നടന്‍ ദിലീപും കോണ്‍ഗ്രസിന്റെ രാജ്യസഭാ സ്ഥാനര്‍ത്ഥിയായ ജെബി മേത്തറും തമ്മിലുള്ള സൗഹൃദത്തിന്റെ ആഴം അന്വേഷിക്കാന്‍ കോണ്‍ഗ്രസിലെ എ, ഐ ഗ്രൂപ്പുകള്‍ രംഗത്ത്. ഹൈക്കമാന്റിന്റെ സ്ഥാനാര്‍ത്ഥിയെ നാറ്റിക്കാനാണ് കോണ്‍ഗ്രസ് നേതാക്കള്‍ ശ്രമിക്കുന്നത്.

ആര്‍.എസ്.പിയെ രംഗത്തിറങ്ങിയും കോണ്‍ഗ്രസിന്റെ ഗ്രൂപ്പുനേതാക്കള്‍ കളി തുടങ്ങി കഴിഞ്ഞു. ജെബി മേത്തറുടെ സീറ്റ് പേയ്‌മെന്റ് ആണെന്നാണ് ആര്‍ എസ് പി നേതാവ് എ എ അസീസ് പറഞ്ഞത്. ചെറുപ്പക്കാരിയായ ന്യൂനപക്ഷ സമുദായംഗത്തിന് പണം നല്‍കി സീറ്റ് ലഭിച്ചുവെന്നാണ് അസീസ് പറഞത്. ആര്‍ വൈ എഫിന്റെ സമ്മേളനത്തിലായിരുന്നു അസീസിന്റെ പരിഹാസം.


സോണിയാ ഗാന്ധിയാണ് തനിക്ക് സീറ്റ് നല്‍കിയതെന്ന് ജെ ബി പറഞ്ഞെങ്കിലും അത് കിട്ടിയത് കെ.സി വേണുഗോപാലിന്റെ ദയ കൊണ്ടാണെന്നന്ന് ജെബിക്കറിയാം. പേയ്‌മെന്റ് സീറ്റ് എന്ന് ആര്‍ എസ് പി ഉദ്ദേശിക്കുന്നതും കെ .സി വേണുഗോപാലിനെയാണ്. വേണുവിനെതിരെ കോണ്‍ഗ്രസിലെ ഘടകകക്ഷികള്‍ മുമ്പേ രംഗത്തുണ്ട്.

കോണ്‍ഗ്രസിന്റെ രാജ്യസഭാ സ്ഥാനാര്‍ത്ഥിയായി പ്രഖ്യാപിച്ചതിന് പിന്നാലെ ജെബി മേത്തറിനെതിരെ സമൂഹമാധ്യമങ്ങളില്‍ വിമര്‍ശനം തുടങ്ങിയിരുന്നു. നടിയെ ആക്രമിച്ച കേസിലെ പ്രതി ദിലീപിനൊപ്പമുള്ള സെല്‍ഫി ഉയര്‍ത്തിക്കാട്ടിയാണ് ജെബിക്കെതിരെയുള്ള വിമര്‍ശനം. 2021ല്‍ ദിലീപിനൊപ്പമെടുത്ത ചിത്രം സമൂഹമാധ്യമങ്ങളില്‍ വ്യാപകമായി പ്രചരിക്കുകയാണ്.

സഹപ്രവര്‍ത്തകയെ ക്രൂരബലാത്സംഗത്തിന് ഇരയാക്കാനായി ക്വട്ടേഷന്‍ കൊടുത്ത നടനെ ആഘോഷിക്കുന്ന വനിതയാണോ കോണ്‍ഗ്രസിന്റെ എംപി സ്ഥാനാര്‍ത്ഥി എന്നാണ് നവമാധ്യമങ്ങളില്‍ ഉയരുന്ന വിമര്‍ശനം. 2021 നവംബറില്‍ നടന്ന ആലുവ ന?ഗരസഭയുടെ ശതാബ്ദി ആഘോഷം ഉദ്ഘാടനം ചെയ്യാന്‍ ദിലീപ് എത്തിയപ്പോള്‍ ജെബി മാത്യു എടുത്ത സെല്‍ഫിയാണ് സാമൂഹിക മാധ്യമങ്ങളിലൂടെ പ്രചരിക്കുന്നത്. ആലുവ ന?ഗരസഭയുടെ വൈസ് ചെയര്‍മാനായ ജെബി മേത്തറും മറ്റ് അംഗങ്ങളും സെല്‍ഫിയിലുണ്ട്.

