ആകാംക്ഷയോടെ കേരളം... ബാലചന്ദ്രകുമാര് ചോര്ത്തിവിട്ട ശബ്ദത്തിന് പിന്നാലെ ബാലചന്ദ്രകുമാര് ദിലീപിന് അയച്ച ശബ്ദസന്ദേശങ്ങളും പുറത്ത്; അന്വേഷണ ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയെന്ന കേസില് ദിലീപിന്റെ മുന്കൂര് ജാമ്യാപേക്ഷയില് ഹൈക്കോടതി ഇന്ന് വിധി പറയും
നടന് ദിലീപിനെ സംബന്ധിച്ച് ഇന്നത്തെ ദിവസം അതിനിര്ണായകമാണ്. നടിയെ പീഡിപ്പിച്ച കേസിലെ അന്വേഷണ ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയെന്ന കേസില് നടന് ദിലീപ് അടക്കമുള്ളവരുടെ മുന്കൂര് ജാമ്യാപേക്ഷയില് ഹൈക്കോടതി ഇന്ന് വിധി പറയും. ദിലീപിനെക്കൂടാതെ, സഹോദരന് അനൂപ്, സഹോദരി ഭര്ത്താവ് ടി.എന്.സുരാജ്, ബ ന്ധുവായ അപ്പു, സുഹൃത്തായ ബൈജു ചെങ്ങമനാട്, ശരത്ത് എ ന്നിവരുടെ മുന്കൂര് ജാമ്യാപേക്ഷകളാണു ജസ്റ്റിസ് പി. ഗോപിനാഥ് ഇന്ന് വിധി പറയാന് മാറ്റിയത്.
മുന്കൂര് ജാമ്യം കിട്ടിയില്ലെങ്കില് അറസ്റ്റുണ്ടാകാനാണ് സാധ്യത. സംവിധായകന് ബാലചന്ദ്ര കുമാറിന്റെ വെളിപ്പെടുത്തലിനെ തുടര്ന്നു റജിസ്റ്റര് ചെയ്ത കേസില് കഴിഞ്ഞ മാസം പത്തിനാണു ദിലീപ് അടക്കമുള്ളവര് മുന്കൂര് ജാമ്യാപേക്ഷ നല്കിയത്. അറസ്റ്റ് തടഞ്ഞ കോടതി ദിലീപ് അടക്കമുള്ളവരോടു ചോദ്യം ചെയ്യാനാനായി മൂന്നു ദിവസം ഹാജരാകാന് നിര്ദേശം നല്കി. കൂടാതെ ചോദ്യം ചെയ്യലില് ലഭിച്ച വിവരങ്ങളും രേഖകളും മുദ്രവച്ച കവറില് കോടതിയില് നല്കാനും പ്രോസിക്യൂഷനു നിര്ദേശം നല്കി.
ഇതിനിടെ ദിലീപ് അടക്കമുള്ളവര് ഉപയോഗിച്ച 7 ഫോണുകള് ഹാജരാക്കാന് നിര്ദേശം നല്കണമെന്ന് ആവശ്യപ്പെട്ടു പ്രോസിക്യൂഷന് ഹൈക്കോടതിയില് ഉപഹര്ജി നല്കി. ഫോണുകള് ഹൈക്കോടതി റജിസ്ട്രാര് ജനറലിനു മുന്നില് ഹാജരാക്കാന് തുടര്ന്നു കോടതി നിര്ദേശം നല്കി. തുടര്ന്ന് 6 ഫോണുകള് ജനുവരി 31ന് മുദ്രവച്ച കവറില് കൈമാറി.
ഫോണുകള് കോടതിയുടെ മേല്നോട്ടത്തില് പരിശോധന നടത്തണമെന്ന് പ്രതികള് ആവശ്യപ്പെട്ടതോടെ കേസ് പരിഗണിക്കുന്ന ആലുവ ജുഡീഷ്യല് ഫസ്റ്റ് ക്ലാസ് മജിസ്ട്രേട്ട് കോടതിക്ക് ഇവ കൈമാറാന് നിര്ദേശിച്ചു. അന്വേഷണ ഉദ്യോഗസ്ഥര് ഗൂഢാലോചന നടത്തുകയാണെന്നും വ്യാജതെളിവുകള് ഉണ്ടാക്കാനുള്ള ശ്രമമാണു കേസിനു പിന്നിലെന്നുമാണു ദിലീപിന്റെ വാദം. തന്നോടു വ്യക്തിവൈരാഗ്യമുള്ള ബാലചന്ദ്രകുമാറിന്റെ മൊഴി മാത്രമാണുള്ളത്. ഗൂഢാലോചന കുറ്റം നിലനില്ക്കില്ലെന്നും വാദിച്ചു.
