മലയാറ്റൂരില്‍ വ്യവസായിയുടെ വീട്ടില്‍ വന്‍ കവര്‍ച്ച.... വീട് കുത്തിത്തുറന്ന് 25 പവന്‍ സ്വര്‍ണവും പണവും കവര്‍ന്നു... പുലര്‍ച്ചെയോടെയാണ് കവര്‍ച്ച നടന്നതെന്നാണ് പോലീസിന്റെ നിഗമനം.


മലയാറ്റൂരില്‍ വ്യവസായിയുടെ വീട്ടില്‍ വന്‍ കവര്‍ച്ച. കളംപാട്ടുപുരത്ത് ഔസേപ്പ് എന്നയാളുടെ വീട്ടിലാണ് കവര്‍ച്ച നടന്നത്.കൊച്ചിന്‍ റിഫൈനറിയില്‍ വാഹനങ്ങളുടെ കോണ്‍ട്രാക്ട് എടുക്കുന്ന വ്യവസായിയാണ് ഔസേപ്പ്.

വീട് കുത്തിത്തുറന്ന് 25 പവന്‍ സ്വര്‍ണവും 41,000 രൂപയും മോഷ്ടിച്ചു. പുലര്‍ച്ചെ രണ്ടിനും മൂന്നിനും ഇടയിലാണ് കവര്‍ച്ച നടന്നതെന്നാണ് പോലീസിന്റെ നിഗമനം. സംഭവം നടന്ന സമയം വീട്ടുകാര്‍ എല്ലാവരും വീട്ടില്‍ തന്നെ ഉണ്ടായിരുന്നു. ബെഡ്റൂമില്‍ സൂക്ഷിച്ചിരുന്ന താക്കോല്‍ കൈക്കലാക്കിയാണ് സ്വര്‍ണം കവര്‍ന്നത്.

അലമാര തുറന്നിരിക്കുന്ന നിലയിലായിരുന്നു. അലമാരയില്‍ ഉണ്ടായിരുന്ന ആഭരണം സൂക്ഷിച്ചിരുന്ന പെട്ടികള്‍ തറയില്‍ വലിച്ചെറിഞ്ഞ നിലയിലായിരുന്നു. മോഷണം നടന്ന വീടിന് സമീപമുള്ള രണ്ട് വീടുകളിലും കവര്‍ച്ച നടന്നിരുന്നു. കാലടി പോലീസ് സ്ഥലത്തെത്തി അന്വേഷണം ആരംഭിച്ചു.