രാജ്യാന്തര വിമാന യാത്രാ വിലക്ക് 27 ന് ഇന്ത്യ പിൻവലിക്കുന്നതായുള്ള വാർത്തകൾ കഴിഞ്ഞ ദിവസമാണ് പുറത്ത് വന്നത്. നീണ്ട രണ്ടര വർഷത്തെ കാത്തിരിപ്പിന് ശേഷമാണ് ഇത്തരത്തിൽ അന്തരാഷ്ട്ര വിമാനയാത്രയ്ക്ക് അനുമതി നൽകിയിരിക്കുന്നത്. എയർ ബബിൾ കരാർ പ്രകാരമാണ് ഇതുവരെ സർവീസ് നടത്തിവന്നിരുന്നത്. ഈ വാർത്ത വന്നതോടെ യുഎഇയിലേക്കുള്ള എയർഇന്ത്യ, എയർഇന്ത്യ എക്സ്പ്രസ് വിമാന സർവീസുകളുടെ പ്രവർത്തനം സാധാരണ നിലയിലാകുന്നതാണ്. കോവിഡ് മൂലം നിർത്തിവച്ച സർവീസുകളിൽ ഭൂരിഭാഗവും പുനരാരംഭിക്കും.

അതായത് അബുദാബിയിൽ നിന്ന് എയർ ഇന്ത്യ എക്സ്പ്രസ് കണ്ണൂരിലേക്ക് ഉച്ചയ്ക്ക് ഒന്നിനും തിരുവനന്തപുരത്തേക്ക് രാത്രി 9.10നും കൊച്ചിയിലേക്ക് രാത്രി 10നും കോഴിക്കോട്ടേക്ക് അർധരാത്രി 12.20നുമായിരിക്കും 27 മുതൽ പുറപ്പെടുക. അൽഐനിൽനിന്ന് കോഴിക്കോട്ടേക്ക് എയർ ഇന്ത്യ എക്സ്പ്രസ് ആഴ്ചയിൽ 2 ദിവസം സർവീസ് നടത്തും. നിലവിൽ വ്യാഴാഴ്ച മാത്രമായിരുന്നു ഉണ്ടായിരുന്നത്.

ഞായർ, വ്യാഴം ദിവസങ്ങളിൽ ഉച്ചയ്ക്ക് 2.20നാണു സർവീസ്. ദുബായിൽനിന്ന് കൊച്ചി, കോഴിക്കോട്, ചെന്നൈ, ഡൽഹി, മുംബൈ, ഹൈദരാബാദ് എന്നീ സെക്ടറുകളിലേക്ക് എയർ ഇന്ത്യ പ്രതിദിന സർവീസുണ്ടാകുന്നതാണ്. ഷാർജയിൽനിന്ന് കോഴിക്കോട്ടേക്കുള്ള എയർ ഇന്ത്യ വിമാനം 28 നു പുനരാരംഭിക്കുകയും ചെയ്യും.

അതോടൊപ്പം തന്നെ പ്രവാസികൾ ഏറെ കാത്തിരുന്ന ഷാർജ-കോഴിക്കോട് എയർ ഇന്ത്യ സർവീസ് മാർച്ച് 28 മുതൽ പുനരാരംഭിക്കുകയാണ്. ആഴ്ചയിൽ എല്ലാ ദിവസവുമുള്ള ഈ സർവീസ് പ്രവാസികൾക്ക് ഏറെ ഉപയോഗപ്രദമായിരുന്നു. വർഷങ്ങളായി ഇന്ത്യൻ എയർലൈൻസ് വിമാനങ്ങളാണ് സർവീസ് നടത്തിയിരുന്നത്. കോവിഡ് വ്യാപനത്തെ തുടർന്ന് വിമാനസർവീസുകൾക്ക് നിയന്ത്രണങ്ങൾ വന്നതോടെ എയർഇന്ത്യയുടെ സർവീസുകൾ നിർത്തലാക്കുകയായിരുന്നു. ഇപ്പോൾ അന്താരാഷ്ട്ര വിമാന വിലക്ക് മാറിയതോടെയാണ് എയർ ഇന്ത്യ വീണ്ടും എത്തുന്നത്.

ഷാർജയിൽ നിന്ന് പുറപ്പെടുന്ന വിമാനത്തിൻറെ സമയവും തിരക്ക് കുറഞ്ഞ സമയങ്ങളിലുള്ള അധിക ലഗേജുമാണ് യാത്രക്കാരെ ആകർഷിച്ചിരുന്നത്. ഷാർജയിൽ നിന്ന് കോഴിക്കോട്ടേക്കും തിരിച്ചുമുള്ള വിമാന സർവീസുകളുടെ സമയം രാത്രിയാണ് എന്നതായിരുന്നു പ്രത്യേകത. അതത് ദിവസങ്ങളിൽ ജോലി കഴിഞ്ഞ് അന്ന് രാത്രി തന്നെ നാട്ടിലേക്ക് യാത്ര പുറപ്പെടാം എന്നതായിരുന്നു ഇതിൻറെ ഗുണം. തിരികെ രാത്രി നാട്ടിൽ നിന്നും പുറപ്പെട്ട് അർദ്ധരാത്രിയിൽ ഷാർജയിൽ തിരിച്ചെത്തുകയും പിറ്റേദിവസം തന്നെ ജോലിയിൽ പ്രവേശിക്കാൻ കഴിയുകയും ചെയ്യും.