അടിച്ചു തകര്ത്ത ജനാലച്ചില്ല് സമരക്കാര് മാറ്റിയിടും
പണിമുടക്കിനോടനുബന്ധിച്ച് ആലക്കോട് വില്ലേജ് ഓഫിസിലെ ജനാലച്ചില്ല് അടിച്ചുതകര്ത്ത പണിമുടക്കനുകൂലികള് പുലിവാലു പിടിച്ചു. പൊതുമുതല് നശിപ്പിച്ചതിന്റെ പേരില് കേസില് കുടുങ്ങുമെന്നുറപ്പായതോടെ തകര്ന്ന ജനാലച്ചില്ലു മാറ്റിയിടാമെന്ന ധാരണയിലെത്തി പ്രശ്നത്തില്നിന്നു തലയൂരി.
രാവിലെ പത്തോടെ 25 പേരടങ്ങുന്ന സംഘമാണ് ജനാലച്ചില്ല് അടിച്ചു തകര്ത്തത്. ആറു പേരുള്ള ഓഫിസില് ഇന്നലെ അസിസ്റ്റന്റുമാരായ ഇ.ജി. ബിജു, കെ.എം. ഷംല, വില്ലേജ് ഫീല്ഡ് അസിസ്റ്റന്റ് പി.എന്. മണി എന്നിവര് ഓഫിസ് തുറന്ന് ഉള്ളില് കടന്നതിനു തൊട്ടു പിന്നാലെയാണ് സ്ഥലത്തെ ഇടതുപക്ഷ സംഘടനാ നേതാക്കളും പ്രവര്ത്തകരും കൂട്ടത്തോടെ ഓഫിസിനുള്ളില് കടന്നത്. ഓഫിസ് എന്തിനു തുറന്നുവെന്നാരോപിച്ച് ബഹളമുണ്ടാക്കിയ സംഘം ഓഫിസ് അടച്ചില്ലെങ്കില് വിവരം അറിയുമെന്നും പറഞ്ഞു. ജീവനക്കാരെ ഇവര് അസഭ്യം പറയുകയും ഭീഷണിപ്പെടുത്തുകയും ചെയ്തതായി പരാതിയുണ്ട്. വില്ലേജ് ഓഫിസര് ഇന്നലെ അവധിയിലായിരുന്നു.
ഇതിനിടെ ജീവനക്കാരെ മുറിക്കുള്ളില് പൂട്ടിയിട്ട് ബന്ദികളാക്കാനും പണിമുടക്കനുകൂലികള് ശ്രമിച്ചുവത്രേ. തര്ക്കത്തിനിടെയാണ് സംഘത്തില്പ്പെട്ടവര് ഓഫിസിനു മുന്നിലെ ജനാല അടിച്ചുതകര്ത്തത്. ഒരു ജനല്പ്പാളിയുടെ ചില്ല് പൂര്ണമായും തകര്ന്നു. തുടര്ന്ന് മുഴുവന് ജീവനക്കാരെയും പുറത്തിറക്കി ഓഫിസ് പൂട്ടിയ ശേഷമാണ് ഇവര് മടങ്ങിയത്.
ജീവനക്കാര് വില്ലേജ് ഓഫിസറെയും തൊടുപുഴ തഹസില്ദാരെയും വിവരം അറിയിച്ചു. തൊടുപുഴ പൊലീസ് സ്ഥലത്തെത്തി വിവരങ്ങള് ശേഖരിച്ചുവെങ്കിലും വില്ലേജ് ഓഫിസ് അധികൃതര് പൊലീസില് പരാതി നല്കാന് തയാറായില്ല. പൊതുമുതല് നശിപ്പിച്ചതിനും സ്ത്രീ ജീവനക്കാര് ഉള്പ്പെടെയുള്ളവരെ ഭീഷണിപ്പെടുത്തിയതിനും അറസ്റ്റിലാകുമെന്ന വിവരം ചിലര് നേതാക്കളെ അറിയിച്ചു. ഇതോടെ സ്ഥലത്തെ ചില നേതാക്കള് റവന്യു അധികൃതരുമായി ബന്ധപ്പെടുകയും, തകര്ത്ത ചില്ലിനു പകരം പുതിയതു സ്ഥാപിക്കാമെന്നും അറിയിച്ചു.
അക്രമത്തിന്റെ പേരില് ഇവര് റവന്യു ഉദ്യോഗസ്ഥരോടു മാപ്പു പറഞ്ഞതായും അറിയുന്നു. അക്രമത്തിനു നേതൃത്വം നല്കിയവര്ക്കെതിരെ പരാതി നല്കേണ്ടെന്നും പ്രശ്നം പറഞ്ഞുതീര്ക്കാമെന്നും ഇതോടെ ഇരു കൂട്ടരും ധാരണയിലെത്തി. തകര്ന്ന ജനാല ചില്ല് മാറ്റി സ്ഥാപിക്കുന്നതിന് 800 രൂപ വില വരുമെന്നും റവന്യു അധികൃതര് അറിയിച്ചു. രണ്ടു ദിവസത്തിനകം ചില്ലു മാറ്റി സ്ഥാപിക്കും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
