'മുഖം പൂര്ണ്ണമായും തകര്ത്തു, മൂക്ക് ഇടിച്ച് ഒരു വശത്തേക്കാക്കി', ലഹരി വസ്തുക്കളുടെ ഉപയോഗത്തിനെതിരെ പരാതി നല്കിയ യുവാവിനെ അതിക്രൂരമായി മര്ദ്ദിച്ച് പ്ലസ്ടു വിദ്യാര്ത്ഥികള്..
വളരെ ആശങ്ക നിറഞ്ഞതും ഭീതി ജനിപ്പിക്കുന്നതുമായ ഒരു വാര്ത്ത കേട്ടാണ് ഇന്ന് കേരളക്കര ഉണര്ന്നത്. വര്ക്കലയിലെ ചെമ്മരുതിയില് അനു എന്ന യുവാവിനെ ഒരു കൂട്ടം വിദ്യാര്ത്ഥികള് വളരെ മാരകമായി ആക്രമിക്കുകയും മുഖം വികൃതമാക്കുകയും ചെയ്തിരിക്കുന്നു..
അനു എന്ന ചെറുപ്പക്കാരനെ വിദ്യാര്ത്ഥികള് ആക്രമിച്ചതിന് പിന്നിലുള്ള കാരണമാണ് നമ്മെ ഭയപ്പെടുത്തുന്നത്. നമുക്കറിയാം സംസ്ഥാനത്ത് ലഹരിവസ്തുക്കള് ഉപയോഗിക്കുന്നവരുടെ എണ്ണത്തില് വന് വര്ധനവാണ് ഉണ്ടായിരിക്കുന്നതെന്ന്. പ്രത്യേകിച്ച് വിദ്യാര്ത്ഥികള്ക്കിടയില്. ഇവിടെ അനുവിനെ ക്രൂരനായി മര്ദ്ദിച്ച് അവശനാക്കിയ വിദ്യാര്ത്ഥികളും ലഹരി വസ്തുക്കള് നിരന്തരം ഉപയോഗിക്കുന്നവരായിരുന്നു.
ഒരിക്കല് ഈ വിവരം അനു പോലീസിന്റെ ശ്രദ്ധയില്പെടുത്തിയിരുന്നു. ശ്രദ്ധിക്കണം കുട്ടികളുടെ പേര്, സ്കൂളിന്റെ പേര് തുടങ്ങിയ ഒരു വിവരവും അനു പുറത്തുവിട്ടിരുന്നില്ല. തന്റെ പ്രദേശത്ത് ലഹരിവസ്തുക്കളുടെ ഉപയോഗം ദിനംപ്രതി വര്ധിക്കുന്നു. ഇത് സ്ത്രീകള്ക്കും വിദ്യാര്ത്ഥികള്ക്കും ഭീഷണി ഉണ്ടാക്കുന്നു എന്നുമാത്രമാണ് അനു നല്കിയ വിവരം. മാത്രമല്ല കുട്ടികള്ക്ക് ലഹരി നല്കുന്നവര് രാത്രികാലങ്ങളില് ഈ പരിസരത്ത് വരുന്നുണ്ട് എന്നും ഇവര് ബൈക്കുകളില് അഭ്യാസം നടത്തുന്നെന്നും പോലീസിന് നല്കിയ പരാതിയില് അനു ചൂണ്ടിക്കാട്ടിയിരുന്നു.
ഇതിന്റെ പ്രതികാരമെന്നോണമാണ് അനുവിനെ അതിക്രൂരമായി മര്ധിച്ചത്.
