തമിഴ്‌നാട്ടില്‍ അണ്ണാച്ചിമാര്‍ തമ്മില്‍ കൂട്ടയടി നടക്കുകയാണ്. ജയ് ഭീം സിനിമയാണ് വിഷയം. സിനിമ ഇറങ്ങിയതും സിനിമാ സ്റ്റൈലില്‍ നടന്‍ സൂര്യയെ ചാടിച്ചവിട്ടുമെന്ന അവസ്ഥയിലാണ്. ചാടിച്ചവിട്ടാതിരിക്കാന്‍ ആവശ്യപ്പെടുന്നത് 5 കോടിയും.

കൊറോണ സമയത്ത് വളരെ കാലങ്ങള്‍ക്ക് ശേഷമാണ് സിനിമ സജീവമായി വന്നത്. അതിനിടയ്ക്കാണ് സൂര്യയുടെ ജയ്ഭീം വന്നതും ചാടിച്ചവിട്ട് വിവാദം വന്നതും. ഇപ്പോള്‍ പോലീസിന്റെ സഹായമില്ലാതെ താരത്തിന് പുറത്തിറങ്ങാനും സാധിക്കുന്നില്ല. എവിടെ നിന്നാണ് ചാടിച്ചവിട്ട് വരുന്നതെന്നറിയില്ല. സൂര്യയുടെ വസതിക്കു പൊലീസ് സംരക്ഷണം ഏര്‍പ്പെടുത്തി. നടനു പിന്തുണയുമായി തമിഴ് സിനിമാ പ്രവര്‍ത്തകര്‍ രംഗത്തെത്തി.

ജയ് ഭീം സിനിമ വണ്ണിയര്‍ സമുദായത്തെ അപമാനിക്കുന്നതാണെന്ന് ആരോപിച്ച്, നടന്‍ സൂര്യയെ ചവിട്ടുന്നവര്‍ക്ക് പാട്ടാളി മക്കള്‍ കക്ഷി മയിലാടുതുറൈ ജില്ലാ നേതാവാണ് ഒരു ലക്ഷം രൂപ പാരിതോഷികം പ്രഖ്യാപിച്ചത്. ഭീഷണി മുഴക്കിയ എ. പളനിസാമിക്കെതിരെ പൊലീസ് കേസെടുത്തു. അതോടെ അണ്ണനിനി ചാടിച്ചവിട്ടാന്‍ പറ്റില്ല.

ഏറെ രസകരമാണ് സംഭവം. സിനിമയില്‍ ആദിവാസി യുവാവിനെ മര്‍ദിച്ചു കൊല്ലാന്‍ നേതൃത്വം നല്‍കിയ പൊലീസ് ഇന്‍സ്‌പെക്ടറെ വണ്ണിയര്‍ സമുദായ അംഗമായി അവതരിപ്പിച്ചുവെന്നാണ് ആക്ഷേപം.

അഞ്ചുകോടി രൂപ നഷ്ടപരിഹാരം ആവശ്യപ്പെട്ട് നേതാക്കള്‍ വക്കീല്‍ നോട്ടീസ് താരത്തിന് കിട്ടിയിട്ടുണ്ട്. സൂര്യ, ജ്യോതിക, സംവിധായകന്‍ ടിജെ ജ്ഞാനവേല്‍, ആമസോണ്‍ പ്രൈം എന്നിവര്‍ മാപ്പ് പറയണമെന്നും സമുദായം ആവശ്യപ്പെട്ടു. സിനിമയിലൂടെ സമുദായത്തിന്റെ പ്രതിച്ഛായ തകര്‍ന്നുവെന്നും ഇവര്‍ പറയുന്നു. അതേസമയം വണ്ണിയാര്‍ സമുദായ നേതാക്കളുടെ ആരോപണം സൂര്യ നിഷേധിച്ചിട്ടുണ്ട്.

അമ്മയെ തല്ലിയാലും രണ്ടുപക്ഷമെന്ന പോലെ സിനിമാ വിവാദത്തിലും രണ്ട് ചേരിയിലായി. ജയ് ഭീം സിനിമയുമായി ബന്ധപ്പെട്ട വിവാദങ്ങളില്‍ നടന്‍ സൂര്യയെ പിന്തുണച്ച് സംവിധായകന്‍ വെട്രിമാരന്‍ രംഗത്തെത്തി.

