എല്ലാ കേന്ദ്രസര്‍ക്കാര്‍ ജീവനക്കാരും തിങ്കളാഴ്ച മുതല്‍ ഓഫീസില്‍ ഹാജരാകണമെന്ന് കേന്ദ്രമന്ത്രി ജിതേന്ദ്ര സിംഗ്. കോവിഡ് കേസുകളുടെ എണ്ണത്തിലുണ്ടായ കുറവിനെ തുടര്‍ന്നാണ് വര്‍ക്ക് ഫ്രം ഹോം നിര്‍ത്തലാക്കുന്നതെന്ന് മന്ത്രി പറഞ്ഞു.

കോവിഡ് വ്യാപനം സംബന്ധിച്ച് സ്ഥിതിഗതികള്‍ അവലോകനം ചെയ്തു. രോഗികളുടെ എണ്ണത്തിലുണ്ടായ കുറവും പോസിറ്റിവിറ്റി നിരക്കിലെ കുറവും കണക്കിലെടുത്ത് ഓഫിസുകള്‍ പൂര്‍വസ്ഥിതിയിലാക്കാന്‍ തീരുമാനിച്ചു.

യാതൊരു ഇളവുകളും അനുവദിക്കില്ല. ഫെബ്രുവരി ഏഴ് മുതല്‍ ഈ ഉത്തരവ് പ്രാബല്യത്തില്‍ വരും-മന്ത്രി പറഞ്ഞു. ജീവനക്കാര്‍ മാസ്‌ക് ധരിക്കുന്നുവെന്ന് വകുപ്പ് മേധാവികള്‍ ഉറപ്പാക്കണം.

കോവിഡ് പ്രോട്ടോക്കോളില്‍ വിട്ടുവീഴ്ച ഉണ്ടാകരുതെന്നും അദ്ദേഹം നിര്‍ദേശിച്ചു. എല്ലാ വിഭാഗം ജീവനക്കാരും ഓഫിസുകളില്‍ നേരിട്ടെത്തണം.