കോട്ടയം കുരിയാടി പടിയിൽ കെ റെയിലിനായി  കൊണ്ടുവന്ന കല്ലുകളും മറ്റു സാമഗ്രികളും സാധനങ്ങളും അടങ്ങുന്ന വാഹനത്തിന് മുകളിൽ കയറി മണിക്കൂറുകളായി സമരം ചെയ്യുന്ന ഡിസിസി പ്രസിഡന്റ് നാട്ടകം സുരേഷിനും മറ്റു സമരപോരാളികൾക്ക് ഭക്ഷണം പാകം ചെയ്യുന്ന തിരക്കിലാണ് വീട്ടമ്മമാർ. കെ റെയിൽ സമരം ശക്തമാകുകയാണ്. അതേസമയം മാടപ്പള്ളിയിൽ മണ്ണെണ്ണയൊഴിച്ച് ഭീഷണി മുഴക്കിയ കെ റെയിൽ പ്രതിഷേധക്കാർക്കെതിരെ കേസ്. 150 പേർക്കെതിരെയാണ് കേസെടുത്തിരിക്കുന്നത്. മണ്ണെണ്ണയൊഴിച്ച് പ്രതിഷേധിക്കുന്നതിനിടെ വനിതാ സിവിൽ പൊലീസ് ഉദ്യോഗസ്ഥയുടെ കണ്ണിൽ മണ്ണെണ്ണ വീണതായും കാഴ്ചയ്ക്ക് തകറാറ് പറ്റിയതായും പൊലീസ് പറഞ്ഞു. തൃക്കൊടിത്താനം പൊലീസ് സ്റ്റേഷനിലെ ഉദ്യോഗസ്ഥ ദിവ്യ മോളുടെ കണ്ണിലാണ് മണ്ണെണ്ണ വീണത്.

ഇതു സംബന്ധിച്ചാണ് കേസ് രജിസ്റ്റർ ചെയ്തത്. കണ്ടാലറിയാവുന്ന 150 പേർക്കെതിരെയാണ് കേസ് രജിസ്റ്റർ ചെയ്തിരിക്കുന്നത്. ജിജി ഫിലിപ്പ് ഉൾപ്പെടെയുള്ളവർക്കെതിരെ ആണ് കേസ് എടുത്തത്. മാടപ്പള്ളിയിലും, നട്ടാശ്ശേരി, ചോറ്റാനിക്കരയിലും ഇന്ന് കല്ലിടൽ വീണ്ടും തുടങ്ങും. മാത്രവുമല്ല അതിരടയാള കല്ലുകൾ പിഴുതെറിയുന്നവർക്ക് എതിരെ കർശന നടപടി സ്വീകരിക്കാനാണ് സർക്കാർ തീരുമാനം.

കല്ല് പിഴുതെറിയുന്നവർക്കെതിരെ പൊലീസ് കേസ് എടുക്കും. പിന്നീട് പിഴ അടക്കം ഈടാക്കാനാണ് കെ റെയിൽ അധികൃതരുടെ തീരുമാനം. കഴിഞ്ഞ വെള്ളിയാഴ്ചയാണ് തൃക്കൊടിത്താനത്ത് സംഘർഷം ഉണ്ടായത്. വലിയ സംഘർഷാവസ്ഥയാണ് സ്ഥലത്ത് ഉണ്ടായത്. പൊലീസും നാട്ടുകാരും തമ്മിൽ ഏറ്റുമുട്ടുകയായിരുന്നു. തുടർന്നുണ്ടായ സംഘർഷത്തിനിടെയാണ് വനിതാ പൊലീസ് ഉദ്യോഗസ്ഥയുടെ കണ്ണിൽ മണ്ണെണ്ണ വീണത്.