കേരളമനസാക്ഷിയെ അതീവ ദുഖത്തിലാഴ്ത്തുന്നതാണ് അനുവിന്റെ ദൃശ്യങ്ങള്. ഇടിയുടെ ആഘാതത്തില് അനുവിന്റെ മൂക്ക് ഒരു ഭാഗത്തേക്ക് ചെരിഞ്ഞിട്ടുണ്ട്. ഭക്ഷണം കഴിക്കാന് സാധിക്കാതെ ഒരേ കിടപ്പിലാണ് ഈ യുവാവ് ഉള്ളത്. മുഖം മുഴുവന് പൊതിഞ്ഞുകെട്ടിയിരിക്കുകയാണ്. ശ്വാസം വിടുന്നത് വായുടെ ഒരു സൈഡിലൂടെയാണ്. പല്ലിനും സാരമായ പൊട്ടലുകള് ഉണ്ടായിട്ടുണ്ട് എന്നാണ് അനുവിന്റെ വീട്ടുകാര് പറയുന്നത്.
അതേസമയം തങ്ങള്ക്ക് അറിയാവുന്ന കുട്ടിയും അക്കൂട്ടത്തില് ഉണ്ടായിരുന്നു എന്നും പോലീസില് പരാതിപ്പെട്ടപ്പോള് പരീക്ഷ നടക്കുന്നതിനാല് കുട്ടിയ്ക്കെതിരെ കൂടുതല് നടപടി സ്വീകരിക്കാന് കഴിയില്ല എന്ന മറുപടിയാണ് നല്കിയത് എന്നും അനുവിന്റെ സഹോദരി ഭര്ത്താവായ വിനീത് മലയാളിവാര്ത്തയോട് പറഞ്ഞു.
മാത്രമല്ല വിദ്യാര്ത്ഥികള് പഠിക്കുന്ന സ്കൂളിലെ അധികൃതരെ കാര്യങ്ങള് ധരിപ്പിച്ചപ്പോള് ഒട്ടും ഉത്തരവാദിത്വമില്ലാത്ത നിലപാടാണ് അവര് അറിയിച്ചത് എന്നും സ്കൂളിലെ കാര്യങ്ങള് മാത്രമേ തങ്ങള്ക്ക് നോക്കേണ്ടതുള്ളൂ, സ്കൂളിന് പുറത്ത് കുട്ടികള് എന്ത് ചെയ്താലും ഇടപെടേണ്ട കാര്യമില്ല എന്നുമാണ് അറിയിച്ചത്.
അയ്യോ കഷ്ടം, പാവം അനു എന്നൊക്കെ പറഞ്ഞ് ഇവിടെ അവസാനിപ്പിക്കേണ്ട ഒരു വിഷയമല്ല ഇത്. നമ്മള് ഓരോരുത്തരും നന്നായി ചിന്തിക്കേണ്ട ഒരു വിഷയമാണ്. നമ്മുടെ നാടിന്റെ ഭാവിയുടെ രണ്ട് മുഖങ്ങളാണ് അനുവും ആക്രമിച്ച ആ വിദ്യാര്ത്ഥികളും. വീട്ടില് നിന്ന് പുറത്തിറങ്ങി സമൂഹത്തിലേക്കൊന്ന് കണ്ണോടിച്ചു നോക്കൂ. അപ്പോള് നമുക്ക് കാണാന് കഴിയും കിടക്കയില് ഒന്ന് അനങ്ങാന് പോലും പറ്റാത്ത ഒരുപാട് അനുവിനെ. വഴിയില് ബഹളമുണ്ടാക്കിയും കത്തിയെടുത്തും ഭാവിത്തുലക്കുന്ന യുവ തലമുറയെ.
ഈ നിമിഷം നമ്മള് ചിന്തിക്കേണ്ടത് അനുവിനെ കുറിച്ച് മാത്രമല്ല, നമ്മുടെ വീട്ടിലെ മകനെ അല്ലെങ്കില് മകളെ കുറിച്ചാണ്. എന്റെ കുട്ടി ലഹരിവസ്തുക്കള് ഉപയോഗിക്കുന്നില്ല അവര് അക്രമം നടത്തുന്നില്ല എന്ന് ഉറപ്പിക്കാന് ഓരോ മാതാപിതാക്കള്ക്കും കഴിയണം.
https://www.facebook.com/Malayalivartha