ശരിയായ കാര്യം ചെയ്യുന്നതിന്റെ പേരില്‍ ആരെയും താഴ്ത്തിക്കെട്ടാന്‍ കഴിയില്ലെന്ന് വെട്രിമാരന്‍ പറഞ്ഞു. താരപദവിയെ പുനര്‍നിര്‍വചിക്കുന്ന നടനാണ് സൂര്യയെന്നും അദ്ദേഹത്തോടൊപ്പം നില്‍ക്കുന്നുവെന്നും വെട്രിമാരന്‍ വ്യക്തമാക്കി.

ഇരകളുടെ അവസ്ഥ ലോകത്തെ അറിയിക്കുന്നതിനായി സിനിമ ചെയ്യാനുള്ള സംവിധായകന്‍ ജ്ഞാനവേലിന്റെ സാമൂഹ്യ പ്രതിബദ്ധതയും സാമൂഹിക നീതിക്കുവേണ്ടിയുള്ള സ്‌ക്രീനിലും പുറത്തും സൂര്യ നടത്തുന്ന നിരന്തര പരിശ്രമവും ശരിക്കും പ്രചോദനമാണ്. നിലവിലെ അവസ്ഥ മാറാന്‍ ആഗ്രഹിക്കാത്തവരില്‍ ഇങ്ങനെയുള്ള സിനിമകള്‍ അസ്വസ്ഥതയുണ്ടാക്കുന്നത് സ്വാഭാവികമാണ്. അസമത്വങ്ങളെയും അനീതികളെയും ചോദ്യം ചെയ്യുന്ന സിനിമകളും സാമൂഹ്യനീതിക്കുള്ള ആയുധങ്ങളാണ്. സൂര്യയ്‌ക്കൊപ്പവും ജയ് ഭീമിന്റെ മുഴുവന്‍ ടീമിനൊപ്പം ഞങ്ങള്‍ നിലകൊള്ളുന്നു വെട്രിമാരന്‍ വ്യക്തമാക്കി.

നവംബര്‍ 2ന് ആമസോണ്‍ െ്രെപമിലൂടെ റിലീസ് ചെയ്ത ജയ് ഭീം വലിയ ചര്‍ച്ചകള്‍ക്കാണ് തുടക്കമിട്ടിരിക്കുന്നത്. ആദിവാസി വിഭാഗത്തില്‍പ്പെട്ടവര്‍ കാലാകാലങ്ങളായി സമൂഹത്തില്‍ അനുഭവിക്കുന്ന അരക്ഷിതാവസ്ഥയെ ചോദ്യം ചെയ്യുകയാണ് ജയ് ഭീം. ലിജോമോളാണ് ചിത്രത്തില്‍ മറ്റൊരു പ്രധാനകഥാപാത്രത്തെ അവതരിപ്പിച്ചത്. പ്രകാശ് രാജ്, രജിഷ വിജയന്‍, മണികണ്ഠന്‍, റാവു രമേഷ് തുടങ്ങിയവരായിരുന്നു ചിത്രത്തിലെ മറ്റു താരങ്ങള്‍.

അതേസമയം ജയ് ഭീം എന്ന ചിത്രം മികച്ച പ്രേക്ഷകപ്രശംസ നേടി രാജ്യത്ത് ചര്‍ച്ചയായിക്കൊണ്ടിരിക്കുകയാണ്. യഥാര്‍ഥ സംഭവങ്ങളെ അടിസ്ഥാനമാക്കി ഒരുക്കിയ ചിത്രം ജാതി വിവേചനത്തെക്കുറിച്ചും ഇരുള ഗോത്രം നേരിടുന്ന വിവേചനങ്ങളെക്കുറിച്ചുമാണ് സംസാരിക്കുന്നത്. ഇതിനിടെയാണ് ഇത് തങ്ങളെ ഉദ്ദേശിച്ചാണന്നും തങ്ങളെ മാത്രം ഉദ്ദേശിച്ചാണെന്നും പറഞ്ഞ് ചാടിച്ചവിട്ടുകാര്‍ രംഗത്തെത്തിയത്.