ശബരിമലയില്‍ 18000 നാളികേരത്തിന്റെ നെയ്യഭിഷേകം അഞ്ചാം തീയതി പുലര്‍ച്ചെ നാലിന് നട തുറന്ന ശേഷം നടക്കും. ശബരിമലയുടെ ചരിത്രത്തില്‍ തന്നെ ആദ്യമായാണ് ഒരു ഭക്തന്‍ ഇത്രയും നാളികേരത്തിന്റെ നെയ്യഭിഷേക വഴിപാട് നടത്തുന്നതെന്ന് ദേവസ്വം ബോര്‍ഡ് അധികൃതര്‍ പറഞ്ഞു. പേര് വെളിപ്പെടുത്താന്‍ ആഗ്രഹിക്കാത്ത ബാംഗ്ലൂര്‍ സ്വദേശിയായ ഭക്തനാണ് വഴിപാട് നടത്തുന്നത്.

അഭിഷേകത്തിനുള്ള നാളികേരവും നെയ്യും പമ്പയിലെത്തിച്ചു. ദേവസ്വം ബോര്‍ഡ് പ്രസിഡന്റ് കെ.അനന്തഗോപന്റെ നേതൃത്വത്തില്‍ ഇത് ഏറ്റുവാങ്ങി. പമ്പയില്‍ നെയ് നിറച്ച നാളികേരം ഇന്നലെ മുതല്‍ സന്നിധാനത്തേക്ക് ട്രാക്ടറില്‍ എത്തിച്ചുകൊണ്ടിരിക്കുകയാണ്. വഴിപാട് നിരക്കായ 18 ലക്ഷം രൂപ ഭക്തന്‍ ഡിഡിയായി ദേവസ്വം ബോര്‍ഡിന് അടച്ചു.

വര്‍ഷങ്ങളായി ദരര്‍ശനം നടത്തുന്ന ഭക്തന്‍ അയ്യപ്പാനുഗ്രഹത്താല്‍ ആഗ്രഹിച്ച കാര്യം സാധിച്ചതിനുള്ള വഴിപാടാണെന്നാണ് അറിയിച്ചിട്ടുള്ളത്. പതിനെട്ട് പടികളെയും മലകളെയും സങ്കല്‍പ്പിച്ചാണ് 18000 നാളികേരത്തിന്റെ നെയ്യഭിഷേകം. നെയ്യഭിഷേക ദിവസം ഇദ്ദേഹം ദര്‍ശനത്തിനെത്തുമോ എന്നറിയിച്ചിട്ടില്ലെന്ന് ദേവസ്വം എക്‌സിക്യൂട്ടീവ് ഓഫിസര്‍ കൃഷ്ണകുമാര്‍ വാരിയര്‍ അറിയിച്ചു.


സന്നിധാനത്ത് തിരക്ക് കുറഞ്ഞെങ്കിലും മകരവിളക്ക് തീര്‍ഥാടത്തിന് നട തുറന്ന ആദ്യ രണ്ടു ദിവസത്തെ ശബരിമലയിലെ വരുമാനം 4.75 കോടി രൂപയും കാണിക്ക രണ്ട് കോടി രൂപയും അരവണ രണ്ട് കോടി അപ്പം 20.75 ലക്ഷം എന്നിങ്ങനെയാണ്.

ഞായറാഴ്ച രാവിലെ മാത്രമാണ് വലിയ തിരക്ക് ഉണ്ടായത്. പിന്നീട് തിരക്ക് കുറഞ്ഞു. മകരവിളക്ക് ഉത്സവത്തിന് നടതുറന്നതിന് ശേഷം രണ്ട് ദിവസമായി 90,000 പേരാണ് മല ചവിട്ടിയത്.


തിരക്ക് കൂടുമെന്ന പ്രതീക്ഷയില്‍ അപ്പം, അരവണ കൗണ്ടര്‍ ഉള്‍പ്പടെ അധികമായി തുറന്നു. മറ്റ് സംസ്ഥാനങ്ങളില്‍ കൊവിഡ് നിയന്ത്രണങ്ങള്‍ കര്‍ശനമായതാണ് തിരക്ക് കുറയാന്‍ കാരണമെന്നാണ് വിലയിരുത്തല്‍. മകരവിളക്ക് കൂടി ദര്‍ശിച്ച് മടങ്ങാനായി വരും ദിവസങ്ങളില്‍ കൂടുതല്‍ തീര്‍ത്ഥാടകരെത്തുമെന്നാണ് ദേവസ്വം ബോര്‍ഡിന്റെ വിലയിരുത്തല്‍.