സ്ത്രീകള്ക്ക് എതിരെയുള്ള അതിക്രമങ്ങള് തടയാന് ക്രൈം മാപ്പിങുമായി കുടുംബശ്രീ
സ്ത്രീകള്ക്ക് എതിരെയുള്ള അതിക്രമങ്ങള് തടയാന് കുടുംബശ്രീയുടെ നേതൃത്വത്തില് ക്രൈം മാപ്പിങ് പദ്ധതി ഒരുങ്ങുന്നു. ഓരോ തദ്ദേശ സ്ഥാപനങ്ങളിലും അതിക്രമങ്ങള് നടക്കുന്ന സ്ഥലം മാപ്പില് രേഖപ്പെടുത്തും. തുടര്ന്ന് ഈ ക്രൈം മാപ്പുകള് ഉള്പ്പെടുത്തി സംസ്ഥാനതലത്തില് ക്രൈം മാപ്പ് തയ്യാറാക്കുന്നതാണ് പദ്ധതി. മാപ്പിങ് പൂര്ത്തിയായശേഷം അതിക്രമങ്ങളെ നേരിടാന് തദ്ദേശ സ്ഥാപനങ്ങളിലെ വാര്ഡുകളില് ജാഗ്രതാ സമിതികള് രൂപീകരിക്കും. അതിക്രമങ്ങള് പൂര്ണമായും അവസാനിച്ചു എന്നു ഉറപ്പാക്കുംവരെ സമിതികള് പ്രവര്ത്തിക്കും. മാപ്പിങ് നടത്താന് ഓരോ പഞ്ചായത്തിലും 20 വോളന്റിയര്മാരെ തെരഞ്ഞെടുത്തിട്ടുണ്ട്. ഇവര്ക്ക് വിദഗ്ധരുടെ നേതൃത്വത്തില് പരിശീലനവും നല്കി കഴിഞ്ഞു. കുടുംബശ്രീയുടെ കീഴിലുള്ള സ്ത്രീ പദവി സ്വയം പഠന പദ്ധതിയുടെ നേതൃത്വത്തിലാണ് ക്രൈം മാപ്പിങ് നടപ്പാക്കുന്നത്. വിദേശങ്ങളില് കുറ്റകൃത്യങ്ങള് തടയാന് ഏറെ ഫലപ്രദമാണെന്ന് കണ്ടെത്തിയ ഈ രീതി ഇന്ത്യയില് ഇതാദ്യമായാണ് നടപ്പാക്കുന്നത്.
രണ്ടുതരത്തിലാണ് ക്രൈംമാപ്പിങ് നടത്തുക. ക്രൈം മാപ്പിങിന് നിയോഗിക്കപ്പെട്ട വോളന്റിയര്മാരുടെ നേതൃത്വത്തില് പ്രത്യേക അയല്ക്കൂട്ട യോഗങ്ങള് സംഘടിപ്പിച്ച് ഓരോ വാര്ഡിലും സത്രീകള് നേരിടുന്ന പ്രശ്നങ്ങളുടെ പട്ടിക തയ്യാറാക്കുകയാണ് ആദ്യ ഘട്ടം. അയല്കൂട്ട അംഗങ്ങള്ക്ക് പുറമെ താല്പര്യമുള്ള സ്ത്രീകള്ക്കും പെണ്കുട്ടികള്ക്കും ഇത്തരം യോഗത്തില് പങ്കെടുക്കാം. ഇത്തരത്തില് രൂപീകരിക്കുന്ന പ്രശ്നപട്ടികയുടെ അടിസ്ഥാനത്തില് ചോദ്യാവലി തയ്യാറാക്കും. 20 പ്രധാന ചോദ്യങ്ങളും 80ലധികം ഉപ ചോദ്യങ്ങളും അടങ്ങുന്നതാണ് ചോദ്യാവലി. അതിക്രമങ്ങള് നടക്കുന്ന സ്ഥലത്തെക്കുറിച്ച് വ്യക്തിപരമായും കൂട്ടായും അനുഭവങ്ങള് പങ്കുവയ്ക്കാനും അതിക്രമം നടന്ന സ്ഥലം, സമയം, അതിക്രമത്തിന്റെ സ്വഭാവം എന്നിവയും ചോദ്യാവലിയില് രേഖപ്പെടുത്താം. പൂരിപ്പിച്ച ചോദ്യാവലി നിക്ഷേപിക്കാനായി പ്രത്യേക ബോക്സുകള് നല്കും. ഓരോ വ്യക്തിയുടെയും സ്വകാര്യ വിവരങ്ങള് രഹസ്യമായി സൂക്ഷിക്കുന്നത് ഉറപ്പാക്കുന്ന വിധത്തിലാണ് ചോദ്യാവലി തയ്യാറാക്കിയിരിക്കുന്നത്.
രണ്ടാം ഘട്ടത്തിലാണ് മാപ്പിങ് നടത്തുന്നത്. അതിക്രമങ്ങളെ ശാരീരികം, വാചികം എന്നിങ്ങനെ വേര്തിരിച്ചശേഷം മാപ്പില് പ്രത്യേക നിറം നല്കും. ശാരീരിക അതിക്രമത്തിന് ചുവപ്പും, വാചികത്തിന് പച്ചയും, മോശമായ ശരീര ചേഷ്ട കള് കാണിക്കുന്നതടക്കമുള്ള സംഭവങ്ങള് നടന്ന സ്ഥലങ്ങള്ക്ക് മഞ്ഞ നിറവുമാണ് നല്കുന്നത്. ഇത്തരത്തില് രേഖപ്പെടുത്തിയ മാപ്പുകള് വാര്ഡ് തലത്തിലും പഞ്ചായത്ത് തലത്തിലും പരിശോധനയ്ക്ക് വിധേയമാക്കും. തുടര്ന്ന് ജില്ലാതലത്തിലും, സംസ്ഥാന തലത്തിലും ക്രൈം മാപ്പുകള് തയ്യാറാക്കാനാണ് തീരുമാനം. ഈ മാപ്പുകള് ആഭ്യന്തര വകുപ്പിന് കൈമാറും. ആദ്യഘട്ടത്തില് ഓരോ ജില്ലയിലെയും തെരഞ്ഞെടുത്ത അഞ്ച് സി.ഡി.എസ് ( കമ്മ്യൂണിറ്റി ഡവലപ്മെന്റ് സൊസൈറ്റി) വഴിയാണ് പദ്ധതി നടപ്പാക്കുന്നത്. സംസ്ഥാനത്ത് ഇത്തരത്തില് 74 സി.ഡി.എസുകളിലും ക്രൈം മാപ്പിങ് പൂര്ത്തിയാക്കി കഴിഞ്ഞു. അതിക്രമങ്ങളുെട സ്വഭാവം മനസിലാക്കി ജനങ്ങള്ക്ക് പ്രതിരോധ പ്രവര്ത്തനങ്ങള് സംഘടിപ്പിക്കാനും പൊലീസിന് തുടര്നടപടികള് സ്വീകരിക്കാനും ക്രൈം മാപ്പിങ് ഉപയോഗപ്പെടുത്താന് കഴിയുമെന്നാണ് കുടംബശ്രീയുടെ പ്രതീക്ഷ.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
