അയ്യപ്പന്മാരും ദുരിതത്തില്... തുടര്ച്ചയായി പെയ്യുന്ന മഴയില് വിറങ്ങലിച്ച് കേരളം; ഏഴ് ജില്ലകളില് ഒറ്റപ്പെട്ടയിടങ്ങളില് ഇടിയോടുകൂടിയ മഴയ്ക്കു സാധ്യത; കന്യാകുമാരി ട്രാക്കില് വീണ്ടും മണ്ണിടിച്ചില്; ട്രെയിനുകള് റദ്ദാക്കി; ശബരിമല തീര്ത്ഥാടകരും വലിയ ദുരിതത്തില്
മാറിമറിഞ്ഞ കാലാവസ്ഥയില് കേരളം ആകെ ബുദ്ധിമുട്ടിലാണ്. മഴ തുടരുമെന്നാണ് കാലാവസ്ഥാ പ്രവചനം. സംസ്ഥാനത്ത് ഇന്നും ശക്തമായ മഴ തുടരുമെന്ന് കേന്ദ്ര കാലാവസ്ഥാ വകുപ്പ് അറിയിച്ചു. എറണാകുളം, തൃശൂര്, കോഴിക്കോട്, വയനാട്, കണ്ണൂര്, കാസര്കോട് ജില്ലകളില് ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. ബംഗാള് ഉള്ക്കടലിലെ ന്യൂനമര്ദം, അറബിക്കടലിലെ ചക്രവാതചുഴി എന്നിവയാണ് കനത്ത മഴയ്ക്ക് ഇടയാക്കിയത്. രണ്ടു ദിവസം കൂടി സംസ്ഥാനത്ത് പരക്കെ മഴ ലഭിക്കും.
അടുത്ത മണിക്കൂറില് കേരളത്തില് കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര് എന്നീ ജില്ലകളില് ഒറ്റപ്പെട്ടയിടങ്ങളില് ഇടിയോടുകൂടിയ മഴയ്ക്കും മണിക്കൂറില് 40 കി.മി വരെ വേഗതയില് വീശിയടിച്ചേക്കാവുന്ന കാറ്റിനും സാധ്യതയുണ്ട്. എല്ലാ ജില്ലകളിലും മഴ തുടരുന്നതിനാല് റെഡ് അലര്ട്ടിന് സമാനമായ മുന്നൊരുക്കങ്ങള് നടത്താന് ദുരന്ത നിവാരണ അതോറിറ്റി ആവശ്യപ്പെട്ടു.
കനത്ത മഴയെത്തുടര്ന്ന് ആലപ്പുഴ, കൊല്ലം, പത്തനംതിട്ട ജില്ലകളില് വിദ്യാഭ്യാസ സ്ഥാപനങ്ങള്ക്ക് ഇന്ന് അവധി പ്രഖ്യാപിച്ചു. പ്രഫഷനല് കോളജുകള്ക്ക് ഉള്പ്പെടെ അവധി ബാധകമാണ്. കോട്ടയം, ഇടുക്കി, എറണാകുളം, തൃശൂര് ജില്ലകളിലും എല്ലാ വിദ്യാഭ്യാസ സ്ഥാപനങ്ങള്ക്കും ഇന്ന് അവധിയാണ്.
കാസര്കോട് ജില്ലയില് സ്കൂളുകള്ക്ക് അവധിയാണ്. എന്നാല് കോളജുകള്ക്ക് അവധി ബാധകമല്ല. തിരുവനന്തപുരത്ത് കാട്ടാക്കട, നെടുമങ്ങാട് താലൂക്കുകളിലെ സ്കൂളുകള്ക്ക് ഇന്ന് അവധിയാണ്. എംജി, കേരള, കുസാറ്റ്, കുഫോസ്, ആരോഗ്യ, സാങ്കേതിക സര്വകലാശാലകള് ഇന്ന് നടത്താനിരുന്ന എല്ലാ പരീക്ഷകളും മാറ്റിവച്ചു.
