മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കിയ 10 കോടി രൂപ സര്‍ക്കാര്‍ തിരികെ നല്‍കണമെന്ന കേരള ഹൈ കോടതി വിധിക്കെതിരെ ഏതാണ്ട് 50 ലക്ഷം രൂപ മുടക്കി ഗുരുവായൂര്‍ ദേവസ്വം സുപ്രീം കോടതിയെ സമീപിക്കുന്നു. 50 ലക്ഷവും ഭക്തര്‍ ദേവസ്വത്തിലേക്ക് നല്‍കിയ പണം തന്നെ.

സര്‍ക്കാര്‍ നിര്‍ദ്ദേശാനുസരണം ദേവസ്വം വകുപ്പാണ് ഇതിനാവശ്യമായ ഉത്തരവ് ഗുരുവായൂര്‍ ദേവസ്വത്തിന് നല്‍കിയത്. അപ്പീല്‍ പോയാലും സാധ്യത കുറവാണെന്ന ഗുരുവായൂര്‍ ദേവസ്വത്തിന്റെ അഭിപ്രായത്തോട് സര്‍ക്കാര്‍ പ്രതികരിക്കുക പോലും ചെയ്തില്ലെന്നാണ് ലഭിക്കുന്ന സൂചനകള്‍.എന്നാല്‍ സര്‍ക്കാര്‍ തീരുമാനം ദേവസ്വത്തിന് അംഗീകരിക്കാതിരിക്കാന്‍ കഴിയില്ല.

മുഖ്യമന്ത്രിയുടെ ദുരിതാശ്വാസ നിധിയിലേക്ക് ഗുരുവായൂര്‍ ദേവസ്വം പണം നല്കിയത് തെറ്റാണെന്ന ഹൈക്കോടതി ഫുള്‍ബെഞ്ച് വിധിക്കെതിരെ ദേവസ്വം ബോര്‍ഡ് സുപ്രീംകോടതിയില്‍ അപ്പീല്‍ സമര്‍പ്പിച്ചത് കഴിഞ്ഞ ദിവസമാണ്.

2018ലെ പ്രളയകാലത്തും 2019 ല്‍ കൊവിഡ് കാലത്തും അഞ്ച് കോടി വീതമാണ് ഗുരുവായൂര്‍ ദേവസ്വം മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്കിയിരുന്നത്. ദുരിതാശ്വാസനിധിയിലേക്ക് സംഭാവന നല്‍കിയത് ദേവസ്വം ബോര്‍ഡിന്റെ പ്രവര്‍ത്തന പരിധിയില്‍ വരില്ലെന്ന് 2020 ഡിസംബറില്‍ ഹൈക്കോടതി ഫുള്‍ ബെഞ്ച് വ്യക്തമാക്കിയിരുന്നു.

ഭക്ത സംഘടനകള്‍ നല്കിയ ഹര്‍ജിയിലായിരുന്നു ഉത്തരവ്. ദേവസ്വം നിയമത്തിലെ വകുപ്പ് 27 പ്രകാരം ദുരിതാശ്വാസ ഫണ്ടിനായി പണം നീക്കിവയ്ക്കാനാകില്ലെന്ന് ഫുള്‍ ബഞ്ച് നിരീക്ഷിച്ചു. കാണിക്കയര്‍പ്പിക്കുന്ന പണം ദേവസ്വം ബോര്‍ഡിന് തോന്നിയതുപോലെ ഉപയോഗിക്കാനാവില്ല. പത്തുകോടിരൂപ സര്‍ക്കാര്‍ തിരികെ നല്കണമെന്നും ഈടാക്കാന്‍ ദേവസ്വം നടപടി സ്വീകരിക്കണമെന്നും ഹൈക്കോടതി നിര്‍ദേശിച്ചു. ഇതിനെതിരെയാണ് ദേവസ്വം ബോര്‍ഡിന്റെ അപ്പീല്‍.

ദുരിതാശ്വാസ നിധിയിലേക്ക് പണം നല്‍കുന്നത് നിയമപരമാണെന്നാണ് ദേവസ്വം ബോര്‍ഡിന്റെ നിലപാട്. ഭക്തരുടെ താത്പര്യം കൂടി കണക്കിലെടുത്താണ് ദുരിതാശ്വാസനിധിയിലേക്ക് പണം നല്‍കിയത്. ക്ഷേത്ര ആവശ്യങ്ങള്‍ക്കല്ലാതെയും ഫണ്ട് നല്‍കുന്നതില്‍ തെറ്റില്ലെന്നും ബോര്‍ഡ് സുപ്രീം കോടതിയില്‍ ഫയല്‍ ചെയ്ത ഹര്‍ജിയില്‍ അവകാശപ്പെട്ടിട്ടുണ്ട്.

ദേവസ്വത്തിനു വേണ്ടി സ്റ്റാന്‍ഡിങ് കൗണ്‍സല്‍ എം.എല്‍. ജിഷ്ണുവാണ് ഹര്‍ജി ഫയല്‍ ചെയ്തത്. 2020 ഡിസംബറില്‍ ഹൈക്കോടതി ഫുള്‍ ബെഞ്ച് പുറപ്പെടുവിച്ച വിധിക്കെതിരെ സംസ്ഥാന സര്‍ക്കാര്‍ ഇതുവരെ അപ്പീല്‍ നല്‍കിയിട്ടില്ല. അതേസമയം സര്‍ക്കാരിന്റെ നിര്‍ദ്ദേശപ്രകാരമാണ് ദേവസ്വംബോര്‍ഡ് അപ്പീല്‍ നല്കിയതെന്നാണ് വിവരം. സംസ്ഥാന സര്‍ക്കാര്‍ അപ്പീല്‍ നല്‍കാത്തത് മനപൂര്‍വമാണ്. അത് ദേവസ്വത്തിന്റെ അധികാരങ്ങള്‍ക്ക് മേലുള്ള കടന്നുകയറ്റമാണെന്ന് വ്യാഖ്യാനിക്കപെടും.

വലിയ പ്രതിസന്ധിയിലാണ് ഗുരുവായൂര്‍ ദേവസ്വം എത്തിച്ചേര്‍ന്നിരിക്കുന്നത്.ഹൈക്കോടതി ഫുള്‍ ബഞ്ചിന്റെ വിധിക്കെതിരെ അപ്പീല്‍ നല്‍കുന്നത് അധികാര ദുര്‍വിനിയോഗമാണെന്ന ആക്ഷേപം ഉയരുമെന്ന് ദേവസ്വത്തിനറിയാം. എന്നാലും സര്‍ക്കാര്‍ തീരുമാനം അംഗീകരിക്കാതിരിക്കാന്‍ ദേവസ്വത്തിന് കഴിയില്ല.

അപ്പീല്‍ നല്‍കണമെന്ന ശുപാര്‍ശയാണ് സര്‍ക്കാരിന് അഡ്വക്കേറ്റ് ജനറലില്‍ നിന്നും ലഭിച്ചത്. എന്നാല്‍ ഭഗവാന്റെ പണം സര്‍ക്കാര്‍ ആവശ്യങ്ങള്‍ക്കായി ഉപയോഗിക്കാന്‍ കഴിയില്ല. ഇക്കാര്യം ദേവസ്വം നിയമത്തില്‍ ക്യത്യമായി വ്യവസ്ഥ ചെയ്തിട്ടുണ്ട്. അതിനാല്‍ സുപ്രീം കോടതിയില്‍ നിന്നും തട്ടുകിട്ടാന്‍ തന്നെയാണ് സാധ്യത.