിരാജിന് കേരളത്തില് നിന്നും ആരും പിന്തുണ നല്കിയില്ല. പൃഥ്വിരാജ് അടക്കമുള്ളവര് മുല്ലപ്പെരിയാര് വിഷയത്തില് ഹാഷ് ടാഗ് ക്യാംപയിന് നടത്തരുതെന്ന് ജലവിഭവ വകുപ്പ് മന്ത്രി റോഷി അഗസ്റ്റിന്. അങ്ങനെയൊന്നും ഉണ്ടാകരുത്. ജനങ്ങളെ ആശങ്കയില് ആഴ്ത്തരുത്. പെരിയാര് തീരത്തുള്ളവരെ മാറ്റിപാര്പ്പിക്കേണ്ടി വന്നാല് അതിനുള്ള എല്ലാ മുന്കരുതലുകളും സര്ക്കാര് എടുത്തിട്ടുണ്ട്. ജലനിരപ്പ് ഉയരുന്നതുകൊണ്ടുള്ള ബുദ്ധിമുട്ടും, ആശങ്കയും കോടതിയേയും തമിഴ്നാട് സര്ക്കാരിനെയും അറിയിച്ചിട്ടുണ്ട്. പ്രദേശവാസികള്ക്ക് ഒരു ആശങ്കയക്കും ഇടവരാത്ത തരത്തിലുള്ള നടപടികള് സ്വീകരിച്ചിട്ടുണ്ടെന്ന് റോഷി അഗസ്റ്റിന് വ്യക്തമാക്കി.
അതേസമയം തമിഴ്നാട് മുഖ്യമന്ത്രി സ്റ്റാലിന് കേരളത്തിന്റെ ആശങ്ക ഉള്ക്കൊണ്ടു. മുല്ലപ്പെരിയാര് ഡാമിലെ ജലനിരപ്പ് ശനിയാഴ്ച വരെ 138 അടിയില് നിലനിര്ത്തും. ഉദ്യോഗസ്ഥതല ചര്ച്ചയിലാണ് തമിഴ്നാടിന്റെ ഉറപ്പ്. ജലനിരപ്പ് 138 അടിയിലെത്തിയാല് സ്പില്വേ വഴി ജലം ഒഴുക്കിക്കളയും. മുല്ലപ്പെരിയാറിലെ ജലനിരപ്പ് 137 അടി കവിയാന് അനുവദിക്കരുതെന്ന് തമിഴ്നാടിനോട് കേരളം ആവശ്യപ്പെട്ടതിനെ തുടര്ന്നാണിത്.
മുല്ലപ്പെരിയാര് അണക്കെട്ടിലെ ജലനിരപ്പ് 138 അടിയിലേക്ക് നീങ്ങുന്നു. വൃഷ്ടിപ്രദേശത്ത് മഴ കുറവായതിനാല് ഡാമിലേക്കുള്ള നീരൊഴുക്ക് കുറവാണ്. 2496 ഘനയടിയായി അണക്കെട്ടിലേക്ക് ഒഴുകിയെത്തുന്ന ജലനിരപ്പ് കുറഞ്ഞിട്ടുണ്ട്. 2200 ഘനയടി ജലം തമിഴ്നാട് വൈഗ അണക്കെട്ടിലേക്ക് കൊണ്ടുപോകുന്നുണ്ട്.
ഇതിനിടെ മുല്ലപ്പെരിയാര് അണക്കെട്ട് സന്ദര്ശിക്കാന് എത്തിയ ഡീന് കുര്യാക്കോസ് എം.പിയെ കേരള പൊലീസ് തടഞ്ഞു. സന്ദര്ശനത്തിന് തമിഴ്നാട് അനുമതി നല്കിയിരുന്നതായി ഡീന് പറഞ്ഞു. അതേ സമയം പ്രത്യേക സുരക്ഷാ മേഖലയായതിനാലാണ് അനുമതി നിഷേധിച്ചതെന്നാണ് പൊലീസ് വിശദീകരണം.
"
https://www.facebook.com/Malayalivartha