സി പി എമ്മിന് സി പി ഐ യുടെ യമണ്ടന്‍ പണി. പിണറായി സര്‍ക്കാരിന്റെ തിരിച്ചുവരവിന് കാരണമായ ഭക്ഷൃ കിറ്റ് തുടര്‍ന്ന് നല്‍കേണ്ടതില്ലെന്ന് സി പി ഐ തീരുമാനിച്ചു.

പിണറായി വിജയന് തുടര്‍ ഭരണം ലഭിക്കുന്നതില്‍ പ്രധാന പങ്കുവഹിച്ച സൗജന്യ ഭക്ഷ്യക്കിറ്റ് വിതരണം നിര്‍ത്തലാക്കുന്നു. ഭക്ഷ്യമന്ത്രി ജി ആര്‍ അനിലാണ് ഇക്കാര്യം അറിയിച്ചത്.

കൊവിഡ് സമയത്തെ സ്തംഭനാവസ്ഥ പരിഗണിച്ചാണ് റേഷന്‍ കടകള്‍ വഴി കിറ്റ് വിതരണം ചെയ്തതെന്നും വിലക്കയറ്റത്തിന്റെ സാഹചര്യത്തില്‍ കിറ്റ് നല്‍കില്ലെന്നും മന്ത്രി ഒരു സ്വകാര്യ ചാനലിനോട് സംസാരിക്കവെ വ്യക്തമാക്കി.'കിറ്റ് വീണ്ടും തുടങ്ങില്ല. ആളുകള്‍ക്ക് ജോലി പോലും ഇല്ലാതിരുന്ന കാലത്താണ് കിറ്റ് നല്‍കിയത്. ഇപ്പോള്‍ തൊഴില്‍ ചെയ്യാന്‍ പറ്റുന്ന സാഹചര്യമുണ്ട്. വരും മാസങ്ങളില്‍ കിറ്റ് കൊടുക്കുന്ന കാര്യം സര്‍ക്കാരിന്റെ പരി?ഗണനയിലോ ആലോചനയിലോ ഇല്ല. പൊതു മാര്‍ക്കറ്റില്‍ നന്നായി ഇടപെടുന്ന നിലപാടാണ് കേരളത്തില്‍ ഇടത് സര്‍ക്കാര്‍ സ്വീകരിച്ചിട്ടുള്ളത്. സപ്ലൈക്കോ വഴിയും കണ്‍സ്യൂമര്‍ഫെഡും ന്യായ വിലയ്ക്ക് സാധനങ്ങള്‍ ലഭ്യമാക്കുന്നുണ്ട്. കഴിഞ്ഞ ആറ് വര്‍ഷമായി പതിമൂന്ന് നിത്യോപയോ?ഗ സാധനങ്ങള്‍ക്ക് സപ്ലൈക്കോയില്‍ വില വര്‍ദ്ധിപ്പിച്ചിട്ടില്ല. രാജ്യത്തൊട്ടാകെയുള്ള വിലക്കയറ്റം കേരളത്തെ ബാധിക്കാതിരിക്കാന്‍ വേണ്ടതെല്ലാം സര്‍ക്കാര്‍ ചെയ്യുന്നുണ്ടെന്നും മന്ത്രി പറഞ്ഞു.

കിറ്റ് വിതരണം തുടരില്ലെന്ന് നേരത്തേ തന്നെ സര്‍ക്കാര്‍ വൃത്തങ്ങള്‍ സൂചിപ്പിച്ചിരുന്നു. സൗജന്യ കിറ്റുവിതരണം സര്‍ക്കാരിന് വന്‍ സാമ്പത്തിക ബാദ്ധ്യത ഉണ്ടാക്കിയ സാഹചര്യത്തിലായിരുന്നു ഇത്. കൊവിഡ് സമയത്ത് വരുമാനം നിലച്ച സാഹചര്യത്തില്‍ കിറ്റ് വിതരണം ജനനങ്ങള്‍ക്ക് ഏറെ സഹായകമായിരുന്നു.

