ഗള്‍ഫ് രാജ്യങ്ങളില്‍ ഏറ്റവും കൂടുതലുള്ള മലയാളികളെ പിഴിഞ്ഞ് വിമാനകമ്പനികള്‍ ജീവിക്കാന്‍ കുറേ നാളായി. എന്നാല്‍ ഇനി അത് നടക്കില്ല. ഉത്സവകാലങ്ങളില്‍ വിമാന ടിക്കറ്റ് നിരക്ക് വര്‍ധിക്കുന്നത് തടയാന്‍ നടപടി സ്വീകരിക്കണമെന്നു കേന്ദ്ര വ്യോമയാന മന്ത്രാലയത്തിനു പ്രധാനമന്ത്രി നരേന്ദ്ര മോഡി കര്‍ശന നിര്‍ദേശം നല്‍കി. കേരളത്തില്‍നിന്നുള്ള യാത്രക്കാരെ പ്രതിനിധീകരിച്ചു ലഭിച്ച പരാതിയുടെ അടിസ്ഥാനത്തിലാണു പ്രധാനമന്ത്രിയുടെ നടപടി.
രാജ്യാന്തര യാത്രകള്‍ കൂടാതെ പ്രാദേശിക യാത്രകള്‍ക്ക് ഈടാക്കുന്ന അധിക വിമാന നിരക്കും നിയന്ത്രിക്കാന്‍ നടപടി സ്വീകരിക്കുമെന്നും സര്‍ക്കാര്‍ അറിയിച്ചു. ഓണം, പെരുന്നാള്‍, ക്രിസ്തുമസ്, വിഷു തുടങ്ങി അവധി വരുന്നമുറയിലാണ് വിമനക്കമ്പനികള്‍ യാത്രാനിരക്ക് കുത്തനെ കൂട്ടുന്നത്. ഇന്ന് കാണുന്നതില്‍ നിന്ന് അഞ്ചും ആറും ഇരട്ടിയായിരിക്കും അവധി ദിവസങ്ങളില്‍ വിമാനക്കമ്പനികള്‍ യാത്രാനിരക്കായി ഈടാക്കുക. മുബേ ടിക്കറ്റ് എടുത്ത യാത്രക്കാരെയും വിമാനകമ്പനികള്‍ ഇത്തരം കാര്യം പറഞ്ഞ് അമിത ചാര്‍ജ്ജ് വാങ്ങാറുണ്ടെന്ന് പരാതി ഉയര്‍ന്നിട്ടുണ്ട്.
ഇക്കഴിഞ്ഞ റംസാനും ഇപ്പോഴത്തെ ഓണത്തിനും കേരളത്തിലേക്കുള്ള വിമാനയാത്രാനിരക്ക് വിമാന കമ്പനികള്‍ കുത്തനെ കൂട്ടിയിരുന്നു. ഇതിനെതിരെ പ്രതിഷേധവുമായി മുഖ്യമന്ത്രി ഉമ്മന്‍ചാണ്ടിയും സിപിഎം നേതാവ് പിണറായി വിജയന്‍ അടക്കമുള്ള പ്രമുഖര്‍ രംഗത്തെത്തിയിരുന്നു. മുഖ്യമന്ത്രി പ്രധാനമന്ത്രിക്ക് നേരിട്ട് വിവരം കൈമാറുകയും ചെയ്തു. മാത്രമല്ല പ്രധാനമന്ത്രിയുടെ യുഎഇ സന്ദര്‍ശനത്തിലും പ്രവാസി മലയാളികള്‍ വിമാനകമ്പനികളുടെ കൊള്ളയെ കുറിച്ച് പ്രധാനമന്ത്രിയെ നേരിട്ട് കണ്ട് പരാതിപറഞ്ഞിരുന്നു. ഇതിനെ തുടര്‍ന്നാണ് അമിത ചാര്‍ജ്ജ് വര്‍ദ്ധനയ്‌ക്കെതിരെ കര്‍ശന നടപടി സ്വീകരിക്കാന്‍ പ്രധാനമന്ത്രി നരേന്ദ്രമോഡി വ്യോമയാന മന്ത്രാലയത്തിന് നിര്‍ദ്ദേശം നല്‍കിയത്.
കേരളത്തിലെ പ്രവാസികളുടെ സ്വപ്‌നമായ എയര്‍കേരള പദ്ധതി നടപടികളും വേഗത്തിലാക്കണമെന്ന് പ്രവാസി മലയാളികള്‍ ആവശ്യപ്പെട്ടിട്ടുണ്ട്. ഈ പദ്ധതി യാഥാര്‍ഥ്യമയാല്‍ കുറഞ്ഞ ചിലവില്‍ പ്രവാസികള്‍ക്ക് ഗള്‍ഫ് രാജ്യങ്ങളില്‍ യാത്രചെയ്യാം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha