ഒരു പാലമിട്ടാല്‍ തിരികെ അങ്ങോട്ടും പാലം കിട്ടുമെന്ന് തെളിയിക്കുന്നതാണ് കാഞ്ഞിരപ്പള്ളിയില്‍ ഇന്നലെ നടന്ന സംഭവങ്ങള്‍. കൊച്ചിയില്‍ റോഡ് തടസപ്പെടുത്തി ഉപരോധ സമരം ചെയ്ത കോണ്‍ഗ്രസുകാരുടെ കഥ നമ്മള്‍ കേട്ടതാണ്. ജോജു ജോര്‍ജ് ജനകീയ സ്റ്റാര്‍ ആവുകയും കോണ്‍ഗ്രസുകാര്‍ വെറുക്കപ്പെട്ടവരാകുകയും ചെയ്തു. റോഡ് തടസപ്പെടുത്തി സമരം ചെയ്യുന്നവര്‍ക്ക് ഇതൊരു അനുഭവമാകുകയും ചെയ്യും.

എന്നാല്‍ കൊടുത്താല്‍ കൊല്ലത്തും കിട്ടുന്നതു പോലെയായി കാര്യങ്ങള്‍. ജോജുവിന് വച്ചത് ഷാജി കൈലാസിനും പൃഥ്വിരാജിനും കിട്ടിയെന്ന് പറഞ്ഞാല്‍ മതി. പകരത്തിന് പകരം എന്ന് പറയാറില്ലേ. കാഞ്ഞിരപ്പള്ളിയിലെ ഷാജി കൈലാസിന്റെ സെറ്റില്‍ യൂത്ത് കോണ്‍ഗ്രസുകാര്‍ മേഞ്ഞു എന്ന് പറഞ്ഞാല്‍ മതി. റോഡ് തടസപ്പെടുത്തി ഷൂട്ടിംഗ് നടത്തി എന്നാണ് ആരോപണം. കൊച്ചിയില്‍ ജോജു ജോര്‍ജുമായി ഉണ്ടായ തര്‍ക്കത്തിന് പിന്നാലെ ആണ് യൂത്ത് കോണ്‍ഗ്രസ് പ്രവര്‍ത്തകര്‍ ജോജു ജോര്‍ജിനെതിരെ മുദ്രാവാക്യം വിളിച്ച് സിനിമ സെറ്റിലേക്ക് പ്രതിഷേധം നടത്തിയത്.

ഇന്നലെ ഉച്ചകഴിഞ്ഞാണ് കാഞ്ഞിരപ്പള്ളിയില്‍ നാടകീയ സംഭവങ്ങള്‍ അരങ്ങേറിയത്. ഷാജി കൈലാസ് സംവിധാനം ചെയ്യുന്ന പൃഥ്വിരാജ് സിനിമയായ കടുവ ലൊക്കേഷനിലാണ് സംഭവം. കാഞ്ഞിരപ്പള്ളി കുന്നും ഭാഗത്ത് കടുവയുടെ ഷൂട്ടിങ് നടക്കുന്നതിനിടെയാണ് നാടകീയമായ സംഭവം അരങ്ങേറിയത്. ഒരു വിഭാഗം യൂത്ത് കോണ്‍ഗ്രസ് പ്രവര്‍ത്തകരാണ് പ്രതിഷേധവുമായി രംഗത്തുവന്നത്. പൊന്‍കുന്നത്ത് സമീപം ചിറക്കടവില്‍ പ്രവര്‍ത്തിക്കുന്ന യൂത്ത് കോണ്‍ഗ്രസ് ചിറക്കടവ് മണ്ഡലം കമ്മിറ്റിയുടെ നേതൃത്വത്തില്‍ ആണ് കാഞ്ഞിരപ്പള്ളിയില്‍ കുന്നും ഭാഗത്ത് എത്തി പ്രതിഷേധം നടത്തിയത്.

പൃഥ്വിരാജ്, അലന്‍സിയര്‍,കലാഭവന്‍ ഷാജോണ്‍, അര്‍ജുന്‍ അശോകന്‍ തുടങ്ങിയ പ്രമുഖ താരങ്ങള്‍ സെറ്റില്‍ ഷൂട്ടിങ്ങില്‍ പങ്കെടുക്കുമ്പോഴാണ് യൂത്ത് കോണ്‍ഗ്രസ് പ്രതിഷേധം. സംഘട്ടന രംഗങ്ങള്‍ ചിത്രീകരിക്കുന്നതിന്റെ ഇടയില്‍ ആണ് പ്രതിഷേധമാര്‍ച്ച് എത്തിയത്. റോഡ് തടസ്സപ്പെടുത്തി ഷൂട്ടിംഗ് നടത്തി എന്ന് ആരോപിച്ചാണ് ചിറക്കടവ് യൂത്ത് കോണ്‍ഗ്രസ് മണ്ഡലം കമ്മിറ്റിയുടെ നേതൃത്വത്തില്‍ സിനിമ ചിത്രീകരണ സെറ്റിലേക്ക് പ്രതിഷേധം നടത്തിയത്.

