പെരിങ്ങരയില്‍ പ്രവര്‍ത്തിക്കുന്ന ഇറച്ചിക്കോഴിക്കടയില്‍ മോഷണം. ഹെല്‍മെറ്റും കോട്ടും ധരിച്ചെത്തിയ മോഷ്ടാവ് സ്ഥാപനത്തിലെ മേശ കുത്തിത്തുറന്ന് ആയിരത്തോളം രൂപ കവരുകയും ചെയ്തു. സി.സി ടി വി യില്‍ പതിഞ്ഞ മോഷ്ടാവിന്റെ ദൃശ്യമടക്കം ഹാജരാക്കി സ്ഥാപന ഉടമ ഇന്ന് രാവിലെ പുളിക്കീഴ് പൊലീസില്‍ പരാതി നല്‍കി.

കാവുംഭാഗം - ചാത്തങ്കരി റോഡില്‍ പോത്തിരിക്കല്‍ പടിക്ക് സമീപം പ്രവര്‍ത്തിക്കുന്ന പണിക്കരു വീട്ടില്‍ ചിക്കന്‍ സെന്ററിലാണ് മോഷണം സംഭവിച്ചത്. ഇന്നലെ രാത്രി ആയിരുന്നു സംഭവം നടന്നത്. സ്ഥാപനത്തിന്റെ പിന്‍വശത്തെ മതില്‍ ചാടിക്കടന്ന് എത്തിയ മോഷ്ടാവ് മേശ കുത്തിത്തുറന്ന് പണം കവരുകയായിരുന്നു. സി.സി ടി വിക്ക് കേടു വരുത്തുവാനും ശ്രമം നടന്നു. രണ്ടാഴ്ച മുമ്ബ് സ്ഥാപനത്തില്‍ സമാനമായ തരത്തില്‍ നടന്ന മോഷണത്തില്‍ 4500 രൂപ നഷ്ടമായിരുന്നു.