ദത്തെടുക്കല്‍ വിവാദത്തിന് പുതിയ മാനം നല്‍കി അനുപമ എസ് ചന്ദ്രന്റെ കുഞ്ഞിനെ നാളെ കേരളത്തിലെത്തിക്കും. ഒരു ഡിവൈഎസ്പി ഉള്‍പ്പെടെ മൂന്ന് പൊലീസുകാരും ശിശുക്ഷേമ സമിതിയിലെ ഒരു ഉദ്യോഗസ്ഥയും ഇന്നു രാവിലെ ഹൈദരാബാദില്‍ എത്തി.


കോടതി ഉത്തരവിന്റെ പകര്‍പ്പ് കാണിച്ച് കുഞ്ഞിനെ ദത്തെടുത്ത ആന്ധ്രയിലെ മാതാപിതാക്കളില്‍ നിന്നും കുട്ടിയെ ഇന്ന് തന്നെ ഏറ്റെടുക്കാനാണ് തീരുമാനം. എന്നാല്‍ കുഞ്ഞിനെ ദത്തെടുത്ത ദമ്പതികളുടെ പ്രതികരണം എങ്ങനെയെന്നും വ്യക്തമല്ലാതിനാല്‍ മടക്കം വൈകുമോ എന്നത് വ്യക്തമല്ല.

കുട്ടിയെ ദത്തെടുത്ത ദമ്പതികളില്‍ നിന്ന് എതിര്‍പ്പുണ്ടായാല്‍ ലോക്കല്‍ പോലീസിന്റെ സഹായത്തോടെ കുട്ടിയെ ഏതു വിധേനയും തിരികെ എത്തിക്കാനാണ് നിലവിലുള്ള നിര്‍ദേശം. എന്നാല്‍ ഇക്കാര്യത്തില്‍ ദമ്പതികള്‍ കോടതിയെ സമീപിച്ച് സ്റ്റേ ഓര്‍ഡര്‍ നേടിയിട്ടുണ്ടോ എന്നതും വ്യക്തമല്ല. കുട്ടിയെ വിട്ടുനല്‍കുന്നതില്‍ ആന്ധ്രയിലെ ദമ്പതികളുടെ പ്രതികരണം വ്യക്തമല്ലാത്തതിനാല്‍ ഇന്നു രാവിലെ ഇന്‍ഡിഗോ വിമാനത്തില്‍
ആന്ധ്രയിലേക്കു പോയ സംഘം തിരിച്ചുള്ള വിമാന ടിക്കറ്റ് ഇതുവരെയും ബുക്ക് ചെയ്തിട്ടില്ല.


അവിടുത്തെ സാഹചര്യവും സാങ്കേതിക പ്രശ്നങ്ങളും പരിഗണിച്ചായിരിക്കും കുഞ്ഞുമായുള്ള മടക്കം. അവശ്യസാഹചര്യത്തില്‍ രണ്ടു ദിവസം കൂടി നടപടികള്‍പൂര്‍ത്തിയാക്കാന്‍ സംഘത്തിന് ആന്ധ്രയില്‍ തങ്ങേണ്ടിവന്നേക്കാം. മാധ്യമശ്രദ്ധ ഒഴിവാക്കാന്‍ മുന്നറിയിപ്പില്ലാതെ കുട്ടിയെ തിരുവനന്തപുരത്തേക്ക് കൊണ്ടുവരാനാണ് ശിശുക്ഷേമസമിതിയുടെയും സര്‍ക്കാരിന്റെയും നീക്കം.



കേരളത്തില്‍ നിന്ന് കുഞ്ഞിനെ ഏറ്റെടുക്കാന്‍ എത്തുന്ന കാര്യം കഴിഞ്ഞ ദിവസം ആന്ധ്രാപ്രദേശിലെ ദമ്പതികളെ അറിയിച്ചിരുന്നെങ്കിലും അവരുടെ പ്രതികരണം ഇപ്പോഴും ലഭ്യമായിട്ടില്ല. നിയമപ്രകാരം അവര്‍ ദത്തെടുത്തതാണെന്നും കുട്ടിയെ തിരികെ നല്‍കാനാവില്ലെന്നുമാണ് അവര്‍
മുന്‍പ് പ്രതികരിച്ചിരുന്നത്. നാളെ കുട്ടിയെ തിരുവനന്തപുരത്ത് എത്തിച്ചാല്‍ ജില്ലാ ചൈല്‍ഡ് പ്രൊട്ടക്ഷന്‍ ഓഫീസര്‍ക്കായിരിക്കും നടപടികള്‍ പൂര്‍ത്തിയാക്കുന്നതുവരെ സംരക്ഷണ ചുമതല. ഇതിനിടെ അനുപമയെ കുട്ടിയെ കാണാന്‍ പോലും അനുവദിക്കാനും സാധ്യതയില്ലെന്നാണ് സൂചന.


