എറണാകുളം കടവന്ത്രയിലെ അമ്മയുടെയും മക്കളുടെയും മരണം കൊലപാതകമാണെന്ന് പോലിസ്. ഭാര്യയെയും കുട്ടികളെയും കഴുത്തു മുറുക്കി കൊലപ്പെടുത്തിയ ശേഷമാണ്​ ജീവനൊടുക്കാന്‍ ശ്രമിച്ചതെന്ന്​ ഭര്‍ത്താവ് നാരായണന്‍ പൊലീസില്‍ മൊഴി നല്‍കി.

സാമ്പത്തിക ബുദ്ധിമുട്ടുകള്‍ കാരണമാണ്​ ഈ കടുംകൈ ചെയ്തത്​. ഭാര്യ ജോയ​മോള്‍ (33), മക്കളായ ലക്ഷ്മികാന്ത് (8), അശ്വന്ത് (4) എന്നിവരെ ഉറക്കഗുളിക നല്‍കിയ ശേഷം ഷൂലേസ്​ കഴുത്തില്‍ മുറുക്കിയാണ്​ ​കൊന്നത്​. അതിനുശേഷം കഴുത്തുമുറിച്ച്‌​ ജീവനൊടുക്കാന്‍ ശ്രമിച്ച നാരായണന്‍ ഗുരുതരാവസ്ഥയില്‍ ചികിത്സയിലാണ്​.

നാരായണനെതിരെ കൊലക്കുറ്റം ചുമത്തി കേസ് രജിസ്റ്റർ ചെയ്തിരിക്കുകയാണ്​. ശനിയാഴ്ച രാവിലെയാണ് ജോയമോളെയും മക്കളെയും വീട്ടിനുള്ളില്‍ മരിച്ച നിലയില്‍ കണ്ടെത്തിയത്​. കൂട്ട ആത്​മഹത്യയെന്ന്​ ആദ്യം കരുതിയെങ്കിലും സംശയം തോന്നിയ പൊലീസ്​ നാരായണനെ ചോദ്യം ചെയ്തതില്‍ നിന്നാണ്​ കൊലപാതകത്തിന്‍റെ ചുരുളഴിയുന്നത്​.

ഉറക്കഗുളിക നല്‍കിയെങ്കിലും മരിക്കാത്തതിനെ തുടര്‍ന്നാണ്​ കഴുത്തുമുറുക്കി കൊന്നത്​. അതിനുശേഷം കഴുത്തിനും കയ്യിലും മുറിവേല്‍പിച്ച്‌ ജീവനൊടുക്കാന്‍ ശ്രമിക്കുകയായിരുന്നു. രാവിലെ ഫോണ്‍ വിളിച്ചിട്ടും പ്രതികരണമില്ലാത്തതിനാല്‍ ജോയമോളുടെ സഹോദരി വീട്ടില്‍ അന്വേഷിച്ചെത്തിയതോടെയാണ്​ സംഭവം പുറംലോകമറിഞ്ഞത്.

തുടര്‍ന്ന് ഇവര്‍ നാട്ടുകാരെയും പൊലീസിനെയും വിവരമറിയിക്കുകയായിരുന്നു. നാലുപേരെയും ഉടന്‍ ആശുപത്രിയില്‍ എത്തിച്ചെങ്കിലും ജോയ​മോളും മക്കളും മരിച്ചിരുന്നു. കടവന്ത്രയില്‍ പൂക്കളുടെ മൊത്തവ്യാപാരം നടത്തുകയാണ്​ തമിഴ്​നാട്​ സ്വദേശിയായ നാരായണന്‍. എറണാകുളം സൗത്ത് പൊലീസ് സ്ഥലത്തെത്തി തുടര്‍ നടപടികള്‍ സ്വീകരിച്ചു.