ഇരുവര്‍ക്കുമെതിരെ ശേഖരിക്കുന്നത് പഴുതടച്ച തെളിവുകള്‍.... നടിയെ ആക്രമിച്ച കേസില്‍ എട്ടാം പ്രതി നടന്‍ ദിലീപിനും ഭാര്യ കാവ്യാമാധവനും തുല്ല്യപങ്കുണ്ടെന്ന വിലയിരുത്തലില്‍ തുടരന്വേഷണ സംഘം.

നിഗൂഢമായ പല ചോദ്യങ്ങള്‍ക്കും കാവ്യയെ ചോദ്യം ചെയ്യുന്നതിലൂടെ ഉത്തരമാകുമെന്നാണ് ക്രൈംബ്രാഞ്ച് പ്രതീക്ഷ. കാവ്യയെ പ്രതിചേര്‍ക്കാന്‍ തക്ക തെളിവുകളൊന്നും ഇതുവരെ കിട്ടിയിട്ടില്ല .

നേരത്തെ ദിലീപിനെ രണ്ട് ദിവസം ചോദ്യം ചെയ്‌തെങ്കിലും കാര്യമായി സഹകരിച്ചില്ല. കാവ്യയില്‍ നിന്ന് ശേഖരിക്കുന്ന വിവരങ്ങള്‍ ഉള്‍പ്പെടുത്തി ദിലീപിനെ വീണ്ടും ചോദ്യം ചെയ്യും. ദിലീപിനും കാവ്യയ്ക്കും നടിയോട് ഒരുപോലെ ശത്രുതയുണ്ടായിരുന്നെന്ന് ക്രൈംബ്രാഞ്ച് വിലയിരുത്തുന്നത്. ഇതിനു തെളിവായാണ് സുരാജിന്റെ ഫോണില്‍ നിന്ന് വീണ്ടെടുത്ത ശബ്ദസാമ്പിളുകളെ അന്വേഷണ സംഘം കാണുന്നത്.

ഈ ശിക്ഷ ഞാന്‍ അനുഭവിക്കേണ്ടതല്ല, വേറൊരു പെണ്ണ് അനുഭവിക്കേണ്ടതായിരുന്നു. അവരെ നമ്മള്‍ രക്ഷിച്ചു രക്ഷിച്ചു കൊണ്ടുപോയിട്ട് ഞാന്‍ ശിക്ഷിക്കപ്പെട്ടു'ദിലീപിന്റേതായി പുറത്തു വന്ന ശബ്ദരേഖയാണ്. ഈ ശബ്ദരേഖ വിരല്‍ ചൂണ്ടുന്നത് കാവ്യയിലേക്കോ? . കാവ്യയ്ക്ക് മുന്‍കൂര്‍ അറിവുണ്ടായിരുന്നോ തുടങ്ങിയ കാര്യങ്ങളില്‍ വ്യക്തത വരുത്താനാണ് നാളെ ചോദ്യം ചെയ്യാന്‍ ഒരുങ്ങുന്നത്.

ഹാജരാകേണ്ട സ്ഥലം തീരുമാനിക്കാന്‍ കാവ്യക്ക് ക്രൈംബ്രാഞ്ച് അവസരം നല്‍കിയിട്ടുണ്ട്. സാക്ഷിയായ സ്ത്രീക്ക് നല്‍കിയ ആനുകൂല്യമാണിതെന്നാണ് ക്രൈബ്രാഞ്ച് പറയുന്നത്. ചോദ്യം ചെയ്യലിന് നിശ്ചയിച്ച ദിവസത്തിനോ സമയത്തിനോ മാറ്റം വരില്ല. ചെന്നൈയിലുള്ള കാവ്യ ഇന്ന് തിരിച്ചെത്തുമെന്നാണ് വിവരം.

ബാലചന്ദ്രകുമാറിനെയും കാവ്യയ്‌ക്കൊപ്പമിരുത്തി ചോദ്യം ചെയ്യുമെന്ന് ക്രൈംബ്രാഞ്ച് വൃത്തങ്ങളില്‍ നിന്നുള്ള സൂചനകള്‍.