നടിയെ ആക്രമിക്കപ്പെട്ട കേസില് പ്രതിയായ ശേഷം ദിലീപ്, ഒരുപാട് നാളുകള്‍ക്ക് ശേഷം പങ്കെടുത്ത പൊതു പരിപാടി കൂടിയായിരുന്നു അത്. താന്‍ നീതിക്കും സത്യത്തിനും വേണ്ടിയുള്ള യുദ്ധത്തിലാണ്. എല്ലാവരുടേയും പ്രാര്‍ത്ഥന എനിക്കൊപ്പമുണ്ടാകണമെന്ന് ആത്മാര്‍ത്ഥമായി ആഗ്രഹിക്കുന്നുവെന്ന് അന്നത്തെ ചടങ്ങില്‍ ദിലീപ് പറഞ്ഞിരുന്നു. ദിലീപിനെ പോലുള്ളവരെ വേദിയില്‍ വിളിച്ച് വരുത്തിയ വനിതാ നേതാവിനെ ജനം സ്ത്രീകളടക്കമുള്ള കോണ്‍ഗ്രസിലെ പ്രവര്‍ത്തകര്‍ അംഗീകരിക്കുന്നുണ്ടോ എന്നാണ് സമൂഹമാധ്യമങ്ങളിലെ വിമര്‍ശനം. സമൂഹമാധ്യമത്തില്‍ കോണ്‍ഗ്രസ് ശക്തമാണ്. കെസുധാകരനാണ് പാര്‍ട്ടിയില്‍ സമൂഹ മാധ്യമത്തെ നിയന്ത്രിക്കുന്നത്. അതു കൊണ്ടു തന്നെ സുധാകരന്‍ അറിയാതെ കോണ്‍ഗ്രസില്‍ ഒന്നും നടക്കില്ല.

മുന്‍ കെ പി സി സി പ്രസിഡണ്ട് ടി ഒ ബാവയുടെ കൊച്ചു മകളും കോണ്‍ഗ്രസ് നേതാവായ കെഎംഐ മേത്തറുടെ മകളുമാണ് ജെബി മേത്തര്‍. ആലുവ നഗരസഭ വൈസ് ചെയര്‍പേഴ്‌സണായി ജെബി മേത്തര്‍ പ്രവര്‍ത്തിച്ചിട്ടുണ്ട്. 2010 മുതല്‍ ആലുവ നഗരസഭാ കൗണ്‍സിലറാണ് ഇവര്‍. 42 വര്‍ഷത്തിന് ശേഷമാണ് കോണ്‍ഗ്രസില്‍ നിന്ന് ഒരു വനിത രാജ്യസഭയിലേക്ക് എത്തുന്നത്. പാര്‍ട്ടി ദേശീയ അധ്യക്ഷ സോണിയ ഗാന്ധിയുടെ അംഗീകാരത്തോടെയാണ് ജെമി മേത്തറിന്റെ സ്ഥാനാര്‍ത്ഥിത്വം. കെപിസിസി സമര്‍പ്പിച്ച അന്തിമ പട്ടികയില്‍ നിന്നാണ് ഹൈക്കമാന്റിന്റെ തീരുമാനം.


മഹിളാ കോണ്‍ഗ്രസിന്റെ സംസ്ഥാന അധ്യക്ഷയാണ് ജെബി മേത്തര്‍. എം ലിജുവിനെ സ്ഥാനാര്‍ത്ഥിയാക്കാന്‍ അവസാന ഘട്ടം വരെ കെപിസിസി അധ്യക്ഷന്‍ കെ സുധാകരന്‍ പരിശ്രമിച്ചിരുന്നു. ഇതിനിടയിലാണ് പട്ടികയില്‍ അവസാനം ഇടംപിടിച്ച ജെബി മേത്തര്‍ സ്ഥാനാര്‍ത്ഥിയായി വരുന്നത്. മുസ്ലിം, യുവത്വം, വനിത എന്നീ പരിഗണനകള്‍ ജെബി മേത്തറിന് അനുകൂലമായി. കെസി വേണുഗോപാല്‍ ജെബി മേത്തറിന് വേണ്ടി ഹൈക്കമാന്റില്‍ സമ്മര്‍ദ്ദം ചെലുത്തിയതായാണ് വിവരം.

1980 ന് ശേഷം ആദ്യമായാണ് കോണ്‍ഗ്രസില്‍ നിന്ന് ഒരു വനിത രാജ്യസഭയിലേക്ക് എത്തുന്നത്. പാര്‍ട്ടിയുടെ സംസ്ഥാന നേതാക്കള്‍ക്കിടയില്‍ ഗ്രൂപ്പ് പോരിന് ഇടയാകും ഈ തീരുമാനമെന്നാണ് വിവരം. കഴിഞ്ഞ തെരഞ്ഞെടുപ്പില്‍ ന്യൂനപക്ഷം പാര്‍ട്ടിയെ കൈവിട്ടുവെന്ന വിലയിരുത്തലിന്റെ കൂടി അടിസ്ഥാനത്തില്‍ മുസ്ലിം വനിതയെന്ന പരിഗണനയും ജെബി മേത്തറിന് കിട്ടിയിട്ടുണ്ട്.

ദിലീപിനെതിരായ പ്രചരണം ജെബിയുടെ ഇമേജ് തകര്‍ക്കും എന്നല്ലാതെ മറ്റൊന്നും സംഭവിക്കില്ല. എങ്കിലും കോണ്‍ഗ്രസിന്റെ രീതി അനുസരിച്ച് ഇതെല്ലാം പതിവാണ്.