കേരള, എംജി സര്വകലാശാലകള് ചൊവ്വാഴ്ച നടത്താന് നിശ്ചയിച്ച എല്ലാ പരീക്ഷകളും മാറ്റി. പുതുക്കിയ തീയതി പിന്നീട് അറിയിക്കും. തിരുവനന്തപുരത്ത് കാട്ടാക്കട, നെടുമങ്ങാട്, നെയ്യാറ്റിന്കര താലൂക്കുകളില് ചൊവ്വാഴ്ച പ്രഖ്യാപിച്ചിട്ടുള്ള അവധി സ്കൂളുകള്ക്കു മാത്രമാണെന്ന് ജില്ലാ ഭരണകൂടം അറിയിച്ചു.
ശബരിമല തീര്ത്ഥാടകരും ദുരിതത്തിലാണ്. ശബരിമലയിലേക്കുള്ള പ്രധാന റോഡുകള് എല്ലാം വെള്ളത്തില് മുങ്ങി. പുനലൂര്-മൂവാറ്റുപുഴ, പന്തളം-പത്തനംതിട്ട റോഡുകളില് ഗതാഗത തടസ്സം. ത്രിവേണിയില് പമ്പ കരകവിഞ്ഞു. അച്ചന്കോവിലാറ്റില് ജലനിരപ്പ് ഉയര്ന്നു.
തിരുവനന്തപുരം കന്യാകുമാരി റെയില്വേ ട്രാക്കില് ഇന്നലെ വീണ്ടും മണ്ണിടിച്ചില് ഉണ്ടായി. കുഴിത്തുറയ്ക്ക് സമീപം പള്ളിയാടിയിലാണ് മണ്ണിടിഞ്ഞത്. പാറശാല മുതല് നാഗര്കോവില് വരെയുള്ള ട്രാക്കില് കഴിഞ്ഞ രണ്ട് ദിവസങ്ങളിലായി അഞ്ചിടങ്ങളില് ഇടിഞ്ഞു വീണ മണ്ണ് നീക്കം ചെയ്യുന്നതിനിടെയാണ് വീണ്ടും മണ്ണിടിയുന്നത്. എരണിയല്, കുഴിത്തുറ ഭാഗങ്ങളിലെ വെള്ളക്കെട്ട് കുറഞ്ഞിട്ടുണ്ട്. ഈ റൂട്ടില് ട്രെയിന് സര്വീസ് പുനരാരംഭിക്കാന് രണ്ടു ദിവസമെങ്കിലുമെടുക്കും.
നാഗര്കോവില്തിരുവനന്തപുരം എക്സ് പ്രസ്, തിരുവനന്തപുരംനാഗര്കോവില് എക്സ് പ്രസ് എന്നിവയുടെ ഇന്നത്തെ സര്വീസുകള് റദ്ദാക്കി. നാഗര്കോവില് റൂട്ടിലോടുന്ന 17 ട്രെയിന് സര്വീസുകള് ഭാഗികമായി റദ്ദാക്കിയിട്ടുണ്ട്.
തിരുനെല്വേലിഗാന്ധിദാം ഹംസഫര് എക്സ് പ്രസ് 18ന് തിരുവനന്തപുരത്തു നിന്ന് പുറപ്പെടും. ഇന്ന് കന്യാകുമാരിബംഗളൂരു എക്സ് പ്രസ് കൊല്ലത്തു നിന്നും നാഗര്കോവില്കോട്ടയം എക്സ് പ്രസ് കായംകുളത്തു നിന്നും പുനലൂര്മധുര എക്സ് പ്രസ് തിരുനെല്വേലിയില് നിന്നും കൊല്ലംചെന്നൈ എക്സ് പ്രസ് നാഗര്കോവിലില് നിന്നും നാഗര്കോവില്മംഗളൂരു പരശുറാം എക്സ് പ്രസ്, നാഗര്കോവില് മംഗളൂരു ഏറനാട് എക്സ് പ്രസ് എന്നിവ തിരുവനന്തപുരത്തു നിന്നും തിരുവനന്തപുരംതിരുച്ചിറപ്പള്ളി ഇന്റര്സിറ്റി എക്സ് പ്രസ് തിരുനെല്വേലിയില് നിന്നും സര്വീസ് ആരംഭിക്കും. എന്തായാലും മഴ ഒന്ന് കുറയണേ എന്ന പ്രാര്ത്ഥനയിലാണ് മലയാളികള്
"
https://www.facebook.com/Malayalivartha