കുഞ്ഞിന്റെ ഡിഎന്‍എ പരിശോധന നടത്തി അനുപമയാണോ കുട്ടിയുടെ അമ്മ എന്നതില്‍ സ്ഥിരീകരണം ഉറപ്പാക്കും. അമ്മയുടെയും അച്ഛന്റെയും ഡിഎന്‍എ പരിശോധനാ ഫലം കോടതി പരിഗണിച്ചശേഷമായിരിക്കും അനന്തരനടപടികളുണ്ടാവുക. അഞ്ച് ദിവസത്തിനകം കുഞ്ഞിനെ കേരളത്തിലെത്തിക്കാന്‍ ചൈല്‍ഡ് വെല്‍ഫെയര്‍ കമ്മിറ്റി ഇക്കഴിഞ്ഞ വ്യാഴാഴ്ച ഉത്തരവിട്ടിരുന്നു. തിരുവനന്തപുരം ക്രൈംബ്രാഞ്ച് ഡിവൈഎസ്പിക്കായിരിക്കും കേരളത്തിലെത്തിക്കുന്ന കുട്ടിയുടെ സംരക്ഷണ ചുമതല.

അതേസമയം അമ്മഅറിയാതെ കുഞ്ഞിനെ ദത്തുനല്‍കിയ കേസ് തിരുവനന്തപുരം കുടുംബ കോടതിയുടെ പരിഗണനയിലാണ്. കുഞ്ഞിന്റെ ഡിഎന്‍എ പരിശോധന ഉള്‍പ്പെടെ നടത്തിയ റിപ്പോര്‍ട്ട് നല്‍കാന്‍ സി ഡബ്ല്യൂ സിയോട് കോടതി ആവശ്യപ്പെട്ടിരുന്നു. ഡിഎന്‍എ പരിശോധനയ്ക്കായി ദത്തെടുത്ത ദമ്പതികളില്‍ നിന്നും കുഞ്ഞിനെ തിരികെയത്തിക്കാന്‍ നടപടി സ്വീകരിച്ചുവെന്ന് ചൈല്‍ഡ് വെല്‍ഫര്‍ കമ്മിറ്റി കഴിഞ്ഞ ദിവസം കോടതിയെ അറിയിച്ചിരുന്നു.


ആരു മുഖേനയാണ് കുട്ടി ശിശുക്ഷേമ സമിതിയില്‍ എത്തിയതെന്നും കൈമാറ്റം ദത്തടുക്കല്‍ നിയമപ്രകാരമായിരുന്നോ എന്നിവയും കോടതിക്ക് ശിശുക്ഷേമ സമിതിയില്‍ നിന്ന് അറിയേണ്ടതുണ്ട്. കുട്ടിയെ തിരിച്ചുകൊണ്ടുവരാന്‍ ശിശുക്ഷേമ സമിതിയെത്തന്നെ ചുമതലപ്പെടുത്തിയതില്‍ ഉത്കണ്ഠയുണ്ടെന്ന് കാണിച്ച് അനുപമ ബാലാവകാശ കമ്മീഷനും വനിതാ ശിശുവികസന വകുപ്പ് ഡയറക്ടര്‍ക്കും പരാതി നല്‍കിയിരുന്നു.

പൊലീസും ചൈല്‍ഡ് വെല്‍ഫയര്‍ കമ്മിറ്റിയും ശിശുക്ഷേമ സമിതിയും തന്നോട് നീതി കേട് കാട്ടിയെന്നും കുഞ്ഞിന്റെ സുരക്ഷ പരിഗണിച്ച് മതിയായ സംരക്ഷണം നല്‍കി തന്റെ കുഞ്ഞിനെ തിരിച്ചുകൊണ്ടുവരാനുള്ള സാഹചര്യമുണ്ടാക്കണമെന്നും അനുപമ പരാതിയില്‍ ആവശ്യപ്പെട്ടിരുന്നു.