തമിഴ്‌നാടിനെ അനുകരിച്ചാണ് കേരളത്തിലും ഭക്ഷ്യ കിറ്റ് നല്‍കി തുടങ്ങിയത്. പിണറായി വിജയന്റെ പ്രചരണ ചുമതലയുണ്ടായിരുന്ന ഏജന്‍സിയാണ് കിറ്റ് വിതരണമെന്ന ആശയം കണ്ടെത്തിയതെന്ന് അക്കാലത്ത് പ്രചരണമുണ്ടായിരുന്നു. അതെന്തു തന്നെയായാലും കിറ്റ് വലിയൊരു അനുഗ്രഹമായിരുന്നു. കോവിഡ് കാലത്ത് ലക്ഷകണക്കിനാളുകള്‍ പട്ടിണി കിടക്കാത്തത് പിണറായിയുടെ കിറ്റ് ഉണ്ടായിരുന്നതുകൊണ്ടാണ്. സി പി ഐ ക്കായിരുന്നു അന്നും ഭക്ഷ്യ വകുപ്പിന്റെ ചുമതല. എന്നാല്‍ പിണറായിയുടെ കടുംപിടുത്തത്തില്‍ നടന്നതു കൊണ്ട് സി പി ഐ യുടെ അട്ടിമറി നടന്നില്ല.

കിറ്റ് തുടര്‍ന്നും നല്‍കണമെന്ന ആവശ്യം സി പി എമ്മാണ് മുന്നോട്ടുവച്ചത്.എന്നാല്‍ സാമ്പത്തിക പ്രതിസന്ധി ചൂണ്ടിക്കാണിച്ച് സിപിഐ അക്കാര്യം നിഷേധിച്ചു. ധനമന്ത്രി കെ.എന്‍ .ബാലഗോപാലിനും കിറ്റ് തുടര്‍ന്നും നല്‍കുന്നതിനോട് താത്പര്യമില്ല.എന്നാല്‍ സി പി എമ്മിന്റെ തീരുമാനം അവഗണിക്കാന്‍ ബാലഗോപാലിന് കഴിയില്ല.

കിറ്റ് നല്‍കാനുള്ള സഹായം ചോദിച്ചെത്തിയ ഫയല്‍ ധനവകുപ്പ് നിരാകരിക്കുകയാണ് ചെയ്തത്. കാര്‍ഡ് ഉടമകള്‍ക്കെല്ലാം കിറ്റ് നല്‍കുന്നത് പ്രായോഗികമല്ലെന്നാണ് ധനവകുപ്പ് പറഞ്ഞത്. നയപരമായ വിഷയമായതിനാല്‍ ധനമന്ത്രി പ്രസ്തുത ഫയല്‍ കാണേണ്ടതായിരുന്നു.എന്നാല്‍ സാമ്പത്തിക ചെലവുള്ള ഫയലുകളൊന്നും തനിക്ക് അയക്കേണ്ടതില്ലെന്നാണ് ധനമന്ത്രിയു ടെ തീരുമാനം. ഇതിന്റെ അടിസ്ഥാനത്തില്‍ ഉദ്യോഗസ്ഥര്‍ തന്നെ ഫയല്‍ മടക്കി എന്നാണ് ലഭിക്കുന്ന സൂചനകള്‍.

കിറ്റ് നിര്‍ത്തലാക്കിയ കാര്യം തത്കാലം ആരെയും അറിയിക്കരുതെന്നാണ് സി പി എം സിപിഐയെ അറിയിച്ചത്.എന്നാല്‍ തീരുമാനമെടുത്ത വേളയില്‍ തന്നെ ഭക്ഷ്യമന്ത്രി അക്കാര്യം പരസ്യമാക്കി. ഇതില്‍ നിന്നെല്ലാം സി പി ഐ യും സി പി എമ്മും തമ്മിലുള്ള പടല പിണക്കത്തിന്റെ കഥയാണ് വ്യക്തമാവുന്നത്.

മന്ത്രി അനിലിന്റെ പ്രസ്താവനക്ക് മുഖ്യമന്ത്രിയുടെ അംഗീകാരമുണ്ടോ എന്ന് വ്യക്തമല്ല. അങ്ങനെയുണ്ടെങ്കില്‍ തന്നെ രഹസ്യം പരസ്യമാക്കിയതില്‍ മുഖ്യമന്ത്രിക്ക് അതൃപ്തിയുണ്ടാവുമെന്ന് തീര്‍ച്ച.