ഓണ്‍ലൈന്‍ ക്ലാസ് എടുക്കവേ കുട്ടികളോട് വീഡിയോ ഓണാക്കാന്‍ ടീച്ചര്‍ ആവശ്യപ്പെട്ടു.... എല്ലാരേം എനിക്കൊന്നു കാണാനാ... വീഡിയെ ഓണാക്കി ടീച്ചര്‍ എല്ലാരോടും സംസാരിച്ചു... ആ ക്ലാസ് ടീച്ചറുടെ അവസാനത്തെ ക്ലാസ് ആകുമെന്ന് ആരും കരുതിയില്ല, ക്ലാസ് അവസാനിപ്പിച്ച അധ്യാപിക അതേ സ്ഥലത്ത് കുഴഞ്ഞ് വീണ് മരിച്ചു.... സങ്കടം അടക്കാനാവാതെ കുട്ടികളും രക്ഷകര്‍ത്താക്കളും. കള്ളാര്‍ അടോട്ടുകയ ഗവ. വെല്‍ഫെയര്‍ എല്‍.പി. സ്‌കൂള്‍ അധ്യാപിക കള്ളാര്‍ ചുള്ളിയോടിയിലെ സി. മാധവി ടീച്ചര്‍ (47) ആണ് മരിച്ചത്.

ബുധനാഴ്ച രാത്രി 7.30-നാണ് ഓണ്‍ലൈന്‍ ക്ലാസ് തുടങ്ങിയത്. മൂന്നാം ക്ലാസിലെ കുട്ടികള്‍ക്കു കണക്ക് വിഷയത്തിലായിരുന്നു ക്ലാസ്. 'വീഡിയോ ഓണ്‍ ആക്ക്യേ, എല്ലാരേം എനിക്കൊന്ന് കാണാനാ'. ടീച്ചര്‍ ഇങ്ങനെ പറയുന്നത് പതിവില്ലെന്ന് പറഞ്ഞ് കുട്ടികളും രക്ഷിതാക്കളും പറയുന്നു. കുട്ടികള്‍ വീഡിയോ ഓണാക്കിയപ്പോള്‍ ഓരോ കുട്ടിയോടും സംസാരിച്ചു. ക്ലാസ് തുടങ്ങി ഏതാനും മിനിറ്റ് കഴിഞ്ഞപ്പോഴേക്കും ചുമ അനുഭവപ്പെട്ടു.

'എന്താ ടീച്ചറേ പറ്റിയതെന്ന് ചോദിച്ച കുട്ടികളോട്, 'ഓ! അതൊന്നും സാരമില്ല. തണുപ്പടിച്ചതാ' എന്നുകൂടി പറഞ്ഞ് ഹോംവര്‍ക്കും നല്‍കി.അതിനുശേഷം ചുമയുണ്ട് കുട്ടികളേ, ശ്വാസം മുട്ടുന്നുമുണ്ട്. ബാക്കി അടുത്ത ക്ലാസിലെടുക്കാം...' ഇത്രയും പറഞ്ഞ് ഓണ്‍ലൈന്‍ ക്ലാസ് അവസാനിപ്പിച്ച അധ്യാപിക അതേ സ്ഥലത്ത് കുഴഞ്ഞുവീണാണ് മരിച്ചത്.

സംഭവം നടക്കുമ്പോള്‍ വീട്ടില്‍ ആരുമുണ്ടായിരുന്നില്ല. സഹോദരന്റെ മകന്‍ രതീഷിനോട് നേരത്തെ ദേഹാസ്വസ്ഥ്യം അനുഭവപ്പെടുന്നതിനെക്കുറിച്ച് പറഞ്ഞിരുന്നു. ഇദ്ദേഹം എത്തിയപ്പോള്‍ കണ്ടത് മാധവി വീണുകിടക്കുന്നതാണ്. ഉടന്‍ പൂടങ്കല്ലിലെ താലൂക്ക് ആസ്പത്രിയിലെത്തിച്ചെങ്കിലും മരിച്ചിരുന്നു.