പ്രായപൂര്‍ത്തിയാകാത്ത പെണ്‍കുട്ടിക്ക് മൊബൈല്‍ ഫോണിലൂടെ അശ്ലീലസന്ദേശമയച്ച യുവാവിനെ ചാത്തന്നൂര്‍ പോലീസ് പിടികൂടിയതായി റിപ്പോർട്ട്. പോലീസ് നടത്തിയ അന്വേഷണത്തിൽ ചാത്തന്നൂര്‍ കോയിപ്പാട് നന്ദനത്തില്‍ ബിജു(38)വാണ് അറസ്റ്റിലായത്.

പതിനാറുകാരിയായ പെണ്‍കുട്ടിയുടെ മൊബൈല്‍ നമ്പര്‍ കൈക്കലാക്കിയ ഇയ്യാൾ ഇതിലേക്ക് നിരന്തരം അശ്ലീലസന്ദേശങ്ങള്‍ അയയ്ക്കുകയായിരുന്നുവെന്നാണ് പരാതി. ഇയാളുടെ നമ്പര്‍ പെണ്‍കുട്ടി ബ്ലോക്ക് ചെയ്തപ്പോള്‍ മറ്റ് ഫോണ്‍ നമ്പര്‍ ഉപയോഗിച്ച് വീണ്ടും അശ്ലീലസന്ദേശം അയയ്ക്കുകയായിരുന്നു. ഇതുകൂടാതെ നിരന്തരം പെണ്‍കുട്ടിയെ പിന്തുടര്‍ന്ന് ശല്യപ്പെടുത്തുകയും ചെയ്തതായി പരാതിയിൽ പറയുന്നു. ഇതേത്തുടര്‍ന്ന് വീട്ടുകാര്‍ പോലീസില്‍ പരാതി നല്‍കിയിരിക്കുകയാണ്.

സൈബര്‍ പോലീസിന്റെ സഹായത്തോടെയാണ് പ്രതിയെ പിടികൂടിയിരിക്കുന്നത്. ചാത്തന്നൂര്‍ ഇന്‍സ്‌പെക്ടര്‍ ജസ്റ്റിൻ ജോണിന്റെ നേതൃത്വത്തിലായിരുന്നു അറസ്റ്റ് രേഖപ്പെടുത്തിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്യുകയുണ്ടായി.