രാജ്യത്തെ മറ്റൊരു സംസ്ഥാനത്തും ഇങ്ങനെ ഒരു സ്ഥിതിവിശേഷം നിലവിലില്ല; സിപിഎം നിരത്തിലിറക്കുന്ന ഗുണ്ടകളെ ഭയന്നാണ് ജനങ്ങള്‍ വീട്ടിലിരിക്കുന്നത്; പൊതു പണിമുടക്കിന്റെ പേരില്‍ കേരളത്തില്‍ രണ്ട് ദിവസമായി അരങ്ങേറുന്നത് സര്‍ക്കാര്‍ സ്‌പോണ്‍സേര്‍ഡ് ഗൂണ്ടായിസം ആണെന്ന് കേന്ദ്രമന്ത്രി വി മുരളീധരന്‍
പൊതു പണിമുടക്കിന്റെ പേരില്‍ കേരളത്തില്‍ രണ്ട് ദിവസമായി അരങ്ങേറുന്നത് സര്‍ക്കാര്‍ സ്‌പോണ്‍സേര്‍ഡ് ഗൂണ്ടായിസം ആണെന്ന് കേന്ദ്രമന്ത്രി വി മുരളീധരന്‍. ലോകത്ത് എവിടെയെങ്കിലും ഒരു നാടിന്റെ പ്രവര്‍ത്തനം സ്തംഭിപ്പിക്കാന്‍ സര്‍ക്കാര്‍ നേരിട്ട് ഇറങ്ങുന്നുണ്ടെങ്കില്‍ അത് കേരളത്തില്‍ മാത്രമായിരിക്കുമെന്നും അദ്ദേഹം പറഞ്ഞു. ഭരണപക്ഷത്തിന്റെ ജനദ്രോഹ പ്രവര്‍ത്തനങ്ങള്‍ക്ക് സമരത്തില്‍ പങ്കെടുത്തുകൊണ്ട് ജയ് വിളിക്കുകയാണ് വി. ഡി. സതീശനും സംഘവും. രാജ്യത്തെ മറ്റൊരു സംസ്ഥാനത്തും ഇങ്ങനെ ഒരു സ്ഥിതിവിശേഷം നിലവിലില്ല എന്നും കേന്ദ്രമന്ത്രി ചൂണ്ടിക്കാട്ടി.
ദേശീയ പണിമുടക്ക് എന്നത് പേര് മാത്രമാണെന്നും യഥാര്‍ത്ഥത്തില്‍ നടന്നുകൊണ്ടിരിക്കുന്നത് കേരള പണിമുടക്ക് ആണെന്നും വി.മുരളീധരന്‍ പറഞ്ഞു . ജനങ്ങള്‍ക്ക് ഈ പണിമുടക്കില്‍ യാതൊരു താല്‍പര്യവുമില്ല. സിപിഎം നിരത്തിലിറക്കുന്ന ഗുണ്ടകളെ ഭയന്നാണ് ജനങ്ങള്‍ വീട്ടിലിരിക്കുന്നത്. ജനങ്ങളുടെ സഞ്ചാര സ്വാതന്ത്ര്യം ചോദ്യം ചെയ്യുക , തുറന്ന കടകള്‍ അടപ്പിക്കുക, സ്ത്രീകളെ പോലും വഴിനടക്കാന്‍ അനുവദിക്കാതിരിക്കുക എന്നത് തീര്‍ത്തും ജനദ്രോഹപരമാണ്. ഇതെല്ലാം അരങ്ങേറുമ്ബോള്‍ മഞ്ഞ കുറ്റികള്‍ക്ക് കാവല്‍ നിന്ന പൊലീസ് കയ്യുംകെട്ടി നോക്കി നില്‍ക്കുകയാണെന്നും മുരളീധരന്‍ പറഞ്ഞു. സര്‍ക്കാര്‍ ജീവനക്കാര്‍ പണിമുടക്കരുത് എന്ന ഹൈക്കോടതി ഉത്തരവ് ചൂണ്ടിക്കാണിച്ച കേന്ദ്ര മന്ത്രി, അത് നടപ്പാക്കാത്ത ഇടതുപക്ഷ സര്‍ക്കാര്‍ നയം ഭരണഘടനാ ലംഘനമാണെന്ന് കുറ്റപ്പെടുത്തി.
https://www.facebook.com/Malayalivartha