അതേസമയം സംഭവസ്ഥലത്ത് പ്രതിഷേധം എത്തിയതോടെയാണ് നാടകീയമായ മറ്റു ചില നീക്കങ്ങള്‍ ഉണ്ടായത്. സിനിമ ചിത്രീകരണ വേദിയില്‍ ഇതിനു സഹായവുമായി കാഞ്ഞിരപ്പള്ളിയിലെ യൂത്ത് കോണ്‍ഗ്രസ് പ്രവര്‍ത്തകര്‍ ഉണ്ടായിരുന്നു. ഈ പ്രവര്‍ത്തകര്‍ തന്നെ ചിറക്കടവില്‍ നിന്നെത്തിയ യൂത്ത് കോണ്‍ഗ്രസ് പ്രവര്‍ത്തകരെ തടയുകയായിരുന്നു. കാഞ്ഞിരപ്പള്ളിയിലെ യൂത്ത് കോണ്‍ഗ്രസ് പ്രവര്‍ത്തകര്‍ പ്രതിഷേധമാര്‍ച്ച് തടഞ്ഞതോടെ ഇരുവര്‍ക്കുമിടയില്‍ നേരിയ വാക്കേറ്റമുണ്ടായി. പിന്നീട് പോലീസ് ഉള്‍പ്പെടെ സ്ഥലത്ത് എത്തിയാണ് പ്രതിഷേധം തണുപ്പിച്ചത്.

റോഡ് തടസപ്പെടുത്തി ആണ് ചിത്രീകരണം നടത്തിയത് എന്ന് ആരോപിച്ച് കൊണ്ടാണ് ചിറക്കടവില്‍ നിന്നുള്ള യൂത്ത് കോണ്‍ഗ്രസ് പ്രവര്‍ത്തകര്‍ പ്രതിഷേധം നടത്തിയത്. ഇതുവഴി പോകുന്ന മുഴുവന്‍ വാഹനങ്ങളും തിരിച്ചുവിട്ടത് അംഗീകരിക്കാന്‍ ആകില്ല എന്ന് യൂത്ത് കോണ്‍ഗ്രസ് ചിറക്കടവ് മണ്ഡലം കമ്മറ്റി വ്യക്തമാക്കി. ഇന്ധന വിലവര്‍ദ്ധനവ് വന്‍തോതില്‍ ഉയര്‍ന്നു നില്‍ക്കുന്ന സമയത്ത് ഷൂട്ടിങ്ങിനു വേണ്ടി വാഹനങ്ങളെ തിരിച്ചുവിടുന്നത് അംഗീകരിക്കാനാകില്ല എന്ന് ചിറക്കടവ് യൂത്ത് കോണ്‍ഗ്രസ് മണ്ഡലം കമ്മിറ്റി പറയുന്നു. ഓട്ടോ ഡ്രൈവര്‍ ഉള്‍പ്പെടെയുള്ളവര്‍ ഇന്ധന വില വര്‍ധനവില്‍ നട്ടം തിരിയുമ്പോള്‍ ആണ് വാഹനങ്ങള്‍ തിരിച്ചുവിടുന്നു എന്നത് അംഗീകരിക്കാനാവില്ല എന്ന് യൂത്ത് കോണ്‍ഗ്രസ് പ്രവര്‍ത്തകര്‍ പ്രതികരിച്ചു.

പ്രതിഷേധ മാര്‍ച്ചിനിടെ ചലച്ചിത്ര നടനായ ജോജു ജോര്‍ജിനെതിരെ മുദ്രാവാക്യങ്ങള്‍ വിളിച്ചു കൊണ്ടാണ് ചിറക്കടവില്‍ നിന്നുള്ള യൂത്ത് കോണ്‍ഗ്രസ് പ്രവര്‍ത്തകര്‍ പ്രതിഷേധം നടത്തിയത് എന്നതാണ് ശ്രദ്ധേയം. പൃഥ്വിരാജ് ഉള്‍പ്പെടെ വലിയ താരനിരയാണ് കടുവ സിനിമയിലുള്ളത്. അവര്‍ ഇടപെടും മുമ്പേ കാഞ്ഞിരപ്പള്ളി യൂത്ത് കോണ്‍ഗ്രസുകാര്‍ ചിറക്കടവ് യൂത്തു കോണ്‍ഗ്രസുകാരെ തടഞ്ഞു. അതോടെ അവര്‍തമ്മില്‍ കൂട്ടക്കലിപ്പായി. അവസാനം ഷാജി കൈലാസ് ചിത്രം പോലെ എല്ലാം ശുഭം.