എന്നാല് സമാനതകളില്ലാത്ത കേസാണിതെന്നും ഗൂഢാലോചന നടത്തിയതിനും തുടര്നടപടികളെടുത്തതിനും തെളിവുകളുണ്ടെന്നു പ്രോസിക്യൂഷന് അറിയിച്ചു. ദിലീപ് അടക്കമുള്ളവര് അന്വേഷണവുമായി സഹകരിക്കുന്നില്ലെന്നും ബാലചന്ദ്രകുമാറിന്റെ വെളിപ്പെടുത്തലുകളെ ത്തുടര്ന്ന് പ്രതികള് ഫോണുകള് മാറ്റിയതു തന്നെ ഗൂഢാലോചനയ്ക്കു തെളിവാണെന്നും അറിയിച്ചു. ഫോണുകള് മുംബൈയിലേക്ക് കടത്തിയത് അന്വേഷണം അട്ടിമറിക്കാനാണെന്നായിരുന്നു പ്രോസിക്യൂഷന് വാദം. പ്രോസിക്യൂഷനു വേണ്ടി പ്രോസിക്യൂഷന് ഡയറക്ടര് ജനറല് ടി.എ. ഷാജിയും ദിലീപിനായി സീനിയര് അഭിഭാഷകന് ബി. രാമന് പിള്ളയും ഹാജരായി.
ദിലീപിന്റെ ശബ്ദത്തിന് പിന്നാലെ സംവിധായകന് ബാലചന്ദ്രകുമാര് സഹായം തേടി നടന് ദിലീപിനയച്ച അയച്ച ശബ്ദസന്ദേശങ്ങളും പുറത്തുവന്നു. ദിലീപുമായുള്ള സിനിമ നടക്കാതെ ബാലചന്ദ്രകുമാര് സാമ്പത്തിക പ്രതിസന്ധിയിലായ ഘട്ടത്തില് കടം നല്കിയവരോടു കുറച്ചു ദിവസത്തെ സാവകാശം ചോദിക്കാന് സഹായിക്കണമെന്നാവശ്യപ്പെട്ടാണു ദിലീപിനു ശബ്ദസന്ദേശം അയച്ചത്.
ബാലുവിന്റെ പടം ഉടന് നടക്കും, നിങ്ങള് അവനു കുറച്ച് സമയം നല്കണം. പടം നടന്നു കഴിഞ്ഞാല് തരാനുള്ള പണം തരും എന്ന് ഓഡിയോ കോള് ചെയ്തു ദിലീപ് പറയണമെന്ന് അഭ്യര്ഥിക്കുന്ന സന്ദേശത്തില് എനിക്കു കുറച്ചുനാള് പിടിച്ചുനില്ക്കണം. അതുകൊണ്ട് ഇതൊന്നു ദിലീപ് സാര് പറയണം. വേറെ ആരു പറഞ്ഞാലും അവര് കേള്ക്കില്ല. എനിക്ക് സിനിമ വേണ്ട. ഈ ഒരു ഉപകാരം മാത്രം മതി എന്നും ബാലചന്ദ്രകുമാര് പറയുന്നുണ്ട്. ഈ ആവശ്യവുമായി സാജിദ് എന്നയാളെ വിളിച്ചപ്പോള് നടക്കില്ലെന്നു തറപ്പിച്ചു പറഞ്ഞതായും ബാലചന്ദ്രകുമാര് പറയുന്നുണ്ട്. ഇക്കാര്യം തിരക്കഥാകൃത്തും സംവിധായകനുമായ റാഫിയെ വിളിച്ചു പറഞ്ഞപ്പോള് അദ്ദേഹം കുറെ ഉപദേശിച്ചതായും ബാലചന്ദ്രകുമാറിന്റെ ശബ്ദ സന്ദേശത്തിലുണ്ട്.
ദിലീപിന്റെ മുന്കൂര് ജാമ്യാപേക്ഷയ്ക്കൊപ്പം ഈ ശബ്ദസന്ദേശങ്ങള് പ്രതിഭാഗം ഹൈക്കോടതിയില് സമര്പ്പിച്ചിട്ടുണ്ട്. ഇക്കാര്യങ്ങള് സ്ഥിരീകരിക്കാന് റാഫിയുടെ മൊഴികള് അന്വേഷണ സംഘം രേഖപ്പെടുത്തിയിരുന്നു. ബാലചന്ദ്രകുമാര് വിളിച്ചു സംസാരിച്ച വിവരം മൊഴിയെടുപ്പിനു ശേഷം റാഫി മാധ്യമങ്ങളോടും സ്ഥിരീകരിച്ചിരുന്നു. ഇങ്ങനെ കോടതിക്ക് അകത്തും പുറത്തും വലിയ നാടകങ്ങള് തുടരുമ്പോഴാണ് ഇന്നത്തെ മുന്കൂര് ജാമ്യ വിധി വരുന്നത്.
https://www.facebook.com/Malayalivartha
