പമ്പാനദിയിലെ പ്രളയഭീഷണി കാരണം ഏര്‍പ്പെടുത്തിയ നിയന്ത്രണങ്ങള്‍ മാറ്റിയതോടെ ശബരിമലയില്‍ തിരക്കേറി. നിയന്ത്രണങ്ങളെ തുടര്‍ന്ന് ഏഴരമണിക്കൂറോളം തീര്‍ത്ഥാടകര്‍ക്ക് ദര്‍ശനം മുടങ്ങിയിരുന്നു.

ഇന്നലെ വെളുപ്പിന് 1.30 മുതല്‍ രാവിലെ 9 വരെ സന്നിധാനത്തേക്ക് ഭക്തരെ വിട്ടില്ല. ശക്തമായ മഴയില്‍ വെള്ളിയാഴ്ച വൈകിട്ട് പമ്പയിലെ ജലനിരപ്പ് ഉയര്‍ന്ന് ആറാട്ടുകടവ് മുതല്‍ മണപ്പുറത്തേക്ക് വെള്ളം കയറിയിരുന്നു.

കക്കി ഡാം തുറക്കുകയും പമ്പാ ഡാമില്‍ റെഡ് അലര്‍ട്ട് പ്രഖ്യാപിക്കുകയും ചെയ്തതോടെയാണ് സന്നിധാനത്തേക്ക് പ്രവേശനം വിലക്കിയത്. ഇതോടെ തീര്‍ത്ഥാടകര്‍ നിലയ്ക്കലില്‍ കുടുങ്ങി. പമ്പയിലെ ഭീഷണി ഒഴിവായെന്ന് ശബരിമല എ. ഡി. എം അര്‍ജ്ജുന്‍ പാണ്ഡ്യ നല്‍കിയ റിപ്പോര്‍ട്ടിന്റെ അടിസ്ഥാനത്തില്‍ ഇന്നലെ രാവിലെ 9 ന് ശേഷമാണ് തീര്‍ത്ഥാടകരെ അയച്ചുതുടങ്ങിയത്. പതിനൊന്നരയോടെ ആദ്യബാച്ച് സന്നിധാനത്ത് എത്തി.

രാത്രി 10.30 വരെ 12,345പേര്‍ മലകയറി. 19,678 പേരാണ് ഇന്നലെ വെര്‍ച്വല്‍ക്യൂവില്‍ ബുക്ക് ചെയ്തിരുന്നത്. സ്‌പോട്ട് ബുക്കിംഗും ഉണ്ട്. രണ്ട് വര്‍ഷത്തിനിടയിലെ ഏറ്റവും വലിയ തിരക്കായിരുന്നു ഇന്നലെ.

സീസണിലെ ആദ്യ ശനിയാഴ്ച ആയതും തിരക്ക് വര്‍ദ്ധിപ്പിച്ചു. ഇന്നലെ രാവിലെ പമ്പയിലെ ജലനിരപ്പ് 15 സെന്റിമീറ്ററോളം ഉയര്‍ന്നതോടെ ഞുണുങ്ങാര്‍ സംഗമിക്കുന്ന ഭാഗത്ത് മണപ്പുറത്തേക്ക് വീണ്ടും വെള്ളം കയറിയിരുന്നു.

ഉച്ചയോടെ പമ്പാ ഡാമിന്റെ രണ്ടുഷട്ടറുകള്‍ ഉയര്‍ത്തി. ഇന്നലെ മഴ പെയ്യാതിരുന്നതോടെ തീര്‍ത്ഥാടനം സുഗമമായി. ഇന്നലെ നല്ല തിരക്കായിരുന്നു സന്നിധാനത്ത്.